Ovola Ehongolelo Lia Huku Movipuka Aviho
“Huku oe Huku yetu apeho, alo komivo viahapu. Oe muene metuhongolela alo tunkhia.”—SALMO 48:14.
1, 2. Omokonda yatyi tuesukisila okutavela okuhongolelwa na Jeova, tyipona okuyumba onthumbi monondunge mbetu muene? Otyo tyikatula omapulo patyi?
TUPONDOLA okulikemba onthue muene, inkha tusoka okuti ovipuka ovivi ine viahasilivila oviwa. (Provérbios 12:11) Inkha tyili tuhanda okulinga otyipuka tyahaviukile Kovakristau, omutima wetu pamue utuhongiliya okutyilinga. (Jeremias 17:5, 9) Moluotyo, omuhoneki wo salmu walekesa okuti una onondunge etyi elikuambela ku Jeova okuti: ‘Mphevo otyitei tyove notyili tyove, opo vinthyongolele.’ (Salmo 43:3) Oe ankho wayumba onthumbi mu Jeova, hamonondunge mbae muene mbehehi. Ngotyo, Jeova ankho oe umuavela ehongolelo ewa. Ngetyi tyalingile omuhoneki oo, nonthue matukala nomuenyo omuwa inkha tutavela okuhongolelwa na Huku.
2 Omokonda yatyi tuesukisila okukala nonthumbi yokuti ehongolelo lia Jeova, olio liavilapo? Onalupi tuna okuovola ehongolelo olio? Ovituwa patyi tuesukisa okukala navio opo Jeova etuhongolele? Oñgeni Jeova etuhongolela hono? Omapulo oo okuakolela unene, maakumbululwa monthele ino.
Omokonda Yatyi Tuyumbila Onthumbi Mehongolelo lia Jeova?
3-5. Omokonda yatyi tupondola okuyumba onthumbi yetu aiho mehongolelo lia Jeova?
3 Jeova oe Tate yetu keulu. (1 Coríntios 8:6) Jeova wanoñgonoka nawa kese umue puonthue, upondola okutanga momitima vietu. (1 Samuel 16:7; Provérbios 21:2) Ohamba David wapopile Huku okuti: “Ove wanoñgonoka tyina ndyipumphama na tyina ndyikatuka. Waimbuka omalusoke ange tunde kokule. Elaka liange kalinepopie ondaka naike, mahi ove Jeova atyiho utyiale.” (Salmo 139:2, 4) Mokonda Jeova wetunoñgonoka nawa, tuna onthumbi yokuti oe wii oityi tyaviuka vali pala onthue. Tupu, Jeova oe omunongo omunene. Jeova weete ovipuka aviho, utala nawa alo kohi tyipona kese munthu, tunde ponthyimbi ovipuka mavikeya komutue uvii. (Isaías 46:9-11; Romanos 11:33) Jeova oe vala “aike Huku omunongo.”—Romanos 16:27.
4 Tupu, Jeova una oluembia nonthue, apeho utuhandela etyi tyitukuatesako nawa. (João 3:16; 1 João 4:8) Jeova una otyali nonthue, mokonda o Huku yoluembia. Omulongwa Tiagu wahoneka okuti: ‘Kese otyiawa otyiwa notyali tyafuapo, tyitunda keulu ku Tate yovitei vio keulu.’ (Tiago 1:17) Vana vetavela okuhongolelwa na Huku, vapola unene esilivilo kotyali tyae.
5 Okuhulako, Jeova oe Omukulami. Omuhoneki wo salmu wapopia konthele yotyo okuti: “Una ukala tyaholama mo Mukulami, ukahi nokuovola okukala mokahi ko Wepondolo Aliho. Ame mandyipopila Jeova okuti: ‘Jeova ove tyiholamo tyange, nomuameni wange. Ove Huku yange, una nayumba onthumbi.’” (Salmo 91:1, 2) Tyina tutavela okuhongolelwa na Jeova, tukahi nokuovola okuholama mu Huku una wahaponyo. Na tyina tuamatumbukilwa noundyale, Jeova metukuatesako kametuyeke tusoye. (Salmo 71:4, 5; Tanga Provérbios 3:19-26.) Enga, Jeova wii oityi otyiwa pala onthue, iya utuhandela ovipuka oviwa, tupu una epondolo liokutuavela ovipuka oviwa. Kamatukala ovanongo inkha tutomba ehongolelo liae! Onalupi tuesukisa ehongolelo liae?
Onalupi Tuesukisa Okupewa Ehongolelo?
6, 7. Onalupi tuesukisa ehongolelo lia Jeova?
6 Tyotyili, onthue tuesukisa okuhongolelwa na Huku mokueenda kuomuenyo wetu auho, tunde pouna alo tukulupa. Omuhoneki wo salmu wati: “Huku oe Huku yetu apeho, alo komivo viahapu. Oe muene metuhongolela alo tunkhia.” (Salmo 48:14) Ngetyi tyapopia omuhoneki oo, Omukristau omunandunge kayekepo okutavela ehongolelo lia Huku.
