Tavela Otyilinga Siovaa Apa Kilisitu

“KONTHYIMBI Huku watunga omaulu, nohi,” ‘atyiho alinga, ankho otyiwa unene.’ (Ehim. 1:1, 31) Etyi Siovaa atunga ovanthu, ankho uvehandela vala ovipuka oviwa. Mahi etyi ovo Andau na Eva vehetavelele ku Huku, ovipuka avityopoka. Ovanthu pahe vetupu vali ehambu. Mahi etyi Siovaa ankho ahandela ovanthu katyapilulukile. Wapopia okuti ovana va Andau vokutavela, mekeveyovola. Ovanthu aveho mavakafenda vala Huku. Vana vokulinga ovipuka ovivi mavakahanywa-ko. (Ehim. 3:15) Ovipuka aviho mavikakala vali nawa. Siovaa makatuma omona wae Sesusi Kilisitu, alinge ovipuka ovio aviho. (1 Swau 3:8) Otyo naina twesukisila okunoñgonoka otyilinga Huku apa Kilisitu. — Ovil. 4:12; Fili. 2:9, 11.

OTYIPI OTYILINGA TYA KILISITU?

² Ine tunoñgonoka otyilinga Huku apa Kilisitu, matunoñgonoka okuti katyike-ko vala. Sesusi tyati umwe oe Omuyovoli wovanthu, oe Omunene-nakwa, oe Omutwe Wewaneno, ya pehepano pahe Ohamba yakoywa na Siovaa ukahi nokutumina keulu. Tyina tusoka umwe nawa kovilinga Sesusi Kilisitu ena, tupandula unene Siovaa, Sesusi atumuhumbu vali unene. Ombimbiliya ipopia umwe nawa ovilinga vimwe Sesusi alinga.

³ Etyi Kilisitu ali pano pohi, tyamonekele umwe nawa okuti ovanthu vana vokutavela vapondola okukala omapanga a Huku. (Swau 14:6) Sesusi Omuyovoli mokonda wankhia opo ayovole ovanthu ovanyingi-nyingi. (Mat. 20:28) Sesusi hamunthu vala walingile ovipuka vihambukiswa Huku, mahi omunthu umwe una otyilinga tyimwe otyinene. Aluho twakala vali omapanga a Huku, otyetyi etunkhila. (Ovil. 5:31; 2 Kol. 5:18, 19) Mokonda yeetyi Sesusi ankhia atutiliswa, ovanthu aveho vokutavela ku Huku mavakapewa oviwa ovinyingi putyina Sesusi amahimbika okutumina pano pohi.

⁴ Tupu Sesusi Omunene-nakwa wetu. ‘Utweetehila-mo okankhenda tyina atala okwayengenga kwetu.’ Tyina twamalingi onkhali atulivele, utwiitilako ku Huku opo etupolelepo. Omutumwa Paulu wapopile okuti: “Onthwe omunene-nakwa tunae, hakuti omunthu wahametweetehila-mo onkhenda tyina atala okwayengenga kwetu, mahi onthwe tuna una wakondya-kondya-le novipuka aviho ngoonthwe, mahi wehena onkhali.” Etyi apopia onondaka ombo, pahe apopi etyi ovanthu vayumba onthumbi mu Sesusi vena okulinga opo vapameke oupanga wavo na Huku. Watile: “Naina, tufwenei kotyipundi tyounene tyokankhenda okanene tyehena-le otyinkhe pokupopia, opo tutambule onkhenda, atuvasi okankhenda okanene maketukwatesako momuvo watamo.” — Hemb. 4:14-16; 1 Swau 2:2.

⁵ Sesusi Omutwe wewaneno. Ovalanduli va Kilisitu kohale ankho vetupu omutumini. Noonthwe hono tutupu omutumini pano pohi. Tuna ovanthu pano pohi vetupopila etyi tuna okulinga, mahi ovipuka aviho vetupopila, vitunda komutumini wetu Sesusi Kilisitu. Ovanthu ovo vetuyunga umwe nawa mokonda mavakapulwa na Siovaa. (Hemb. 13:17; 1 Pet. 5:2, 3) Siovaa pokupopia otyilinga tya Sesusi watile: “Talei! Nemulinga ombangi kovanthu vovilongo, nemulinga onkhalamutwe, nemulinga omutumini wovanthu vovilongo.” (Isa. 55:4) Onondaka ombo mbapopile Siovaa ambulifwilapo umwe etyi Sesusi apopila ovalanduli vae okuti: “Mwahatiwei vatumini, Omutumini wenyi wike vala, o Kilisitu.” — Mat. 23:10.

