Tala Nawa ‘Ounongo Wove Wokulongesa’
‘Ivisa ondaka . . . Viyula, nokulondola, nokulongesa nounongo tyihena elundo.’ —2 TIM. 4:2.
1. Otyitumino patyi Jesus avela ovalongwa vae? Iya ongeleka patyi asapo?
NAMPHILA Jesus walingile ovilinga oviwa viokuvelula ovanthu mokueenda kuovilinga viae pano pohi, ankho keiwe okuti omuhakuli ine omulingi womahuviso. Anthi ankho wiiwe okuti omulongesi. (Marcos 12:19; 13:1) Okuivisa onondaka onongwa Mbouhamba wa Huku, ankho ovio ovilinga viakolela momuenyo wa Jesus. Tupu, ovio ovilinga viakolela momuenyo wovalanduli vae hono. Ovakristau vena otyilinga tyokutualako novilinga viokulinga ovalongwa, mokulongesa ovanthu okulinga ovipuka aviho Jesus atuma.—Mat. 28:19, 20.
2. Oityi tuesukisa okulinga opo tufuisepo otyilinga tyetu tyokuivisa?
2 Opo tufuisepo nawa otyilinga tyetu tyokulinga ovalongwa, tuesukisa apeho okuyawisa ounongo wetu wokulongesa. Apostolu Paulu wapopile unene esilivilo liounongo oo, etyi ahonekela Timoteo mundyila yae movilinga viokuivisa. Oe wati: ‘Litala nawa apeho ove muene, nokutala onkhalelo yove yokulongesa. Tualako okuendela movipuka ovio, mokonda inkha ulinga ngotyo, moliyovola ove muene na vana vekutehelela.’ (1 Tim. 4:16) Okulongesa Paulu ankho ekahi nokupopia apa, hakuhipulula vala ovipuka omunthu ei. Ovakristau ovanongo vehika komitima viovanthu, nokuvepa ondundo yokulinga omapiluluko momienyo viavo. Otyo, otyo tyitiwa ounongo. Moluotyo, oñgeni matutyivili okukala ‘nounongo wokulongesa’ tyina tupopila vakuetu onondaka onongwa Mbouhamba wa Huku?—2 Tim. 4:2.
Kala ‘Nounongo Wokulongesa’
3, 4. (a) Oñgeni matutyivili okukala ‘nounongo wokulongesa’? (b) Oñgeni o Sikola yo Vilinga via Huku maitukuatesako okukala ovalongesi ovanongo?
3 Omukanda umue wahangununa okuti ondaka ‘ounongo’ ilekesa ‘enoñgonoko omunthu apondola okukala nalio mokulilongesa, nokuundapesa etyi elilongesa, no mokutala nawa.’ Tuesukisa okutala nawa kovipuka ovio aviho vitatu, opo tukale ovalongesi ovanongo vo nondaka onongwa. Tupondola okunoñgonoka vala nawa otyilinga tyetu tyokuivisa, inkha tulilongesa nokulikuambela konthele yatyo. (Tanga Salmos 119:27, 34.) Okutala nawa tyina ovalongesi ovanongo valongesa, matyitukuatesako okunoñgonoka ononkhalelo mbavo mbokulongesa, iya atuvehetekela. Okulinga apeho ononkhono mbokuundapesa etyi tukahi nokulilongesa, matyitukuatesako okuyawisa ounongo wetu wokulongesa.—Lucas 6:40; 1 Tim. 4:13-15.