7 Omivo vimue, pamue tulitehelela okuti tuesukisa unene okuvatelwa liwa-liwa. Pamue tuahitakana unene “novitateka,” mokonda tukahi nokumoneswa ononkhumbi, ine tuavela unene, ine hamue tuapolwa movilinga. (Salmo 69:16, 17) Momivo viatyo ovio, tyituungumanesa unene okulikuambela ku Jeova, nokukala nonthumbi yokuti metupameka opo tukoleleye, nokutuavela ehongolelo opo tulinge omatokolo omawa. (Tanga Salmo 102:17.) Anthi, tupu tuesukisa ombatelo oyo momivo omikuavo. Mongeleka, tyina tutomphola novanthu okuvetolela onondaka onongwa Mbouhamba wa Huku, tuesukisa okuhongolelwa na Jeova opo tuave oumbangi omuwa. Inkha tulinga etokolo konthele yovitalukiso, ine okuvala nokulifiwisa, nokuholovona omapanga, novilinga, nokulongeswa mosikola, ine otyipuka otyikuavo vali, matulingi vala omatokolo onondunge inkha tulandula ehongolelo lia Jeova. Tyotyili, tuesukisa ehongolelo lia Jeova mononkhalelo ambuho mbomuenyo wetu.
Okuhaovola Ehongolelo lia Huku Tyieta Ovitateka
8. Tyalingile Eva okulia otyinyango tyailikwa tyalekesile tyi?
8 Hinangela okuti tuna okukala nehando liokulandula ehongolelo lia Jeova. Huku kametukuluminya okutavela ehongolelo liae inkha katuhande. Omunthu wotete wehetavelele okuhongolelwa na Jeova, o Eva. Etyi tyalinga Eva tyilekesa okuti okulinga etokolo ngoolio evi, tyieta ononkhumbi ononene. Tupu soka oityi etokolo lia Eva lilekesa. Eva walile kotyinyango tyailikwa mokonda ankho uhanda “okukala nga Huku, okunoñgonoka otyivi notyiwa.” (Gênesis 3:5) Ngotyo, Eva welipakele pomphangu ya Huku, alingi omatokolo ae muene konthele yotyiwa notyivi, tyipona okutavela okuhongolelwa na Jeova. Moluotyo, waanya outumini wa Jeova. Eva ankho wahandele okulitumina oe muene. Omulume wae Andau nae aholovona ondyila oyo ombi yokuhetavela ku Huku.—Romanos 5:12.
9. Inkha tuanya okuhongolelwa na Jeova, tyotyili tukahi nokulinga tyi? Otyo owova mokonda yatyi?
9 Hono, inkha katutavela okuhongolelwa na Jeova, nonthue tukahi nokuanya outumini wae. Mongeleka, nkhele soka komunthu wokuna otyituwa tyokutala ovanthu vekahi muhoyo. Inkha ekahi mewaneno lio Vakristau, otyitumino tya Jeova konthele yovipuka ovio utyii. Ovipuka viasila kavipondola alo umue okupopiwa, nokuvitala okapanena okupeleya okuvilinga. (Efésios 5:3) Tyina omunthu kahande okuhongolelwa na Jeova, ukahi nokuanya outumini wa Jeova, nokuhahande okutuminwa Nae. (1 Coríntios 11:3) Otyo, owova, mokonda Jeremia wati: “Ovanthu kavapondola okuviukisa onondyila mbavo.”—Jeremias 10:23.
10. Omokonda yatyi tuesukisila okuholovona nonondunge ovipuka tuhanda?
10 Vamue kavetavela onondaka mba Jeremia, vasoka okuti mokonda Jeova oe wetuavela epondolo liokuliholovonena, kapondola vali okutukoyesa tyina tuholovona etyi tuahanda. Tuhalimbueiko okuti namphila tuapewa epondolo liokuliholovonena, mahi, matukapulwa konthele yovipuka tuholovona okupopia nokulinga. (Romanos 14:10) Jesus wati: “Omulungu upopia etyi tyeyula momutima.” Tupu wati: “Momutima omo mutunda omalusoke omavi, ngokuipaa, nomaumbalehi, nomaundalelapo, nomaumphulu, okuava oumbangi womatutu, nokuhena onthilo na Huku.” (Mateus 12:34; 15:19) Ngotyo, onondaka mbetu nevi tulinga, vilekesa etyi tyikahi omutima wetu. Vilekesa oñgeni tyili onthue tukahi. Mokonda yotyo, Omukristau omunandunge wovola ehongolelo lia Jeova movipuka aviho. Ngotyo, omunthu oo utalwa na Jeova okuti ‘una omutima waviuka’ iya Jeova ‘memulingila ovipuka oviwa.’—Salmo 125:4.
