Vaonganekwa Valinge Ovilinga vya Siovaa

MOUYE auho, muna ovanthu ovanyingi vonongeleya, no vopulitika, no vokulinga ononiñgoso vaonganekwa, mahi evi valinga neevi vahanda, neevi vasoka, neevi vapopia, vielikalela unene no vya vakwavo. Mahi kuna ovanthu vamwe vaonganekwa nawa, velikalela unene novanthu ovo aveho. Ondaka ya Huku ivepopia nawa okuti Onombangi mba Siovaa.

² Ove wetuhambukiswa unene etyi weya meongano lya Siovaa. Welimonenako umwe mwene kweetyi Siovaa ahanda, pahe otyo umwe ukahi nokulinga. (Ovii. 143:10; Loma 12:2) Noove ukahi nokulingila Huku, welipaka kumwe no Nombangi mba Siovaa velihole, vavasiwa mouye auho. (2 Kol. 6:4; 1 Pet. 2:17; 5:9) Ondaka ya Huku ipopia okuti ovanthu vemulingila, vati umwe ovo vamona oviwa ovinyingi, ovo vena ehambu. (Omih. 10:22; Malu. 10:30) Ine ulikwatehila ulinge etyi Siovaa ahanda, komutwe wandyila mokamona oviwa ovinyingi, okamona umwe nomwenyo wahapu. — 1 Tim. 6:18, 19; 1 Swau 2:17.

³ Siovaa Huku oe Omutungi wetu. Otyipuka aonganeka ovipuka pano pohi, nawike utyivila. Otyo tyilekesa okuti ovipuka aonganeka mwene vili peke liae, oe ululika ovanthu aveho. Onthwe tumuyumba umwe onthumbi. Siovaa oe Omukoyesi wetu, oe Utulingila ovitumino, oe Ohamba yetu. (Isa. 33:22) Mokonda Siovaa woonganeka nawa ovipuka, ovipuka uvilulika umwe nawa opo ‘tuundapele kumwe nae’ mweetyi ahanda. — 2 Kol. 6:1, 2.

⁴ Tyina onthyulilo ifwena popepi, onthwe katutalama twenda no komutwe, mokonda uli nokutululika o Kilisitu Sesusi, Ohamba twanakelwa. (Isa. 55:4; Ehol. 6:2; 11:15) Mwene Sesusi nae wetyipopile ati ovalanduli vae mavalingi ovilinga ovinene vali kweevi alingile etyi ali pano pohi. (Swau 14:12) Otyo ankho matyeende ngootyo, mokonda ovalanduli vae ankho mavalingi vali ovanyingi, tyina pamakala, avaivisa mouye auho otyo veliyawisa. Ankho mavaivisa oviwa ovipe Viouhamba atee konohika mbokokule-kule kombanda yoohi. — Mat. 24:14; 28:19, 20; Ovil. 1:8.

⁵ Otyo, otyo umwe hono tuna nokulinga. Mahi ngeetyi Sesusi apopile, Siovaa wanaka onthiki oviwa ovipe viahamapopiwa vali. Omaulo apopiwa Mondaka ya Huku, alekesa umwe okuti onthiki ya Siovaa itilisa owoma, ili umwe popepi. — Sowe. 2:31; Sof. 1:14-18; 2:2, 3; 1 Pet. 4:7.

⁶ Mokonda pahe tutyeete tyahanda Siovaa kononthiki mbuno mbonthyulilo, otyiwa tulikwatehile umwe tulinge etyi etupopila. Otyo tyahandela okunoñgonoka nawa oñgeni ovipuka meongano lya Siovaa vilingwa, noonthwe ngamo umwe tuvilingila. Atyiho eongano lya Huku lilinga tyitunda Mondaka yae Ombimbiliya, mwati umwe nonondunge, nondongeso ituviyula, novitumino. — Ovii. 19:7-9.

⁷ Tyina ovanthu va Siovaa vakakatela umwe movitumino vi’Ombimbiliya, vetyivila okukala kumwe, avaundapela kumwe tyelikwatapo nawa. (Ovii. 133:1; Isa. 60:17; Loma 14:19) Oityi tyitwala ovafendi va Siovaa mouye auho kokulikwata-po? Olwembia. Ovipuka tulinga, tuvilingila okuhole vakwetu. (Swau 13:34, 35; Kolo. 3:14) Keulu ovipuka viaonganeka nawa. Noonthwe tyina tulikwatapo ngeetyi Huku ahanda, twonganekwa nawa.