4 Jeova oe Omulongesi wetu Omunanene. Jeova uundapesa eongano liae opo aavele ovaumbili vae kombanda yeheke ehongolelo, malivekuatesako okukala nounongo, opo vafuisepo otyilinga tyavo tyokuivisa. (Isa. 30:20, 21) Moluotyo, omawaneno aeho alinga Osikola Yovilinga Via Huku kese simano, yapongiyua pala okukuatesako aveho velihonekesamo, opo vakale ovaivisi ovanongo Vouhamba wa Huku. Omukanda wavilapo mo sikola oyo, Ombimbiliya. Ondaka ya Jeova, itupopila etyi tuna okulongesa. Moluotyo, Ombimbiliya ilekesa ononkhalelo patyi mbaviuka mbokulongesa. Osikola Yovilinga Via Huku, ituhinangelesa apeho okuti opo tukale vali ovalongesi ovanongo, tuna yokuundapesa unene Ondaka ya Huku, nokulinga omapulo nounongo, nokulongesa monkhalelo yapepuka, nokusuka unene na vakuetu. Pahe tutalei kese imue pononthele ombo. Konyima atukapopia oñgeni matutyivili okuhika komutima womulongua.
Undapesa Unene Ombimbiliya
5. Putyina tulongesa, oityi tuesukisa okuundapesa unene? Omokonda yatyi?
5 Ovipuka Jesus omulongesi omunene kovanthu aveho ankho alongesa, vitunda mo Mbimbiliya. (Mat. 21:13; João 6:45; 8:17) Jesus ankho kapopi menyina liae muene, mahi ankho upopia menyina lia Una wemutumine pano pohi. (João 7:16-18) Onthue tuna okulandula ongeleka yae. Moluotyo, etyi tupopila ovanthu movilinga viokuivisa ondyuo nandyuo, nokulongesa ovalongwa Vombimbiliya momaumbo, tyina okutunda Mondaka ya Huku. (2 Tim. 3:16, 17) Namphila tuna ounongo omunyingi, mahi, kaupondola okuelekwa nounongo wo Mbimbiliya no nonkhono mbayo. Ombimbiliya ina ononkhono ononene. Tyina tuhanda okukuatesako omulongwa okunoñgonoka elongeso limue, otyiwa okutanga nae etyi Ombimbiliya ipopia konthele yotyo.—Tanga Hebreus 4:12.
6. Oñgeni omulongesi metyimono okuti omulongwa ukahi nokunoñgonoka nawa etyi vekahi nokulilongesa?
6 Otyo katyilekesa ko okuti Omukristau omulongesi kasukisa okupongiya etyi makalongesa. Anthi wesukisa okulipongiya nawa, opo atale nawa onotestu patyi makatanga nomulongwa wo Mbimbiliya, pokulilongesa nae Ombimbiliya. Haunene, otyiwa okutanga onotestu mbulekesa nawa omatavelo etu. Tupu, tyesukisa okuvatela omulongwa okunoñgonoka nawa kese testu yo Mbimbiliya atanga.—1 Cor. 14:8, 9.
Undapesa Omapulo Nounongo
7. Okuundapesa omapulo onkhalelo ongwa yokulongesa mokonda yatyi?
7 Okuundapesa nounongo omapulo, tyiavela omulongwa ondundo yokusoka, nokukuatesako omulongesi okuhika komutima womulongua. Moluotyo, tyina mutanga onotestu mbo Mbimbiliya ita omulongwa ahangunune, ove haveko uhangununa. Pamue tyesukisa okulinga epulo ekuavo vali, ine omapulo omakuavo, opo uvatele omulongwa wove okunoñgonoka nawa etyi mukahi nokulilongesa. Tyina uundapesa omapulo pala okulongesa omulongwa, kumukuatesako vala okunoñgonoka etyi mukahi nokulilongesa, mahi tupu umuvatela okutavela okuti etyi mukahi nokulilongesa otyili.—Mat. 17:24-26; Lucas 10:36, 37.
