EPULO 7

Oityi Mandyilingi Inkha Vanthyongilinya Okulala na Ame?

OMOKONDA YATYI TYAKOLELA

Omatokolo ulinga konthele youndalelapo apondola okunyona omuenyo vove.

**OITYI UNA OKULINGA?**

Soka kuetyi: Helena ankho velipola konomphunga na Mingo mokueenda kwo nohanyi onombali, mahi tyina velitala ongatyina velinoñgonokale kohale. Velihonekela mo telefone omuvo auho, vatomphola omuvo omunyingi motelefone tyina umwe apopia omukuavo utyiale etyi mukuavo mapopi! Mahi pahe Mingo kahande vala okutomphola.

Konthyulilo yo nohanyi onombali Mingo na Helena velikuata momankhanya liwa-liwa avelipe onombesu. Helena ankho kahande okulinga ngotyo. Tupu kahande okupumbwa Mingo. Ankho kavelitale vala okuti ovawa mahi tupu vakolela. ‘Ankho tupu upopia okuti onthue tulihole . . . ’

Ankho ove ukahi meti liokunepa iya okala motyitateka ngo tya Helena, ñgeno walinga ñgeni?

TALAMA IYA OSOKO!

Omunthu ukahi nokusekuna notyikutu ngatyina otyinyanga tyokusekuna — Otyinepo otyiawa Huku avela vala ovalinepi. Okulinga otyinepo tyopoula tyina nkhele uhenenepe tyilekesa okuti utupu onthilo na hekulu yotyinepo. Tyikahi ngo tyipuka tyimwe wapewa otyiwa ohetyipake nawa mahi onyane natyo.

Ankho katutavela ovitumino viohi, tyipondola okutuetela otyitateka. Tyelifwa notyo ankho katutavela ovitumino matyituetela ovitateka, tyimwe povitumino ovio tyati: “Kala kokule noundalelapo.”—1 Tessalonicenses 4:3.

Ovitateka patyi vitundilila kokuhetavela ovitumino? Ombimbiliya yati: “Una ulinga oumbalehi, ukahi nokulingila onkhali olutu lwae muene.” (1 Coríntios 6:18) Okuti otyo otyili?

Omaovololo alekesa okuti ovakuendye ovanyingi novahikuena valinga ngotyo, vakala novitateka evi viapopiwa pombuelo.

OLUIHAMO. Ovakuendye ovanyingi novahikuena valala kumwe tyina nkhele vehenelinepe konyima velivela unene.
OTYIHO. Tyina vamalala kumwe konyima velipula poyavo ‘olie tupu walala nae?’
OKULIVELA ONOMBEI. Omuhikuena ufueva omunthu umuamena ha youna uhanda vala okulala nae. Ovakuendye ovanyingi vapopia okuti kavahande okulinepa nomuhikuena alalae nae.
Okuhulililako: Inkha ulinga otyinepo tyopoula tyina nkhele uhenenepe, monumanesa ove muene nokupumbwa otyipuka tyimwe otyiwa. (Romanos 1:24) Nolutu luove malukala tyihena esilivilo!

Lekesa okuti wapama putyina “ukala kokule noundalelapo.” (1 Tessalonicenses 4:3)Tyina wamanepe opo vala upondola okulinga otyinepo tyopoula. Pahe opo upondola okuhakala vali notyiho, nokuhelivele onombei nokukala tyahapamene, otyitateka okulinga otyinepo tyopoula tyina nkhele uhenenepe.—Provérbios 7:22, 23; 1 Coríntios 7:3.

OITYI OVE USOKA?

Okuti omunthu okuhole upondola okupaka motyiponga omuenyo wove?
Okuti omunthu okuhole upondola okupaka motyiponga oupanga vove na Huku?—Hebreus 13:4.