EPULU 10
Oñgeni Ombimbiliya Ipondola Okunkhuatesako?
OITYI UNA OKULINGA?
Soka kuetyi: David ukahi nokutaha etukutuku potyilongo ehei. Mahi aimbuka okuti petapalo atalama kapapondola okutaamekwa etuku-tuku. Atale okuti waomba. Wapita mondyila yeheyo.
Inkha ove David, ñgeno walinga ñgeni?
TALAMA IYA OSOKO!
Upondola okulinga ñga:
Okupula komunthu.
Okuhongolelwa nomakina itiwa GPS.
Okutualako nokuenda no komutwe, oovola ondyila uhanda.
Tyotyili, Onthele C ikahi vali nawa.
Onthele B ikahi vali nawa tyipona yotete. Konyima, omapa ine omakina itiwa GPS una okuityinda opo ikuhongolele ondyila.
Ombimbiliya ipondola okukuatesako monkhalelo ngoyo!
Omukanda wakolela vali
ikuhongolela tyina ukahi movitateka
ikukuatesako okukala omunongo nokukala omunthu ukahi nawa
ikulekesa oñgeni upondola okukala nomuenyo ukahi nawa
OMAKUMBULULO OMAPULO AKOLELA MOMUENYO
Putyina tuvana tulipula okuti:
Omokonda yatyi eulu engole?
Ononthungululu mbalingwa natyi?
Mokueenda kuomuvo pahe tulipula konthele yovipuka vimoneka mouye.
Omokonda yatyi ovipuka ovivi vimonekela?
Omokonda yatyi ovanthu vankhila?
Okuti omakumbululo omapulo aa avahiwa Mombimbiliya?
Ovanthu ovanyingi vapopia okuti Mombimbiliya muvahiwa vala onoñgano ine ipuilisa okuinoñgonoka. Okuti otyitateka Ombimbiliya ine onkhalelo ovanthu veitala? Okuti omalusoko ovanthu, oo apenga?
Mongeleka, ovanthu vasoka okuti Ombimbiliya ipopia okuti Huku oe utumina ouye. Otyo tyaenda ñgeni? Mouye mueyula ovivi! Mueyula omaluihamo, omauvela nononkhia, noluhepo novinimawe. Oñgeni Huku woluembia apondola okuetako ovipuka ovio?
Okuti uhanda okunoñgonoka ekumbululo eli? Etyi Ombimbiliya ipopia konthele yomunthu utumina ouye uno matyikuhuvisa!
Tupu moimbuka okuti onondonga mbukahi mombulusula ei mbatunda Mombimbiliya. Onombangi mba Jeova vena onthumbi yokuti Ombimbiliya oyo vala ina ehongolelo ewa. Mokonda “yatumwa okuhonekwa na Huku, iya ina esilivilo pala okulongesa, pala okuviyula, pala okuviukisa ovipuka.” (2 Timóteo 3:16, 17) Upondola okutanga omukanda oo omukulu, mahi nkhele ukuatesako!