Onkhalamutwe Yomafualali Ulekesa Ekolelo Enene

Etyi amanuhula okulinga Elongomona liae Komphunda, Sesusi aende kepunda-umbo lyo Kafalanau. Iya oko ovakulu vamwe vova Sundeu aveya no kwe. Ankho vatumwa nomulume umwe uhe mu Sundeu — onkhalamutwe yomafualali o Loma.

Onkhalamutwe oyo, ankho ina omuundapi umwe ihole unene, wavela uhungi kokunkhia. Namphila ankho onkhalamutwe oyo, ha mu Sundeu, mahi aovola Sesusi opo emukuateseko. Ova Sundeu avapopila Sesusi okuti, omuundapi womulume oo, “uli keumbo wavela, una otyintheya, ukahi nokumona ononkhumbi,” tyafuile ankho waihamenwa unene. (Mateusi 8:6) Ovakulu vova Sundeu avahangununina Sesusi okuti onkhalamutwe oyo, yatokala okukuatesuako iya avati: “Uhole ovanthu vetu, iya oe watunga ondyuo yetu yokufendela.” — Luka 7:4, 5.

Liwa-liwa, Sesusi aende novakulu ovo keumbo lionkhalamutwe oyo yomafualali. Tyina vehungi kokuhika meumbo, onkhalamutwe aitumu omapanga ayo vakapopile Sesusi okuti: “Tatekulu ame hafuilepo opo unyingile meumbo liange. Otyo neheilile ku ove.” (Luka 7:6, 7) Onondaka ombo ankho mbulekesa okuti weliola omutima, ngwe omutumini! Tupu mbalekesa okuti namphila atunda ko Loma kovanthu vokutekula onya ovapika, ankho welikalela. — Mateusi 8:9.

Tyotyili omulume oo onkhalamutwe, ankho utyii okuti ova Sundeu kaveliende novanthu veheva Sundeu. (Ovilinga 10:28) Tyafuile otyo onkhalamutwe yatuminine omapanga ayo akapopile Sesusi okuti: “Popia vala ondaka, omuundapi wange maveluka.” — Luka 7:7.

Sesusi ahuvu etyi eiva onondaka ombo iya apopi okuti: “Ndyimupopila okuti, hinevase omunthu una ekolelo ngeli mo Isilayeli.” (Luka 7:9) Etyi omapanga akondoka keumbo lionkhalamutwe, avavasi omupika ankho wokuavela unene, pahe ukahi nawa.

Etyi Sesusi alinga ehuviso olio liokuhakula, aundapesa omphitilo oyo opo alekese nawa okuti vana vehe va Sundeu, mahi vena ekolelo mavakayambwa, ati: “Ovanyingi mavakatunda koutundilo no koutakelo avakapumphama komesa ike na Ambalaiau na Isake na Sakoo Mouhamba wo keulu.” Iya ova Sundeu vehena ekolelo? Sesusi wati: “Mavakayumbwa pondye menthiki. Opo mavakalilila nokukema mokonda yokueihamenwa.” — Mateusi 8:11, 12.

Ova Sundeu vatetekela okupewa omphitilo yokunyingila Mouhamba na Kilisitu avehetavela, mavakaanyua. Mahi ovanthu vehe va Sundeu mavakatambulwa nawa “Mouhamba wo keulu,” avakakala ngatyina vapumphama komesa ya Sesusi.