Jesus Kristu Omisionaliu Yavilapo
“Ame ndyimukalelipo wae, Oe wanthuma.”—JOÃO 7:29.
1, 2. Omisionaliu otyityi? Olie upondola okuihanwa okuti omisionaliu yavilapo?
OITYI usoka tyina wiiva ondaka “misionaliu?” Vamue tyina veiva ondaka oyo, vasoka ko nomisionaliu mbonongeleya mbo Vakristau mouye, ovanyingi vehole okulipaka mopulitika no movitanda vilingwa kovilongo vekahi nokuundapa. Mahi inkha ove Umbangi ya Jeova, mosoko ko nomisionaliu mbutumwa no Nonkhalamutue mbo Nombangi mba Jeova pala okukaivisa onondaka onongwa movilongo ovinyingi ouye auho. (Mateus 24:14) Onomisionaliu ombo, vaundapesa omuvo wavo nononkhono mbavo opo vakuateseko ovanthu okunoñgonoka Jeova Huku nokukala noupanga omuwa nae.—Tiago 4:8.
2 Onondaka ‘misionaliu’ no ‘nomisioanaliu’ kambuvasiwa mo notestu mbo Mbimbiliya Tradução do novo Mundo das Escrituras Sagradas. Mahi Mombimbiliya yo no Referencia, motestu ya Efésios 4:11 pondaka “evangelização” pena okatoi kayulika pombuelo okuti melaka lio Gregu ondaka oyo, tupu ipondola okupitiyua okuti omisionaliu. Jeova oe Omuivisi omunanene, mahi kapondola okuihanwa okuti omisionaliu yavilapo, mokonda kenetumwe nomunthu nawike. Jesus Kristu wapopile konthele ya Tate yae okuti: “Ame ndyimukalelipo wae, Oe wanthuma.” (João 7:29) Mokonda yoluembia olunene Jeova ena novanthu aveho, watumine Omona wae wongunga pano pohi. (João 3:16) Jesus upondola okuihanwa okuti Omisionaliu omunene, wavilapo, mokonda ehunga limue liemuetele pano pohi ewa, oe watuminue opo ‘aave oumbangi wotyili.’ (João 18:37) Jesus wafuisilepo nawa-nawa ovilinga viae viokuivisa onondaka onongwa Mbouhamba wa Huku, iya ovilinga alingile nonthue hono vitukuatesako. Mongeleka, onthue tupondola okuundapesa ononkhalelo mbae mbokulongesa movilinga vietu viokuivisa, tyilinge tunomisionaliu, ine tuvaivisi vala.
3. Omapulo patyi matulilongesa?
3 Otyilinga tya Jesus tyokuivisa Ouhamba wa Huku, tyikatula omapulo ngaa: Oityi tyapitile na Jesus etyi ali pano pohi? Omokonda yatyi Jesus ali nounongo wokulongesa? Oityi tyemukuatesileko okufuisapo nawa ovilinga viae viokuivisa?
Jesus Wesukisile Ombili Opo Eye Okuivisa Pano Ehetyiliyile
4-6. Jesus wapitile momapiluluko patyi etyi atuminwe pano pohi?
4 Hono onomisionaliu no Vakristau ovakuavo vekahi nokuilukila kovilongo kuesukisa unene ovaivisi Vouhamba wa Huku, vesukisa okutyiliya onkhalelo yomuenyo yelikalela naina vali nayo. Mahi, onthue katupondola okusoka oñgeni onkhalelo yomuenyo wa Jesus pano pohi ankho yelikalela unene naina ankho ena keulu, puetyi ankho akala na Tate yae pokati ko noandyu mbuumbila Jeova nomutima wasukuka. (Jó 1:6; 2:1) Otyo tyelikalela unene nokukala pano pohi pokati kovanthu onondingavivi mouye wovivi! (Marcos 7:20-23) Jesus ankho una okukoleleya alo umue onkhi ovalongwa vae ankho vena pokati kavo. (Lucas 20:46; 22:24) Tyotyili, Jesus wetyivilile okutetulula nawa-nawa kese tyitateka apitile natyo pano pohi.
5 Jesus kahimbikile okupopia omalaka ovanthu komahuviso. Wahimbikile okulilongesa omalaka tunde pouna. Otyo, ankho tyelikalela unene nokuhongolela onoandyu keulu! Pano pohi Jesus wapopile omalaka ovanthu. Omalaka oo ankho elikalela unene nomalaka onoandyu. (1 Coríntios 13:1) Ankho kutupu omunthu upopia onondaka mbuhika komutima, nga Jesus.—Lucas 4:22.
