Evi Ovakulu Vewaneno Mavatomphola Novanthu Mavambatisalwa

Ovanthu vambatisalwa movionge vyo Nombangi mba Siovaa. Una walinga elongomona liombatisimu tyina ati pokumanuhula wiita vana mavambatisalwa vakatuke avakumbulula nondaka imwe yaya peulu omapulo aa evali:

1. Welivela-le ononkhali mbove, welipakula-le ku Siovaa, ya utavela okuti Siovaa watuma Sesusi Kilisitu opo etuyovole?

2. Utyii okuti nga wambatisalwa, ngootyo mokala Ombangi ya Siovaa, ovalulilwa meongano liae?

Tyina ovanthu mavambatisalwa vati “yoo,” ngootyo veli nokupopila ovanthu aveho okuti vayumba onthumbi mweetyi Sesusi etulingila, ya velipakula-le ku Siovaa. (Loma 10:9, 10) Tyina nkhele onthiki oyo yehenehike-po, vena okusoka umwe nawa komapulo oo, avelikwambela ku Siovaa, opo tyina vapulwa vakumbulule umwe etyi tyili momutima wavo.

Welipakula-le ku Siovaa, omupopila okuti oe vala mofende, ya molingi vala ovipuka ahanda?

Wahanda umwe okumbatisalwa, otyo umwe tyili momutima wove?

Ovikutu patyi omunthu ena okuvala tyina ambatisalwa? (1 Tim. 2:9, 10; Swau 15:19; Fili. 1:10)

Tuna okuvala nawa, “lwonthilo, lwonondunge,” tulekese okuti tuna ‘onthilo na Huku.’ Naina, omunthu mambatisalwa kapondola okuvala ovikutu ovisupi, neevi viatona unene, neevi vimonekela, neevi viahonaikwa. Una okuvala ovikutu viasukuka, vitavela umwe okwenda povanthu.

Oityi omunthu ahalingi tyina ambatisalwa? (Luka 3:21, 22)

Ovanthu va Siovaa tyina vambatisalwa vena okulinga ngeetyi tyalingile Sesusi. Sesusi ankho utyii okuti okumbatisalwa otyipuka tyimwe otyinene, tyahanyanwa natyo, wetyilekesa umwe movipuka apopile no mweevi alingile. Noove linga nga Sesusi, wahatie tyina umbatisalwa nkhele oende mokuyoa no mokunyana vala. Namphila okumbatisalwa tyihambukiswa umwe, mahi wahalinge ngatyina welipwako. Linga omunthu wonondunge, hambukwa umwe mahi wahalambese.

Oñgeni okwenda apeho komaliongiyo, nokukala na vakwenyi matyikukwatesako okulinga etyi wapopila Siovaa monthiki welipakula kwe?

Omokonda yatyi otyiwa okulilongesa Ombimbiliya nokwenda apeho movilinga viokwivisa, na tyina umwe wambatisalwa-le?

OPALA OVAKULU VEWANENO

Tyina omwivisi amemupopila okuti wahanda okumbatisalwa, mupopilei akatange pana pati “Omapulo Alingwa Vana Vahanda Okumbatisalwa,” pefo 185-207. Tupu mupopilei akatange pefo 182 pana pati “Opala Omwivisi Wehenembatisalwe,” opo tyina vakatomphola novakulu vewaneno nae weei-ale nawa. Tyina vakatomphola novakulu vewaneno, nae mwene ukala nomukanda wae, ine una vimwe ahoneka upondola okuvipopia. Mahi katyisukisa omunthu umwe emutaleseko ine etyi mapopi tyikahi umwe nawa.

Tyina omunthu ahanda okumbatisalwa, una okutyipopila omululiki wovakulu vewaneno. Nga atanga pana pokwati “Omapulo Alingwa Vana Vahanda Okumbatisalwa,” omululiki wovakulu vewaneno memupulu ine welipakula-le ku Siovaa, wahanda umwe okulinga etyi Siovaa ahanda. Ine omunthu welipakula-le, omululiki wovakulu vewaneno mapopila ovakulu vewaneno vevali vatomphole nae pana pokwati “Omapulo Alingwa Vana Vahanda Okumbatisalwa.” Matyiti ou utomphola nae onthele imwe, ou utomphola nae onthele onkhwavo. Vapondola umwe okutomphola nae naapa ewaneno liehenepopilwe-ale onthiki mavalingi otyonge.

Pokutomphola ononthele ombo, vapondola okukala-po oola ike, mahi tyitupu tyimwe ine vakala-po vali ehimbwe. Pokuhimbika no pokumanuhula, velikwambela. Pokutomphola, tyilinge omukulu wewaneno tyilinge ou wahanda okumbatisalwa kavapondola okulumbana vala. Ovakulu vewaneno namphila vena ovilinga ovinyingi, vapondola okusapo ovilinga viavo, nkhele avalingi vala etyi.

Otyiwa okuti amutomphola nou, amutomphola nou. Tyina omunthu akumbulula, mamutyivili okutala nawa ine wanoñgonoka umwe etyi Ombimbiliya ilongesa, ine upondola umwe okumbatisalwa. Nomunthu watyo kamankhi ohonyi, mapopi umwe nawa. Mahi vokwelinepa vapondola okukala aveho tyina vati pokulilongesa.

Tyina omunthu wahanda okumbatisalwa omuhikwena, vena okupumphama apa pamoneka, mahi vena okukala apa veete okuti ovanthu kamaveivi etyi veli nokupopia. Ine omukulu wewaneno maende-ko utala okuti hahe vende-ko vevali, upondola okwenda nomukulu wewaneno mukwavo oo omukwatesiko wovakulu vewaneno.

