Huku Waholovona David

WEETE oityi tyapita polutalatu apa? Omukuendye ou wayovola ongiona yae kehunyu. Ehunyu ankho liatyindapo ongiona opo likalie. Mahi, omukuendye ou wahatekelamo, ayovolako ongiona yae. Etyi ehunyu liapiluluka omukuendye eliipaa. Onthiki onkhuavo, ayovola ongiona onkhuavo konkheyama. Omukuendye ou, kakolele omutima? Enyina liae ulii?

Omukuendye ou utiwa o David. Ankho ukala mepundaumbo lio Mbelei. Tate mbuale yae o Obede, omona wa Rute na Mboaz. Uvehinangela? Tate ya David o Jesse. David ankho omunthita wonongi mba tate yae. David watyitua etyi papita omanima 10, tunde puetyi Yehova aholovona Saulu opo akale ohamba.

Onthiki imue Yehova wapopila Samuele okuti: ‘Pola omulela wakolela, enda keumbo lia Jesse mo Mbelei. Mokonda povana vae, Ame naholovonapo wike opo akale ohamba.’ Etyi Samuele amona otyiveli tya Jesse Eliabe, asoko okuti: ‘Ou, oe yatyo waholovonwa na Yehova.’ Anthi, Yehova emutolela okuti: ‘Wehemutale vala etyi omule, netyi omuwa. Ame hemokoyele opo akale ohamba.’

Jesse aihana omona wae Abinadabe, emueeta ku Samuele. Mahi, Samuele ati: ‘Au, ou haeko Yehova aholovona.’ Iya Jesse aeta vali omona wae Samá. Samuele ati: ‘Tupu ou haeko waholovonua na Yehova.’ Jesse aeta ovana vae aveho epanduvali ku Samuele. Mahi, Yehova kakoyelepo nawike. Iya Samuel apulu okuti: ‘Ovana vove ovo vala ava?’

Jesse akumbulula okuti: ‘Nkhele pena omututu watyo. Mahi, kepo wakalisa onongi.’ Etyi David eya, Samuele wamona okuti omukuendye umue omuwa. Yehova ati: ‘Oe yatyo ou naholovona. Tila omulela pomutwe wae.’ Iya Samuele alingi ngetyi Yehova emutuma. Etyi omuvo wehikapo, David akala ohamba yova Isilayeli.