Sesusi Ukondoka Keulu

Sesusi wavasa ovalongwa vae mo Ngalileya. Eveavela otyilinga tyimwe otyinene, eveti: ‘Endei, kalongesei ovanthu movilongo aviho valinge ovalongwa vange. Velongesei vetavele ovipuka aviho nemutuma amuvembatisala.’ Pahe eveti: ‘Ame ndyina onwe ononthiki ambuho.’

Etyi Sesusi atutiliswa, ovalongwa vae vemumwene umwe, avakala ononthiki 40 otyo velimona. Ovalongwa vae voko Ngalileya no voko Selusalei vemumwene. Wevelongesile ovipuka ovinyingi, tupu walingile ovipuka vihuvisa. Onthiki yahulilila Sesusi elivasa novatumwa vae, velivasile Komphunda Yomindyambi. Wevepopilile okuti: ‘Mo Selusalei mwahatundei-mo, kevelelei etyi Tate apopile.’

Ovatumwa avahanoñgonoka etyi Sesusi apopia. Avemupulu okuti: ‘Opehepano molingi Ohamba yo Isilayeli?’ Sesusi eveti: ‘Onthiki Siovaa anaka ndyilinge Ohamba kainehike-po. Tyina omphepo ikola yamemulaukila, onwe mamupewa ononkhono, amulingi onombangi mbange. Endei kalongesei ovanthu ko Selusalei noko Sundeya noko Samaliya, amwii atee konohika mbokokule-kule kombanda yohi.’

Sesusi wati vala manee okupopia, aende no keulu, ahikwa nekaka. Ovalongwa vae otyo vatala peulu, mahi avehemumono vali.

Ovalongwa avatundu Komphunda Yomindyambi, avaende noko Selusalei. Ankho apeho veliongiya mondywo imwe otyo velikwambela. Avakevelela Sesusi eye vali evelongese etyi mavalingi.