⁶ Sesusi tyili wahanda umwe okutukwatesako. Tala vala etyi apopia, wati: “Endywei no kwaame, endywei amuho onwe vokwepwila, vokuli nokututumba nomitengi, ame ndyimupepulule. Lipandekei okanga yange, amulilongesila kwaame, ame ndyindalawa, napepuka omutima, endywei mupululukwe. Okanga yange yapepuka, omutengi wange kawalemene.” (Mat. 11:28-30) Sesusi utekula nawa ewaneno, una okankhenda, utupepulula. Naina Sesusi “omunthita omuwa,” uhetekela umwe nawa Tate yae, Siovaa Huku. — Swau 10:11; Isa. 40:11.

⁷ Momukanda wo tete Paulu ahonekelele ova Kolindu, wapopile umwe nawa otyilinga otyikwavo tya Kilisitu. Watile: “Ngwe malingi ohamba, atumina atee Huku apaka onondyale mbae ambuho mombwelo yonomphai mbae. Mahi tyina ovipuka aviho viamahulu kolutei lwae, pahe Nomona nae akala vala kolutei lwo Ou wemupakulilile ovipuka aviho, pahe Huku ngae mwene utumina ovipuka aviho.” (1 Kol. 15:25, 28) Sesusi oe watetekela okutungwa kovipuka aviho. Etyi eheneye pano pohi, vaundapele na Siovaa pokutunga ovipuka, ankho “omuundapi omunongo.” (Omih. 8:22-31) Etyi pahe Siovaa emutuma pano pohi, Sesusi alingi umwe vala etyi Siovaa ahanda. Namphila amonesilwe ononkhumbi, mahi wakoleleyile, ahayeke-po Tate yae. (Swau 4:34; 15:10) Mokonda Sesusi kayekele-po Tate yae, etyi ankhia Siovaa emututilisa, emutwala keulu, emulingi Ohamba. (Ovil. 2:32-36) Mokonda Kilisitu Sesusi pahe Ohamba, wapewa otyilinga otyinene tyokukahongolela onoandyu putyina vamakahanya-ko ovatumini, nonondingavivi. (Omih. 2:21, 22; 2 Tes. 1:6-9; Ehol. 19:11-21; 20:1-3) Tyina ovatumini aveho vamakahanywa-ko, mapekesala vala Kilisitu, ohamba Youhamba wa Huku. — Ehol. 11:15.

OITYI OMUNTHU WOKUTAVELA KU KILISITU ALINGA?

⁸ Sesusi Kilisitu utupu onkhali. Oe wapewa otyilinga tyokutuyunga. Sesusi omunthu una olwembia, una okankhenda, mahi metuyungu vala ine katuyekepo Siovaa. Tuna vala okulandula eongano lya Siovaa, oku lienda nako noonthwe ngako twenda nako.

⁹ Ovalanduli va Kilisitu kohale ankho vei umwe nawa otyilinga otyinene Kilisitu apewa na Huku. Otyo vetyilekesa umwe nawa mokonda ankho vetavela etyi vapopilwa, ankho vetavela ku Sesusi. (Ovil. 15:12-21) Omutumwa Paulu wapopile okuti ovanthu aveho mewaneno vesukisa okulikwatapo. Watile: “Onthwe tutiei onthwe tupopia umwe otyili, onthwe tukula movipuka aviho, atulingi volwembia, tuhike ku Kilisitu, omutwe. Olutu aluho luli umwe nokutokaikilwa mwe, alululikwa umwe nawa lupamene apa lwatokaikilwa. Tyina aviho vyo kolutu tyiti umwe etyi tyiundapa nawa, etyi tyiundapa nawa, olutu lukula, otyo tupu lulitunga molwembia.” — Efe. 4:15, 16.

¹⁰ Tyina atuho mewaneno tulivila umwe nawa, atuundapela kumwe, atutavela omutumini wetu Sesusi Kilisitu, ewaneno likula, alipame, atuho atulikwatepo umwe. — Swau 10:16; Kolo. 3:14; 1 Kol. 12:14-26.

¹¹ Ovipuka vili nokumoneka mouye Ombimbiliya ankho yevipopia-le, ya vilekesa umwe nawa okuti Sesusi Kilisitu walinga-le Ohamba mo 1914. Sesusi ukahi-ale nokutumina pokati konondyale mbae. (Ovii. 2:1-12; 110:1, 2) Apa kapii Sesusi makahanyako onondyale mbae ambuho, atyimoneka umwe okuti oe Ohamba yonohamba, o Tatekulu yovo tatekulu. (Ehol. 11:15; 12:10; 19:16) Pahe etyi Siovaa ahandele ponthyimbi, metyilingila vana vahula kokulio kwa Kilisitu, ava ahambukilwa! (Mat. 25:34) Tyituhambukiswa unene okunoñgonoka otyilinga Siovaa apa Kilisitu. Tulikwatei-po na vakwetu tulinge ovilinga vina okulingwa mouye auho kononthiki mbuno mbokwehulila.