8. Oñgeni matunoñgonoka etyi tyikahi momutima womulongua?
8 Onkhalelo yokulilongesa yundapeswa momikanda vietu, o yomapulo nomakumbululo. Moluotyo, ovanthu ovanyingi ulongesa Ombimbiliya, mavetyivili liwa-liwa okuvasa omakumbululo omapulo ekahi momukanda. Mokonda mavatange vala etyi tyikahi po palagrafu. Mahi, omulongesi wokutyivila okupunga nawa, kamahambukwa vala nomakumbululo oo. Mongeleka, omulongwa pamue upondola okuhangununa nawa oityi Ombimbiliya ipopia konthele youmbalehi. (1 Cor. 6:18) Mahi, omapulo alingwa nounongo, apondola okulekesa oityi omulongwa tyotyili ekahi nokusoka konthele yetyi ekahi nokulongeswa. Omulongesi upondola okupula okuti: ‘Omokonda yatyi Ombimbiliya iilikila oumbalehi? Oityi ove usoka konthele yotyituwa otyo Huku ailika? Ove usoka okuti okuundapesa ovitumino via Huku momuenyo wove tyieta ouwa?’ Tyina omulongwa amakumbulula omapulo oo, malekesa oityi tyikahi momutima wae.—Tanga Mateus 16:13-17.
Longesa Monkhalelo Yapepuka
9. Oityi tuesukisa okuhinangela tyina tulongesa ovanthu Ombimbiliya?
9 Otyili tyikahi Mondaka ya Huku katyipuiya okutyinoñgonoka. Mahi, pamue ovanthu tulilongesa navo Ombimbiliya, vanguanguaneswa nomalongeso onongeleya mbomatutu. Otyilinga tyetu okulongesa Ombimbiliya monkhalelo yapepuka okunoñgonoka. Ovalongesi ovanongo, valongesa Ondaka ya Huku monkhalelo yapepuka, yaviuka no kuayandyuluka nawa. Inkha tulongesa ngotyo, kamatulongesa otyili tyo Mbimbiliya monkhalelo yepuiya okunoñgonoka. Lityilika okupopia ovipuka viehesukisile. Katusukisa okupopia ovipuka aviho vikahi motestu tutanga. Anthi, tuesukisa okupopia vala onthele yotestu ihangununa nawa etyi tukahi nokulilongesa. Omulongwa manoñgonoka katutu-katutu otyili tyo Mbimbiliya tyina atualako nokulilongesa.—Heb. 5:13, 14.
10. Tyina tulongesa omulongwa oityi matyitukuatesako oukuñgonoka apa matuhulila?
10 Opi tuna okuhulila kese nthiki tulilongesa nomulongwa? Tuesukisa okupunga nawa konthele oyo. Mokonda tyitei kounongo womulongesi nonkhalelo yomulongwa. Mahi, tuesukisa okuhinangela apeho okuti otyilinga tyetu, okukuatesako omulongwa okukala nekolelo liapama. Moluotyo, tuavela omulongwa omuvo utuuka pala okutanga, anoñgonoka nawa etyi atanga, opo etavele otyili tyikahi Mondaka ya Huku. Kamatuhateka vala okutanga ono palagrafu ononyingi otyo omulongwa ahanoñgonoka nawa atyiho. Tupu, tuesukisa okuenda kumutue. Tyina omulongwa wetu amanoñgonoka nawa onthele tuatanga, atueende no popalagrafu onkhuavo.—Col. 2:6, 7.
11. Oityi tulilongesila kongeleka yo apostolu Paulu?
11 Apostolu Paulu watuaileko okuivisa nokulongesa onondaka onongwa monkhalelo yapepuka okunoñgonoka. Namphila, Paulu ankho alongesilwe mo nosikola ononene, mahi ankho ulityilika okupopia onondaka mbupuiya. (Tanga 1 Coríntios 2:1, 2.) Otyili tyapepuka tyo Mbimbiliya, tyikoka ovanthu vomitima omiwa nokuveyovola. Nawike wesukisa okupita mo nosikola ononene opo anoñgonoke otyili tyo Mbimbiliya.—Mat. 11:25; Atos 4:13; 1 Cor. 1:26, 27.