6 Tala ovipuka ovikuavo viapilulukile unene momuenyo wo Mona wa Huku etyi eile pano pohi. Namphila Jesus ahapiñganene onkhali ya Andau, mahi wali omunthu wopahitu, nga vana veya okukala ‘onondenge’ mbae ine ovalanduli vae ovanakwa. (Tanga Hebreus 2:17, 18.) Montyinthiki tyahulililako komuenyo wae pano pohi, Jesus welityilikile okuita ku Tate yae keulu opo emutumise onoandyu mbulamba pomambamba 12. Mahi, pahe nkhele sokolola vala, onoandyu mbuna oe muene ankho atumina etyi o Mingeli Arkandyu! (Mateus 26:53; Judas 9) Tyotyili, Jesus walingile omahuviso. Mahi, etyi alinga puetyi ankho ekahi pano pohi, katyielekwa natyina ñgeno alinga keulu.
7. Ova Judeu ankho vanoñgonoka ñgeni Ovitumino via Huku?
7 Mokueenda kuomuvo Jesus akala keulu puetyi ankho ‘Ondaka,’ tyafuile oe wali omutumwa-ndaka wa Huku wahongolela ova Isilayeli etyi ankho vekahi mehoko. (João 1:1; Êxodos 23:20-23) Ova Isilayeli ‘vapelwe ovitumino vapopililwe no noandyu mahi, kavevitavelele. (Atos 7:53; Hebreus 2:2, 3) Tyotyili, motyita tyotete ononkhalamutwe mbonongeleya mbo va Judeu, kavanoñgonokele nawa Ovitumino via Huku. Mongeleka, tala Otyitumino tyonthiki yo Tyasapalo. (Tanga Marcos 3:4-6) Ovanongo vovihonekwa no va Fariseu ‘vatombele ouviuki, nokankhenda, nekolelo, ovipuka ankho viakolela vali Movitumino.’ (Mateus 23:23) Anthi, Jesus kayekelepo okuvekuatesako nokuvepopila otyili.
8. Jesus upondola okutuvatela mokonda yatyi?
8 Jesus wali nomutima wombili. Mokonda yoluembia ankho ena novanthu, ankho uhanda unene okuvekuatesako. Nalumue akalele tyehena ombili yokuivisa. Mokonda Jesus watuaileko nekolelo mu Jeova etyi ankho ekahi pano pohi, pahe wafuapo pala okuyovola apeho vana vetavela kue. ‘Mokonda oe wamuene ononkhumbi, etyi alolwa, pahe upondola okuvatela vana [ngonthue] vekahi nokulolwa.’—Hebreus 2:18; 5:8, 9.
Wali Omulongesi Wokualongua Nawa
9, 10. Onondonga patyi Jesus apelwe, etyi nkhele ehenetumwe pano pohi?
9 Hono, tyina Ovakristau vehenetumue kovilinga vioumisionaliu, Ononkhalamutue mbo Nombangi mba Jeova, vaonganeka osikola pala okuvelongesa nawa. Mahi okuti Jesus Kristu walongesilue? Enga, walongesilue. Mahi, kalongesilwe monosikola mbavilapo mbonongeleya mbokohale opo akale Mesiya. Tupu kalongesilwe no nonkhalamutue mbankhimana mbo nongeleya. (João 7:15; tyieleka na Atos 22:3) Iya, oityi tyakuatesileko Jesus okukala omulongesi omunongo?
10 Namphila Jesus alongesilwe na ina Maliya, na Jose he koutekuli, mahi onondonga mbakolela unene mbokuivisa wembulongesilue na Jeova. Moluotyo, Jesus wati: ‘Ame hapopile etyi nahanda, mahi Tate wokuanthuma wandongesa etyi ndyina okupopia noñgeni mandyipopi.’ (João 12:49) Tala, Omona walongesilue etyi ankho ena yokulongesa. Etyi nkhele Jesus eheneye pano pohi, wakalele omuwo omunyingi okutehelela nawa onondonga mba Tate yae. Onondonga patyi mbavilapo Jesus ankho apondola okupewa, mbupona puombo?
11. Oñgeni Jesus alekesile ovituwa via Tate yae konthele yokutekula ovanthu?
11 Omona ankho una oupanga omuwa na Tate yae tunde puetyi atungwa. Mokueenda kuomanima Jesus akala keulu, wanoñgonokele nawa oluembia Huku ena novanthu aveho, mokutala oñgeni Jeova evetekula. Omona walekesile okuti nae una oluembia olunene novanthu nga Huku, apopi alo umue okuti: ‘Ovipuka ndyihole vali ankho vikahi novana vovanthu.’—Provérbios 8:22, 31.
12, 13. (a) Oñgeni Jesus elilongesila kokutala onkhalelo omu ankho Tate yae atekula ova Isilayeli? (b) Jesus waundapesile ñgeni onondonga apelwe?