OÑGENI OVIPUKA KEULU VIAONGANEKWA?

⁸ Omuuli Isaiya, na Isekiyele na Ndaniyele vamwene oñgeni ovipuka keulu viaonganekwa. (Isa. okapitulu 6; Isek. okapitulu 1; Ndan. 7:9, 10) Omutumwa Swau nae wamwene eongano lya Siovaa keulu, ya momukanda Eholololo wapopia-mo oñgeni ankho likahi. Wamwene Siovaa upumphi kotyipundi tyomunkhima waongelelwa nonoandyu, mbukahi nokupopia okuti: “Omusukuki, omusukuki, omusukuki o Siovaa Huku, Wokuvila Atyiho, ou wali-ko, uli-ko, uli nokuya.” (Ehol. 4:8) Swau tupu wamwene ‘ondyona itai . . . pokati potyipundi tyounene.’ Ondyona oyo, o Sesusi Kilisitu. — Ehol. 5:6, 13, 14; Swau 1:29.

⁹ Mokonda Swau wamwene Siovaa upumphi kotyipundi tyounene, otyo tyilekesa okuti Siovaa oe wakalela komutwe eongano liae. Ombimbiliya ipopia umwe nawa okuti Siovaa Omunene. Omukanda 1 Ehipululo 29:11, 12 wati: “Siovaa, ounene owove, nevililo, nouwa, nomunkhima, noukulami, mokonda atyiho tyili keulu no kombanda yohi, otyove. Siovaa, ouhamba owove, ove Umutwe wa aveho. Omalumono nomunkhima vitunda kwoove, ove utumina atyiho. Pomavoko ove pena ononkhono nevililo, tupu pena evililo liokunkhimaneka, nokupameka aveho.”

¹⁰ Sesusi na Siovaa vaundapela kumwe, ya Siovaa wemwavela otyilinga tyimwe otyinene keulu. Ombimbiliya ipopia okuti Huku “ovipuka aviho wemupakulila-vio vikale mombwelo yonomphai mbae, wemulinga omutwe wovipuka aviho viayemba kewaneno.” (Efe. 1:22) Paulu wapopia ovipuka vimwe viayemba ku Sesusi, ati: “Otyo Huku emuvialekela emupake kounene, mokankhenda kae emupe enyina enene vali komanyina atyo aeho, opo onongolo ambuho mbulipetamene kenyina lya Sesusi — tyilinge ava veli keulu, tyilinge ava veli kombanda yohi, tyilinge ava veli mombwelo yeheke — omalaka aeho anoñgonoke umwe okuti Sesusi Kilisitu oe o Tatekulu, mape omunkhima Huku, Tate.” (Fili. 2:9-11) Otyo tyitukalesa nonthumbi yokuti mwaina Sesusi metuhongolela nawa.

¹¹ Nthiki imwe, omuuli Ndaniyele wamwene Omukulu Wononthiki, upumphi kotyipundi tyae keulu. Amono onoandyu “ovityita-novityita, [mbuli] nokumulingila, ovityita omakwii-nomakwii, vetai komutwe wae.” (Ndan. 7:10) Ombimbiliya ipopia okuti onoandyu ombo ononyingi, “mbulinga ovilinga vikola, mbutumwa mbuundapele ava mavakapewa eyovo.” (Hemb. 1:14) Onoandyu ombo ambuho mbaonganekwa nawa, tyati umwe ombu mbuna otyilinga tyambo, ombu mbuna otyilinga tyambo. — Kolo. 1:16.