Kuatesako Ovalongwa Okupanda Etyi Valongeswa
12, 13. Oityi matyiavela omulongwa ondundo yokuundapesa momuenyo wae etyi ekahi nokulilongesa? Popia ongeleka.
12 Opo tukuateseko omulongwa, tuesukisa okulongesa monkhalelo ihika komutima wae. Omulongwa una okunoñgonoka oñgeni maundapesa momuenyo wae etyi mukahi nokulilongesa. Una okunoñgonoka ouwa matyimuetela, no ñgeni omuenyo wae maukala nawa inkha alandula ehongolelo lio Mbimbiliya.—Isa. 48:17, 18.
13 Mongeleka, hamue tukahi nokulilongesa konthele ya Hebreus 10:24, 25, ilunda Ovakristau okuliongiya apeho no vakuatate, opo velilongese Ombimbiliya nokulipameka na vakuavo. Inkha omulongwa nkhele kekahi nokuenda komaliongiyo, tupondola okumupopila liwa liwa oñgeni omaliongiyo alingwa, netyi tulilongesa momaliongiyo oo. Tupu, tumupopila okuti omaliongiyo akutikinyua mefendelo lietu, nokulekesa okuti etuetela ouwa. Konyima tupondola okumukonga opo ahimbike okuenda komaliongiyo. Omulongwa una okunoñgonoka okuti tyina ametavela okuenda komaliongiyo, uhanda okutavela ku Jeova, kekahi nokuhambukiswa ou ukahi nokulongesa.—Gál. 6:4, 5.
14, 15. (a) Oityi omulongwa wo Mbimbiliya apondola okulilongesa konthele ya Jeova? (b) Oñgeni okunoñgonoka ovituwa via Huku matyietela ouwa omulongwa wo Mbimbiliya?
14 Otyipuka otyiwa tyokuakolela vali ovalongwa vapondola okuvasa mokonda yokulilongesa Ombimbiliya nokuundapesa ovitumino viayo, okunoñgonoka okuti Jeova omunthu wotyotyili nokumupanda. (Isa. 42:8) Mavanoñgonoka okuti Jeova o Tate wokuna oluembia, no Mupakeko wa atyiho, Muene wouye auho. Tupu, mavanoñgonoka okuti Jeova ulekesa ounene wae no ñgeni atuwa ku vana vemuhole nokumuumbila. (Tanga Êxodos 34:6, 7.) Puetyi ankho kuakamba katutu opo Moisesi apole elongo lio Isilayeli moupika ko Egitu, Jeova walekesa oñgeni atuwa etyi apopia okuti: ‘Mandyikala etyi nahanda.’ (Êx. 3:13-15) Otyo ankho tyilekesa okuti Jeova upondola okukala etyi tyesukisa, opo afuisepo etyi ahanda pala ovanthu vae aholovona. Moluotyo, ova Isilayeli vanoñgonoka okuti Jeova weveyola, weveluilako, wevetekula, nokufuisapo omilao viae, evekuatesako mononkhalelo ononkhuavo.—Êx. 15:2, 3; 16:2-5; Jos. 23:14.
15 Ovalongwa vetu kamavamono omahuviso a Jeova momienyo viavo nga ana amonekele kononthiki mba Moisesi. Mahi putyina ekolelo lio valongwa vetu litualako okuliyawisa, nokupanda etyi velilongesa, tyotyili mavaimbuka okuti vesukisa okuyumba onthumbi mu Jeova opo evepameke, nokuvepa ounongo nehongolelo. Iya tyina vamalingi ngotyo, tupu navo mavanoñgonoka okuti Jeova Omulongi, Omuameni, no Mutekuli omukuatyali wavo movipuka aviho vesukisa.—Sal. 55:22; 63:7; Pro. 3:5, 6.