Ine mewaneno mutupu ovakulu vewaneno ovanyingi, omukwatesiko wovakulu vewaneno wata-mo, una onondunge, utyivila okupunga nawa ovipuka, upondola okulilongesa nomunthu wahanda okumbatisalwa pana pokwati “Onthele 1: Etyi Ovanthu va Siovaa Vetavela.” Mahi “Onthele 2: Evi Omunthu wa Huku Alinga,” ina vala okulingwa nomukulu wewaneno. Mahi ine mewaneno mutupu ovakulu vewaneno ovanyingi, novakwatesiko vovakulu vewaneno vata-mo, vapondola okupopia nomutalelipo womawaneno, ngwe mataindya omunthu omukwavo mewaneno ekwavo.

Ine omunthu wahanda okumbatisalwa nkhele omona, pokutomphola nae, ovo tate yae ine Onombangi, vena okukalapo (papondola okukala vala wike). Ine ovo tate yae kamavakala-po, opo pokutomphola nae pena okukala ovakulu vewaneno vevali (okuti hatyo, pena okukala omukulu wewaneno nomukwatesiko wovakulu vewaneno).

Ovakulu vewaneno vena okutala ine omunthu wahanda okumbatisalwa wanoñgonoka umwe nawa evi Ombimbiliya ilongesa. Tupu mavatale ine omunthu utavela umwe kweetyi Ombimbiliya ipopia, tupu utavela okuti eongano eli olia Siovaa umwe. Ine omunthu nkhele kanoñgonokele nawa evi Ombimbiliya ilongesa, ovakulu vewaneno mavemupopila okuti nkhele kumambatisalwa, avasoko etyi mavalingi vemukwateseko. Ovanthu vamwe pamwe nkhele kavanoñgonokele-ale oityi twesukisila okukaivisa, oityi tyesukisila okutavela kweetyi tupopilwa neongano lya Siovaa. Mokutomphola omu, ovakulu vewaneno vatala umwe nawa ine omunthu upondola okumbatisalwa. Pamwe tyiti mepulo eli vakala-mo ehimbwe, mweeli avahakala-mo ehimbwe, mahi vena okulinga omapulo atyo aeho.

Ovakulu vewaneno tyina vamatomphola onthele ya vali nomunthu wahanda okumbatisalwa, mavapopi ine upondola okumbatisalwa ine kapondola okumbatisalwa. Ovanthu tyati umwe ou ukahi ñgaa, ou ukahi ñgaa, ou watekulwa ñgaa ou watekulwa ñgaa. Vamwe vena ovipuka vehevili okulinga. Ovakulu vewaneno vena okusoka kovipuka ovio aviho pokutala ine omunthu upondola okumbatisalwa. Mahi etyi ovakulu vewaneno vesuka vali natyo okutala ine omunthu uhole umwe Siovaa, wanoñgonoka umwe nawa evi Ombimbiliya ilongesa. Atuho mewaneno tupondola okukwatesako vana mavambatisalwa vetyivile okulinga nawa otyilinga twapewa tyokupopila ovanthu oviwa ovipe.

Pahe, umwe povakulu vewaneno vatompholele nae oo aveho vevali umwe, mavakondoka-ko vekemupopile ine tyitavela ambatisalwe oo katyitavela. Ine vemuti mombatisalwa, ovakulu vewaneno mavatomphola nae pana pokwati “Evi Ovakulu Vewaneno Mavatomphola Novanthu Mavambatisalwa,” pefo 206-207. Ine omunthu ukahi nokulongeswa momukanda Kalako Nomwenyo Apeho!, ovakulu vewaneno mavemupopila eumanuhule nga ambatisalwa. Popilei omunthu mambatisalwa okuti onthiki mambatisalwa maihonekwa Pomukanda Womwivisi. Mupopilei okuti ovakulu vewaneno, enyina liae, nonthiki atyitwa, nonthiki ambatisalwa novipuka ovikwavo, vina umwe okuhonekwa pomukanda oo opo eongano lityivile okutala ovilinga Vionombangi mba Siovaa mouye auho. Otyikwavo opala nae haa etyivile okuundapa movilinga ovikwavo meongano, nokukwatesiwako apameke oupanga wae na Siovaa. Tupu ovakulu vahinangelesa ovaivisi vahimbika pahe ovilinga viokwivisa okuti, omanyina avo nomanima avo apakwa umwe nawa ngoomu mutyipopila evi vilulika Onombangi mba Siovaa mouye auho viyemba kokupaka nawa omanyina ovanthu nomanima avo, viapopiwa mo jw.org. Kavatomphola-le ehimbwe, onominutu 10 vala tyapwa.

Omunthu tyina ambatisalwa, nga pakala enima ovakulu vewaneno vatomphola nae vemupameke avemupopila etyi ena okulinga apame motyili, akale novilinga meongano. Umwe povakulu vewaneno mavatomphola nae, omukulu wotyikundyi tyae tyokwivisa. Ine nkhele omututu, novohe ine Onombangi, navo vena okukalapo (papondola okukala vala wike). Lina okukala etompho limwe likahi nawa, lipameka. Ovakulu vewaneno mavatale ine tundee apa omunthu ambatisalwa, uli umwe nokukula motyili. Mavemupopila ahayekepo okutanga Ombimbiliya nokulilongesa-yo umwe nawa, ahayekepo okulinga efendelo liombunga nokwenda komaliongiyo, nokwenda movilinga viokwivisa. (Efe. 5:15, 16) Ine omunthu oo omukanda Kalako Nomwenyo Apeho! keneumane, ovakulu vewaneno mavaovola omunthu memulongesa. Ovakulu vewaneno vena okutomphola nawa nae, avemupandula. Pamwe mavapopi oupuka umwe omunthu esukisa okulinga vali nawa, mahi kavapopi-ale unene.