¹² Ine tusoka umwe nawa kovipuka evi twapopia, vipopia oñgeni eongano lya Siovaa likahi keulu, noonthwe matukala ngeetyi tyakalele Isaiya, wamwene “Siovaa upumphi kotyipundi tyomunkhima tyaya peulu,” ya “keulu liae kuna ono selafii.” Etyi Isaiya amona otyipuka otyo, ati: “Tatiei! Ame nankhia-le, ame ndyimunthu vala womilungu viasila, ndyikala vala pokati kovanthu vena omilungu viasila. Mahi sokako omaiho ange amona Ohamba Siovaa womambamba ovita!” Isaiya mokwamona okuti eongano lya Siovaa keulu naina enene, atyimuhuvisa unene, etyimono okuti naina utupu-ale apa elifwe. Otyipuka otyo Isaiya amwene nii ehetyilimbwa. Etyi eiva Siovaa upopia, uli nokwovola omunthu matumu akapopile ova Isilayeli vehetavela okuti mavahanywako, Isaiya ati: “Ame uno! Nthume!” — Isa. 6:1-5, 8.

¹³ Onthwe tupandula unene Siovaa wetweeta meongano liae. Tyina tupewa otyilinga tyimwe, tulinga ngeetyi tyalingile Isaiya. Onthwe tulinga etyi tyipopia eongano lya Siovaa. Oku lienda nako, noonthwe oko umwe tuviuka. Tuyumba umwe onthumbi meongano lya Siovaa.

EONGANO LYA SIOVAA KALITAI

¹⁴ Mokapitulu ko tete komukanda wa Isekiyele, mwapopiwa Siovaa uli keulu, ukahi nokutaha etuku-tuku limwe enene. Etuku-tuku olio enene, eongano lya Siovaa keulu liahamonwa. Siovaa mokutaha etuku-tuku olio, ulitaha umwe vala nawa, tupu uliviukisa oku mwene ahanda. — Ovii. 103:20.

¹⁵ Omalola etuku-tuku olio, mokati kao muna omalola omakwavo, mahi elifwe vala. Otyo Ombimbiliya ipopila okuti tyina omalola oo aenda “etei vala oku amaviuku, kononthele ambuho ononkhwana kaelipondo vali.” (Isek. 1:17) Namphila omalola atyo etei vala oku amaviuku, otyo katyilekesa okuti etuku-tuku liatyo litupu omutahi. Omutahi wetuku-tuku olio o Siovaa, ngwe kayeke etuku-tuku liende vala nooku liahanda. Isekiyele 1:20 ipopia okuti: ‘Lienda vala nooku omphepo yamelitahela.’ Naina, Siovaa ululika eongano liae nomphepo yae ikola, elitwala nooku ahanda. Otyiwa tulipule okuti: ‘Okuti ndyikahi umwe nokweendela kumwe neongano lya Siovaa?’

¹⁶ Okweendela kumwe neongano lya Siovaa, hakwenda vala komaliongiyo, nomovilinga viokwivisa. Mahi okukula motyili, okupameka oupanga wetu na Siovaa, nokunoñgonoka ‘umwe nawa evi viesukisa vali,’ nokutanga omikanda tupewa neongano tunoñgonoke nawa ovipuka. (Fili. 1:10; 4:8, 9; Swau 17:3) Tuna okuhinangela okuti apa pena ovipuka viaongana nawa petupu ombwandya, ya ovanthu velivila umwe nawa. Ovipuka tuvila okulinga, neevi tuna-vio, nononkhono tuna-mbo, nomuvo wetu, aviho ovio twevipewa na Siovaa. Naina otyiwa twahanyane novipuka ovio, tuundapele navio Siovaa. Tyina tweendela kumwe netuku-tuku lya Siovaa, opo tukahi nokulinga ngeetyi tulongesa ovanthu movilinga viokwivisa.

¹⁷ Eongano lya Siovaa litukwatesako tulinge etyi ahanda. Wahalimbweko okuti Omutahi wetuku-tutu o Siovaa. Naina, tyina tweendela kumwe netuku-tuku olio, tulekesa okuti tuna onthilo na Siovaa, tupu tumuyumba onthumbi. (Ovii. 18:31) Ombimbiliya ipopia okuti: “Siovaa makaavela ovanthu vae ononkhono. Siovaa makayamba ovanthu vae nombembwa.” (Ovii. 29:11) Mokonda noonthwe tuli umwe meongano liae, tupewa ombembwa nononkhono. Tyina tulikwatehila tulinge etyi Siovaa ahanda, matupewa oviwa ovinyingi pehepano, no komutwe wandyila.