Onkhai-Hamba Ondingavivi Yaipawa

Okukalela pondyanena yondywo Yohamba Akambe ko Sesiliyeli, epia lya Nambote limoneka. Akambe ankho uhole unene epia liomiti vionouva lya Nambote, ahande okulilanda-po. Mahi Nambote aanye okulandesa epia liae, mokonda tyailikilwe Movitumino vya Siovaa. Okuti Akambe wapandulile Nambote mokutavela ovitumino? Au. Akambe anumana unene, ahahande okulupuka pondye, nii okulia ahali.

Omukai wa Akambe ondingavivi, Onkhai-hamba Sesambele, emupopila okuti: ‘Ove uhamba yo Isilayeli. Ove upondola okulinga etyi uhanda. Ame mandyikwavela epia lya Nambote.’ Ahonekela omukanda ovakulu vomepunda-umbo, evepopila opo vatendeleye Nambote okuti wapopia omapita Huku, vemwipae nomamanya. Ovakulu avalingi ngeetyi Sesambele evetuma avaipaa Nambote, Sesambele atolela Akambe okuti: ‘Nambote wankhia. Pahe upondola okukala nepia liae.’

Nambote ha munthu wotete Sesambele aipaa. Waipaele-ale ovanthu ovanyingi vehole Siovaa. Ankho ufenda ovilolo nokulinga ovipuka ovikwavo ovivi. Siovaa wamwene ovipuka ovivi ovinyingi Sesambele alinga. Oityi alingile?

Etyi Akambe ankhia, omona wae Seolau akala Ohamba. Siovaa atumu omulume umwe utiwa o Seuu opo aipae Sesambele nombunga yae.

Seuu avelama kokatemba kae kovita aende noko Sesiliyeli, kuna kukala Sesambele. Seolau tupu avelama kokatemba kae awanena na Seuu, emupulu okuti: ‘Ombembwa vala?’ Seuu ati: ‘Au tutupu ombembwa mokonda me yove Sesambele, utwalako okulinga ovivi.’ Seolau ahetekela okwenda nkholo nokatemba kae. Mahi Seuu emuyahe nohevo ankhi.

Seuu aende nokeumbo lya Sesambele. Etyi Sesambele etyiiva okuti Seuu ukahi nokuya, elifiwiswa nawa emukevela pondyanena. Etyi Seuu ehika, Sesambele ahimbika okumupopia omapita. Seuu atumu ovaundapi vae vekahi ponthele yae okuti: ‘Muyumbei pohi!’ Avemuyumbu pohi, ankhi.

Konyima, Seuu aipaa ovana 70 va Akambe amane-ko efendelo lya Mbaale. Wetyimona okuti Siovaa wii ovipuka aviho, momuvo watyo umana-ko vana valinga ovivi?