O Ndaviti na Ngoliya

Siovaa apopila Samuwele okuti: ‘Enda keumbo lya Sesee. Umwe povana vae makala ohamba yo Isilayeli.’ Samuwele aende keumbo lya Sesee. Etyi Samuwele amona omona omukulu watyo wa Sesee, asoko okuti: ‘Ou oe malingi ohamba.’ Mahi Siovaa apopila Samuwele okuti haeko. Emuti: ‘Ame ndyitala komutima womunthu, hitale kolupe.’

Sesee aeta vali ovana vae epandu ku Samuwele. Mahi Samuwele ati: ‘Siovaa utupu ou aholovona-po. Okuti una vali omona omukwavo?’ Sesee ati: ‘Ndyina vali omukwavo, omututu watyo, utiwa o Ndaviti. Wakalisa onongi mbange.’ Etyi Ndaviti eya, Siovaa apopila Samuwele okuti: ‘Oyou malingi ohamba!’ Samuwele apolo omulela eutili pomutwe wa Ndaviti, emulembula akale ohamba yo Isilayeli.

Etyi pakala, ova Isilayeli avakalwa nova Filisitiya, ova Filisitiya ankho vena omukwa-vita umwe omunene utiwa o Ngoliya. Ononthiki ambuho Ngoliya ankho uleva ova Isilayeli. Ankho upopia okuti: ‘Etei omulume eye okulwa naame. Inkha ndyitila-ko matukala ovapika venyi. Mahi inkha utila-ko, onwe mamukala ovapika vetu.’

Ndaviti atwaila okulia ovakulu vae vekahi kovilwa. Eivi Ngoliya uli nokuleva ova Isilayeli. Ndaviti apopi okuti: ‘Ame mandyikalwa nae!’ Ohamba Saulu aipopi okuti: ‘Mahi ove umona.’ Ndaviti akumbulula okuti: ‘Siovaa mankhwatesako.’

Saulu apolo ovikutu viae viomovilwa, evivaleka Ndaviti, mahi Ndaviti ati: ‘Ame himetyivili okukalwa novikutu evi.’ Ndaviti evilulu-mo, apolo-po otyifuta tyae aende. Akoyo omamanya etano eepake motyipapo tyae. Ndaviti aende no ku Ngoliya. Ngoliya apopi okuti: ‘Omako kamukwendye. Mandyikwiipaa, ohitu yove mandyiavela oviila novinyama viofika.’ Ndaviti ahawele owoma. Emuti: ‘Ove uya no kwaame nomutunga, neonga, mahi ame ndyiya kwoove menyina lya Siovaa. Ove kukahi nokulwa noonthwe, ukahi nokulwa na Huku. Ovanthu aveho vekahi pano mavetyimono okuti Siovaa omunene vali komutunga nokeonga. Memupakula amuho pomavoko etu.’

Ndaviti apake emanya motyifuta tyae atongo nononkhono. Siovaa emukwatesako, emanya alivete mombamba ya Ngoliya alinyingila. Ngoliya atokela pohi. Ova Filisitiya aveho avakahateka. Okuti noove uyumba onthumbi mu Siovaa, nga Ndaviti?