Ouhamba Uliyapuka

Etyi Salomau ankho afenda Siovaa, mo Isilayeli mwali ombembwa. Mahi Salomau wanepele ovakai ovanyingi vovilongo ovikwavo, vafenda ovilolo. Katutu-katutu Salomau apilululwa, nae ehimbika okufenda ovilolo. Siovaa anumana unene. Apopila Salomau okuti: ‘Ouhamba wo Isilayeli kamaukala vali wombunga yove, mandyiuyapula pokati. Ovilongo ovinyingi viatyo mavihulu ku umwe povapika vove, viokwehehi mavihulu kombunga yove.’

Otyipuka otyo Siovaa etyiyandyulula vali nawa. Onthiki imwe umwe povaundapi va Salomau, utiwa Selombowau una oku enda nako, avelivasi nomuuli Aiya. Omuuli Aiya atandula otyikutu tyae ovinthimbu 12, apopila Selombowau okuti: ‘Siovaa mapolo Ouhamba wo Isilayeli kombunga ya Salomau, euyapula pokati. Pola-po ovinthimbu 10, mokonda ove mokala ohamba yomihoko 10.’ Etyi Ohamba Salomau yetyiiva aihande okwipaa Selombowau! Selombowau akaholama ko Isitu. Etyi Salomau ankhia, omona wae Lombowau akala ohamba. Selombowau ati pahe matyikondoka kotyilongo tyo Isilayeli.

Ovakulu vomo Isilayeli avapopila Lombowau okuti: ‘Inkha utekula nawa ovanthu, navo mavekutavela.’ Mahi omapanga a Lombowau omakula ae ovakwendye, avemupopila okuti: ‘Ovanthu velinga onya! Veavela ovilinga ovinyingi!’ Lombowau alingi ngeetyi omapanga ae emupopila. Alingi ovanthu onya, avemutyitukila-po. Avaholovona Selombowau akale ohamba yomihoko 10, pahe Selombowau ankho wiiwe okuti ohamba yo Isilayeli. Mahi omihoko vivali viahupile-po avitiwa omihoko viouhamba wo Sundaa, avituminwa na Lombowau. Omihoko 12 vyo Isilayeli avitepuka pokati.

Selombowau ankho kahande ovanthu vae vakafende ko Selusalei, otyilongo tyituminwa nohamba Lombowau. Ove utyii omokonda yatyi? Selombowau ankho una owoma wokuti ovanthu mavemuyale avehulu ku Lombowau. Alingi ovilolo vivali vioolu apopila ovanthu okuti: ‘Mwahayei vali ko Selusalei, okokule unene, fendelei vala kuno.’ Ovanthu avehimbika okufenda ovilolo vioolu avalimbwa ku Siovaa.