12 Onondonga ononkhuavo Omona apewa ankho okutala oñgeni Tate yae atetulula ovitateka viepuiya. Mongeleka, tala oityi Jeova alingile ova Isilayeli ankho vehetavela. Omukanda wa Neemias 9:28, wati: ‘Mahi, tyina ankho vena ombembwa, vakondoka okulinga vali ovivi komaiho ove [Jeova], iya ove oveyekela pomaoko onondyale mbavo, avevemonesa ononkhumbi. Moluotyo, avakondoka nokuliyavela okuita ekuateso, iya ove ovetehelela tunde keulu oveyovola ovikando aviho, mokonda yokankhenda kove okanene.’ Mokonda Jesus waundapa na Jeova, nokutala oñgeni oe alinga, tyemukuatesako okukala nonkhenda novanthu vana ankho alongesa.—João 5:19.
13 Jesus waundapesa onondonga apewa, mokukala nokankhenda novalongwa vae. Motyinthiki tyahulilila konthiki yononkhia mbae, ono apostolu mbae vana ankho ehole unene aveho vemusilepo avakahateka. (Mateus 26:56; João 13:1) Apostolu Petulu alo umue wapopile ovikando vitatu okuti Jesus himwi! Mahi, Jesus wakuatesileko ono apostolu mbae opo vakondoke kue. Jesus wapopilile Petulu okuti: ‘Ame ndyikahi nokukuitilako unene nomalikuambelo, opo ekolelo liove lihatepuluke. Iya ove tyina wamakondoka pameka ovakuatate vove.’ (Lucas 22:32) O Isilayeli yopaspilitu ikahi nokuundapela nawa kelisesu lio noapostolu novauli. Iya omamanya elisesu liotyimato tyo Jelusalei Omphe, ena omanyina ono apostolu 12 mbekolelo mbo Ndyona Jesus Kristu. Hono, Ovakristau ovanakwa kumue novakuatate vavo “onongi ononkuavo” vekahi nokutuala komutue ovilinga viokuivisa Ouhamba wa Huku, nombatelo ya Huku nehongolelo lio Mona wae onthyolwa.—Efésios 2:20; João 10:16; Revelação [Apocalipse] 21:14.
Oñgeni Jesus Ankho Alongesa
14, 15. Oñgeni onkhalelo ya Jesus yokulongesa ankho yelikalela no yovanongo vovihonekwa no va Faliseu?
14 Oñgeni Jesus aundapesile etyi alongeswa pokulongesa ovalanduli vae? Tyina tueleka onkhalelo ya Jesus yokulongesa no yononkhalamutue mbo nongeleya mbo va Judeu, tuimbuka nawa okuti onkhalelo yokulongesa ya Jesus yavilapo unene. Ovanongo vovihonekwa no va Faliseu vapola ‘ondaka ya Huku ononkhono, mokonda yoviso viavo.’ Mahi, Jesus ankho kalongesa omalusoke ae muene, oe ankho ulongesa apeho ondaka ya Huku. (Mateus 15:6; João 14:10) Tupu, nonthue tuesukisa okulongesa ondaka ya Huku.
15 Kuna vali otyipuka otyikuavo tyilekesa omokonda yatyi Jesus ankho elikalela no nonkhalamutue mbo nongeleya. Jesus wapopia konthele yovanongo vovihonekwa no va Faliseu, okuti: ‘Ovipuka aviho vemupopila vitavelei amuvilingi, mahi muhalingei ngetyi valinga mokonda vapopia vala mahi kavetyilingi.’ (Mateus 23:3) Jesus ankho ulinga etyi alongesa. Tutalei ongeleka imue ilekesa okuti tyotyili Jesus ankho ulinga ngotyo.
16. Omokonda yatyi upopila okuti Jesus waendelele monondaka mbae mbukahi mu Mateus 6:19-21?
16 Jesus walondolele ovalongwa okuti ‘pakei . . . omalumono enyi keulu’ (Tanga Mateus 6:19-21.) Okuti Jesus ankho watyindile omuenyo welikuata nelondolo olio? Yoo. Jesus wapopile konthele yae muene okuti: “Ovimbandye vina omaleva, oviila viokeulu vina apa vilapela, mahi omona womunthu, utupu apa alangeka omutue.” (Lucas 9:58) Jesus ankho watyindile onkhalelo yapepuka yomuenyo. Jesus otyipuka ankho tyakolela unene apakele tete momuenyo wae ovilinga viokuivisa onondaka onongwa Mbouhamba wa Huku. Walekesile oñgeni omunthu apondola okulityilika okukala notyiho tyitundilila kokukala nomalumono pano pohi. Tupu, walekesile omokonda yatyi otyiwa unene okupaka omalumono etu ‘keulu, kuhena ofwa nofulusu, kuna ovimphulu vihapondola okutemba nokuvaka.’ Okuti ove wetavela elondolo lia Jesus liokupaka omalumono keulu?
