Evi Viapotoyolwa

Opala Ovohe Onombangi mba Siovaa:

Mokonda ove uhole ovana vove, wahanda okuvekwatesako okuhumba Siovaa avelipakula kwe. Mahi oityi upondola okulinga uvekwateseko vehike kokumbatisalwa? Oñgeni motyimono okuti pahe vapondola okumbatisalwa?

Sesusi wapopilile ovalanduli vae okuti: “Kalongesei ovanthu vomihoko aviho valinge ovalongwa vange, amuvembatisala.” (Mat. 28:19) Naina opo omunthu ambatisalwe, tete una okukala omulongwa wa Kilisitu. Una okunoñgonoka nawa evi Sesusi alongesile, evitavela, aendela-mo. Otyo otyipuka ovanthu aveho vevila okulinga, novana ovatutu.

Longesa ovana vove ovitumino vya Siovaa, noove oendela-mo opo vatalele kwoove. (Epal. 6:6-9) Velongesa momukanda Kalako Nomwenyo Apeho! vanoñgonoke ovitumino vi’Ombimbiliya, avamono umwe nawa omokonda yatyi otyiwa okwendela-mo. Velongesa oñgeni mavapopila ovanthu etyi vetavela, mahi monondaka mbavo mwene. (1 Pet. 3:15) Ovipuka movelongesa, neevi mwene mavanoñgonoka m’Ombimbiliya, neevi mavanoñgonoka mefendelo liombunga, no komaliongiyo, mavivekwatesako okukula motyili, avambatisalwa. Nomapanga avo mewaneno mavevekwatesako. Kwatesako ovana vove vasoke oñgeni mavapameka apeho oupanga wavo na Siovaa, neetyi mavalingi meongano liae.

Omukanda Omihe 20:11 wati: “Nomona vala omututu, evi alinga vipopia etyi atuhiwa, ovituhiwa viae vipenge-penge viviuke-viuke vitalelwa kweetyi alinga.” Ovipuka patyi omona wove alinga vilekesa umwe okuti omulongwa wa Sesusi Kilisitu, pahe upondola okumbatisalwa?

Omona una oupanga wapama na Huku, wahanda okumbatisalwa una okutavela ko vohe. (Ovil. 5:29; Kolo. 3:20) Ombimbiliya ipopia okuti Sesusi etyi ena omanima 12 ‘ankho utavela ko [vohe].’ (Luka 2:51) Pamwe omona wove mapengesa umwe. Mahi una uhanda okumbatisalwa una umwe okulikwatehila alinge ovipuka ngeetyi Sesusi ankho alinga, ovanthu avetyimono umwe okuti utavela ko vohe.

Una wahanda okumbatisalwa una okulekesa okuti wesuka umwe nokuñgonoka etyi Ombimbiliya ipopia. (Luka 2:46) Okuti omona wove utyihole umwe tyokwenda komaliongiyo? Momaliongiyo oo utyihole tyokwaava omakumbululo? (Ovii. 122:1) Utyihole umwe tyokutanga Ombimbiliya nokulinga elilongeso liae lioulike? — Mat. 4:4.

Omona wokuna oupanga wapama na Huku wahanda okumbatisalwa, ulinga ononkhono mbokupaka ovilinga vya Huku pomphangu yo tete. (Mat. 6:33) Utyii okuti una okupopila ovanthu etyi ekahi nokulilongesa m’Ombimbiliya. Uundapa umwe unene movilinga viokwivisa, utupu ohonyi yokupopila ava alongeswa navo novalongesi vae okuti Ombangi ya Siovaa. Tyina amapewa onthele meliongiyo liomokati kosimanu wiilinga umwe nawa.

Tupu kalingi oupanga novanthu vana vahalingi etyi Huku ahanda, mokonda uhanda okukala tyasukuka. (Omih. 13:20; 1 Kol. 15:33) Otyo tyimoneka nawa movipuka alinga, noviimbo atehelela, novipuka atala mo televisau nomo internete.

Ovana ovanyingi vambatisalwa-le pweetyi ovatutu, mokonda vetavela nomutima auho otyili valongeswa novohe. Noove ine ulikwatehila umwe okwatesako ovana vove, Siovaa mekuyambe, navo avehiki kokumbatisalwa.

Opala Omwivisi Wehenembatisalwe:

Ove pahe umwivisi wehenembatisalwe. Twahambukwa unene mokonda una oupanga wapama na Huku, wahanda okumbatisalwa. Okulilongesa Ombimbiliya tyekukwatesako okunoñgonoka Siovaa nokuyumba onthumbi mweetyi makalinga komutwe wandyila. — Swau 17:3; Hemb. 11:6.

Etyi nkhele wehenelilongese Ombimbiliya no Nombangi mba Siovaa, hamwe ankho uli-ale mongeleya imwe, oo hamwe kuli-ko mongeleya naike. Tupu tyipondola ankho ulinga ovipuka vimwe vilipona novitumino vya Huku. Mahi pahe etyi wanoñgonoka umwe nawa etyi Ombimbiliya ipopia, olivele, ovipuka ovivi ankho ulinga weviyekapo. Okulivela, okuyekapo ovipuka ovivi ankho ulinga kohale. Okupiluluka, okuyala ovipuka ovivi ankho ulinga oviyeke-po, pahe oti umwe okutuka hono mandyilingi vala evi vihambukiswa Huku. — Ovil. 3:19.

