Sesusi Ulekesa Ombili Ena Nefendelo Liotyotyili

Etyi atunda kotyipito tyotyinepo ko Kanaa, Sesusi aende ko Kafalanau. Me ya Sesusi nonondenge mbae, Tiaku, na Suse, na Simau, na Sunda, navo avaende.

Omokonda yatyi Sesusi aholovonena okuenda ko Kafalanau? Omokonda epunda-umbo olio, ankho likahi pohika pankhimana tyipona o Nasalee no Kanaa, tupu enene. Tupu, ovalongwa ovanyingi va Sesusi ovape, ova Kafalanau ine vakala popepi nepunda-umbo olio. Ngotyo, Sesusi ankho ukevelongesila motyilongo tyavo muene ovipuka vimwe.

Mokueenda kuomuvo Sesusi akala ko Kafalanau, walingile omahuviso omakuavo. Ovanthu ovanyingi mepunda-umbo olio, na vana ankho vakala popepi, veivile ovipuka Sesusi alinga. Mahi Sesusi nomapanga ae, ova Sundeu vokuhole Huku, ankho vena okulinga oungendi okuenda ko Selusalei opo vakalinge otyipito tyo Pasikwa, menima 30 P.K.

Putyina vekahi mondyuo ya Huku mo Selusalei, ovalongwa va Sesusi vamuene vali otyipuka otyikuavo tyevehuvisile, mahi ankho tyelikalela netyi vamuene po tete.

Ovitumino vya Huku ankho vituma ova Isilayeli okulinga ovilikutila viovinyama mondyuo ya Huku, iya ovaenda vatunda kokule ankho vesukisa okulia omuvo vakala oko. Ngotyo, Ovitumino ankho vituma vana vatunda kokule okuya ko Selusalei, okuetelela onombongo opo valande “onongombe, nonongi, novinkhombo,” novipuka ovikuavo mavesukisa tyina vekahi mepunda-umbo olio. (Deuteronômio 14:24-26) Mokonda yotyo, ovalandesi mo Selusalei ankho valandesila mepata liondyuo ya Huku ovinyama noviila. Iya ankho vekahi nokuvaka ovanthu, mokuveita onombongo ononyingi.

Sesusi anumana unene, anengaula onombongo mbavo mbovivela, apinaununa onomesa mbavo, iya ovanthu vatyo evetaatela kondye. Sesusi evepopila okuti: “Ovipuka evi apa vipolei-po! Yekei-po okulinga ondyuo ya Tate yange, ondyuo yovitanda!” — Suau 2:16.

Etyi ovalongwa va Sesusi vetyimona, avahinangela eulo lipopia konthele Yomona wa Huku okuti: “Ombili nondyuo yove maindi.” Mahi ova Sundeu avemupulu okuti: “Enyingilikilo patyi upondola okutulingila, malilekesa okuti una evililo liokulinga ovipuka evi?” Sesusi evekumbulula okuti: “Hanyei-po ondyuo ya Huku, ame mandyiipindula-po mononthiki ononthatu.” — Suau 2:17-19; Salmo 69:9.

Ova Sundeu ankho vasoka okuti hamwe Sesusi upopia ondyuo ya Huku mo Selusalei, avemupulu okuti: “Ondyuo ei ya Huku yatungwa omanima 46, ove moitungu ononthiki ononthatu?” (Suau 2:20) Mahi Sesusi ankho ukahi nokupopia olutu lwae, ngatyina ondyuo ya Huku. Etyi palamba omanima etatu, ovalongwa vae avahinangela onondaka ombo pu etyi pahe Sesusi atutila.