Lekesa Okuti Tyotyili Wesuka na Vakuenyi
16. Omokonda yatyi ounongo wetu muene haoko wakolela unene opo tulongese nawa?
16 Inkha ulitehelela okuti utupu ounongo wokulongesa ngetyi uhanda, wahasoye. Jeova na Jesus ovo vekahi nokuhongolela ovilinga evi viokulongesa otyili, vikahi nokulingwa ouye auho hono. (Atos 1:7, 8; Revelção [Apocalipse] 14:6) Moluotyo, vapondola okutukuatesako opo onondaka mbetu mbuhike komitima viovanthu vokuna omitima omiwa. (João 6:44) Ohole yotyotyili omulongesi ena nomulongwa wae ipondola okukuatesako unene omulongwa, namphila omulongesi ehena ounongo. Apostolu Paulu walekesa okuti ankho wii nawa esilivilo liokukala nohole na vana ankho alongesa.—Tanga 1 Tessalonicenses 2:7, 8.
17. Oñgeni matulekesa okuti tyotyili tuhole kese mulongwa?
17 Tupu, nonthue matulekesa okuti tyotyili tuna ohole na kese munthu tulongesa Ombimbiliya, inkha tuovola omuvo wokumunoñgonoka nawa. Tyina tulilongesa nae ovitumino vio Mbimbiliya, matunoñgonoka nawa onkhalelo yomuenyo wae. Tupondola okuimbuka okuti ukahiale nokuendesila omuenyo wae movitumino vimue elilongesa mo Mbimbiliya, namphila kononthele mbumue nkhele wesukisa okulinga omapiluluko. Tyina tukuatesako omulongwa okunoñgonoka oñgeni apondola okuundapesa momuenyo wae etyi tulilongesa, ngotyo tumuvatela okukala omulongwa wotyotyili wa Kristu.
18. Okulikuambela nomulongwa wetu, no kumuitilako melikuambelo tyakolela unene mokonda yatyi?
18 Tyakolela unene, okulikuambela nomulongwa wetu, no kumuitilako okutumbula enyina liae melikuambelo. Ngotyo, omulongwa manoñgonoka okuti, tuhanda okumuvatela opo anoñgonoke vali nawa Omupakeko wae, opo akale noupanga Nae, nokuvasa ouwa mehongolelo Liae. (Tanga Salmos 25:4, 5.) Putyina tulikuambela ku Jeova opo akuateseko omulongwa mononkhono ekahi nokulinga mbokuendehila omuenyo wae muetyi ekahi nokulongeswa, omulongwa manoñgonoka okuti wesukisa okukala ‘omufuisipo wondaka ya Huku.’ (Tia. 1:22) Iya tyina omulongwa atehelela elikuambelo tulinga nomutima auho, manoñgonoka oñgeni malingi omalikuambelo ae. Okukuatesako omulongwa okukala noupanga omuwa na Jeova tyihambukiswa unene ngatyi!
19. Onthele mailandulako maikapopia konthele yatyi?
19 Tyituavela ondundo onene okunoñgonoka okuti Onombangi Mba Jeova mbokualamba po 6.500.000 mouye auho, vekahi nokuyawisa ‘ounongo wavo wokulongesa,’ okukuatesako ovanthu vomitima omiwa, okulinga ovipuka Jesus atuma. Ouwa patyi ukahi nokutunda movilinga vietu viokuivisa? Onthele mailandulako maikakumbulula epulo olio.
Okuti Ove Utyihinangela?
• Omokonda yatyi Ovakristau vesukisila okukala ‘nounongo wokulongesa?’
• Ononkhalelo patyi tuesukisa okuundapesa opo tukale ovalongesi ovanongo?
• Oityi tyipondola okutuvatela inkha tutupu ounongo wokulongesa?
[Olutalatu pefo 13]
Okuti ove welihonekesale Mosikola Yovilinga Via Huku?
[Olutalatu pefo 15]
Omokonda yatyi tyakolela okuita omulongwa atange mo Mbimbiliya?
[Olutalatu pefo 16]
Likuambela nomulongwa wove no kumuitilako