Ovituwa Oviwa Viakokelele Ovanthu ku Jesus
17. Ovituwa patyi viakalesile Jesus omuivisi wavilapo?
17 Ovituwa patyi viakalesile Jesus omuivisi wavilapo? Otyituwa tyimue, okankhenda ankho Jesus ena novanthu akuatesako. Ovituwa vimue via Jeova Jesus ali navio, omutima weliola, noluembia, nokankhenda. Tala oñgeni ovituwa ovio viakokelele ovanthu ovanyingi ku Jesus.
18. Omokonda yatyi tupopila okuti Jesus ankho una omutima weliola?
18 Jesus wetavelele okuya pano pohi iya ‘alulumo omuenyo wae wo keulu eya okukala ngomupika, akala ngovanthu vopahitu.’ (Filipenses 2:7) Otyo, tyilekesa okuti Jesus ankho weliola omutima. Tupu, Jesus ankho katombele ovanthu, ngatyina oe wavilapo vali. Ankho kelipakeko, okupopia okuti “ame natunda keulu, moluotyo, amuho muna okutehelela kuame.” Jesus ankho kahiki ongendyo okulipopia kovanthu okuti ame Mesiya yotyotyili, ngetyi tyilinga ono mesiya mbomatutu. Ovikando vimue, ankho upopila ovanthu okuti muhapopiei kovanthu okuti ame Kristu, ni ovipuka nalinga. (Mateus 12:15-21) Jesus wahandele ovanthu vatokole ovo muene okumulandula, tyina vamatale ovipuka Jesus ankho ekahi nokulinga. Okunoñgonoka okuti Tatekulu yavo ankho kakevelela vakale ngo noandyu mbehena onkhali ankho akala nambo keulu, tyapamekele unene ovalongwa va Jesus!
19, 20. Oñgeni oluembia nokankhenda vialundile Jesus okukuatesako ovanthu?
19 Tupu, Jesus Kristu wali noluembia—otyituwa tyavilapo tya Tete yae. (1 João 4:8) Jesus walongesile ovanthu noluembia. Mongeleka, tala etyi akalele etyi atomphola nomukuendye umue omutumini. (Tanga Marcos 10:17-22.) Jesus “wakalele noluembia nae” ahande okumukuatesako. Mahi, omukuendye oo omutumini, kahandele okusapo omalumono ae omanyingi, opo akale omulanduli wa Kristu.
20 Otyituwa otyikuavo tya Jesus ankho tyikoka ovanthu, okankhenda. Ngetyi ovanthu vatyo aveho ovakuankhali veyula ovitateka, na vana ankho vetavela omalongeso a Jesus ankho valemenwa novitateka. Mokonda Jesus ankho wii ovitateka viavo, evelongesa nokankhenda. Tala ongeleka imue: Nthiki imue, Jesus nono apostolu mbae, vakalele novilinga ovinyingi nomuvo wokulia ankho vetupu. Mahi, oñgeni Jesus akalele etyi amona ovanthu ovanyingi veliongiya? ‘Jesus wakalele nokankhenda navo, mokonda ankho vekahi ngo nongi mbehena omunthita. Iya ahimbika okuvelongesa ovipuka ovinyingi.’ (Marcos 6:34) Jesus wamuene okuti onkhalelo yovanthu ankho alongesa yetesa okankhenda. Moluotyo, walingile ononkhono ononene okuvelongesa nokulinga omahuviso pala okuvekuatesako. Mokonda yovituwa viae oviwa, no nondaka mbae, vamue vetavelele, avakala ovalongwa vae.
21. Oityi matukelilongesa monthele mailandulako?
21 Kuna ovipuka ovinyingi tupondola okulilongesa konthele yovilinga via Jesus viokuivisa pano pohi, ngetyi onthele mailandulako mailekesa. Omononkhalelo patyi ononkuavo tupondola okuhetekela Jesus Kristu, Omisionaliu yavilapo?
Oñgeni Ove Mokumbulula?
• Onondonga patyi Jesus apelwe etyi nkhele eheneye pano pohi?
• Oñgeni onkhalelo yokulongesa ya Jesus yavililepo vali unene tyipona yo vanongo vovihonekwa no va Faliseu?
• Ovituwa patyi viakokelele ovanthu ku Jesus?
[Olutalatu pefo 18]
Oñgeni Jesus alongesile ovanthu?