Tupu hamwe kwalingile otyipuka natyike otyivi unene mokonda hamwe wanoñgonoka-le otyili “nkhele tya poututu.” (2 Tim. 3:15) Mokonda kuhande okunumanesa Siovaa, welikwatehila umwe ohetavela okuhongiliywa na vana mulongeswa navo. Ove ulekesa okuti uyumba onthumbi mu Huku mokonda uyakulila otyili nokupopila vakwenyi etyi welilongesa m’Ombimbiliya. Tupu ulongeswa nawa oñgeni mopopi novanthu movilinga viokwivisa nokuvelongesa Ombimbiliya. Pahe oiti okuti wahanda okukala omwivisi.

Tyilinge wanoñgonoka vala Siovaa etyi wekula-le, tyilinge opweetyi nkhele umututu, tyafwile pahe ukahi nokusoka okulipakula ku Huku ombatisalwa. Okulipakula okulikwambela, opopila Siovaa okuti okutuka hono ove vala mandyilingila. (Mat. 16:24) Pahe tyina umbatisalwa tyilekesa okuti welipakula-le ku Siovaa. (Mat. 28:19, 20) Tyina wamelipakula ombatisalwa opo pahe utiwa umwe Umbangi ya Siovaa. Otyipuka otyo otyiwa unene ngatyi!

Mahi pokulilongesa Ombimbiliya wanoñgonoka umwe nawa okuti noove upondola okukala novitateka. Hinangela okuti etyi Sesusi ambatisalwa, “atwalwa moluhandya nomphepo ikola akalolwe n’Eliapu.” (Mat. 4:1) Noove tyina wamambatisalwa okala omulongwa wa Kilisitu, upondola okukala novitateka ovinyingi mavihande okunyona onthumbi yove mu Siovaa. (Swau 15:20) Ovitateka ovio matyiti umwe etyi tyityatyo, etyi tyityatyo. Vamwe mombunga yove vapondola okukuyala mokonda pahe ulilongesa Ombimbiliya. (Mat. 10:36) Tupu ava mulongeswa navo ine ava uundapa navo nomapanga ove okohale, vapondola okukulinga omukwele mokonda yokulilongesa Ombimbiliya. Apeho hinangela etyi Sesusi apopia tyivasiwa mu Maluku 10:29, 30, wati: “Ame ndyimupopila umwe, nawike wasa-po eumbo liae, onondenge mbae novakulu vae, onomphange mbae, hamwe wasa-po ovo he na ina, hamwe ovana vae, nomapia ae kombanda yange, kombanda yoviwa ovipe, wahamapewa mononthiki mbuno ovinene vali pu ovio vilamba 100 — omaumbo, onondenge novakulu, nonomphange, ovo ina, novana, nomapia, nononkhumbi mbatyo — omu mouye ukeya, akamona omwenyo wahapu.” Naina likwatehila upameke oupanga wove na Siovaa, nokukakatela movitumino viae viaviuka.

Ine wahanda okumbatisalwa popia nomukulu wokululika ovakulu vewaneno. Mavatomphola noove omapulo avasiwa pefo 185 opo vatale ine upondola umwe okumbatisalwa. Upondola okuhimbika okulilongesa omapulo oo awike.

Taindya omuvo wokulilongesa nawa omapulo oo, otange umwe nawa onotesitu ambuho mbuli-po. Ine una tyimwe wahanda okuhoneka, upondola okuhoneka umwe momukanda ou opo tyina muya pokulilongesa novakulu vewaneno opopi novipuka ovio wahoneka. Ine una tyimwe wahanoñgonokele nawa pokulilongesa, upondola okupula ku una ukulongesa okuti hatyo opulu umwe kovakulu vewaneno.

Tyina ovakulu vewaneno vamekupulu tyimwe pokulilongesa, kwesukisile okupopia ovipuka ovinyingi. Kumbulula vala etyi vekupula monondaka mbehehi oheliseta-seta, otyipopila omu ove wetyinoñgonokela. Putyina uti pokukumbulula, otyiwa upopie otesitu ike ine onombali mbutyipopia.

Ine ovakulu vewaneno vamona okuti nkhele ovipuka vimwe vipopia Ombimbiliya kwevinoñgonokele nawa, mavekupopila okuti nkhele kumambatisalwa. Mavekukwatesako nkhele utwaleko nokulilongesa Ombimbiliya wiinoñgonoke umwe nawa otyivili okuhangununa ovipuka monondaka mbove, pahe ombatisalwa nawa.

[Opala ovakulu vewaneno: Etyi mamulingi tyina omunthu amemupopila okuti nahanda okumbatisalwa, tyahonekwa pefo 208 atee pefo 212.]