11. Oityi tulilongesila kehipululo lio va Isilayeli?
11 Hinangela ehipululo lio va Isilayeli. Tyina ankho vaholovona okutavela ovitumino via Jeova, tupu Jeova ankho uveamena. (Josué 24:15, 21, 31) Mahi, pamue ankho vaholovona omapita. Kononthiki mba Jeremia, Jeova wapopile konthele yavo okuti: “Kavetavelele, ni okutehelela, mahi valandulapo onondunge mbomitima viavo ovivi nokuatena. Moluotyo, vakondoka konyima kavaile no komutue.” (Jeremias 7:24-26) Otyo otyivi unene! Tuhayeke omapeleyo omavi etuhongiliye okuanya okuhongolelwa na Jeova, atuendela monondunge mbetu muene, “okukondoka vali konyima atuhaende no komutue”!
Oityi Tyesukisa Opo Tulandule Onondonga mba Huku?
12, 13. (a) Otyituwa patyi tyitukuatesako okulandula ehongolelo lia Jeova? (b) Okukala nekolelo tyakolela mokonda yatyi?
12 Ohole yetu na Jeova ituhindila okutavela okuhongolelwa nae. (1 João 5:3) Mahi, Paulu wapopia otyipuka otyikuavo tuesukisa puetyi ati: “Onthue tukahi nokueenda nekolelo, hamovipuka vimoneka.” (2 Coríntios 5:6, 7) Otyo tyakolela mokonda yatyi? Jeova utuhongolela “monondyila mbouviuki,” mahi onondyila ombo kambututuala kokukala nomalumono ine enkhimano mouye uno. (Salmo 23:3) Moluotyo, eiho lietu liekolelo liesukisa okutala kondyambi yahaelekwa yopaspilitu, itunda kokuumbila Jeova. (Tanga 2 Coríntios 4:17, 18.) Ekolelo, litukuatesako okukala tyahambukwa netyi tuna pala okulitekula.—1 Timóteo 6:8.
13 Jesus walekesile okuti efendelo lio tyotyili liakutikinya okulipakula nomutima auho, okuundapela vakuetu. Tupu okulipakula tyihanda ekolelo. (Lucas 9:23, 24) Ovafendeli vamue vekolelo valinga ononkhono ononene, mbokukoleleya moluhepo, na tyina valingwa otyitovi, nokapungulula, alo umue tyina vamoneswa ononkhumbi ononene. (2 Coríntios 11:23-27; Revelação (Apocalipse) 3:8-10) Tyivekuatesako okukoleleya nehambu movitateka ovio, ekolelo liapama. (Tiago 1:2, 3) Ekolelo liokuapama litukuatesako okukala nonthumbi onene yokuti okuhongolelwa na Jeova apeho otyiwa unene. Tyituetela apeho ouwa wahapu. Tuna onthumbi onene yokuti ondyambi ya vana vakoleleya, onene unene tyipona kese nonkhumbi vamona.—Hebreus 11:6.
14. Omokonda yatyi Agar ankho esukisila okuliola omutima?
14 Tala, tupu okuti tyesukisa okukala nomutima weliola opo tulandule ehongolelo lia Jeova. Otyo, tyalekeswa nawa nongeleka ya Agar omupika wa Sara. Etyi Sara atualako tyihena olutyito aave Agar ku Abraiau, iya Agar akala omunthimba womona wa Abraiau. Agar ahimbika okulityinda-tyinda kolupala lwa Sara ankho uhena olutyito. Moluotyo, Sara “ahimbika okumupenye-nyeka,” iya Agar aende nkholo. Oandyu ya Jeova yavasa Agar aimupopila okuti: “Kondoka okeliheka komuhona wove Sara.” (Gênesis 16:2, 6, 8, 9) Tyafuile Agar wahandele okupewa onondonga mbelikalela. Opo Agar alinge ngetyi apopilwa noandyu, ankho wasukisa okusapo otyituwa tyae tyokulityinda-tyinda. Agar alingi nomutima weliola etyi oandyu yemupopila, iya omona wae Ismayeli atyitilwa mokapamendo ka he ankho muapama.
15. Popiapo omovipuka patyi vimue hono tyesukisa okuliola omutima, opo tulandule ehongolelo lia Jeova.
15 Opo tulandule ehongolelo lia Jeova, nonthue tuesukisa okuliola omutima. Vamue hamue vetavela okuti ovitalukiso vehole kavihambukiswa Jeova. Hamue Omukristau umue walinga otyipuka tyanumanesa mukuavo, pahe wesukisa okumuita otyiponyo. Ine pamue walinga otyiponyo, pahe wesukisa okutyitavela. Iya inkha umue walinga onkhali onene, malingi ñgeni? Wesukisa okuliola omutima eketyipopila ovakulu vewaneno. Omunthu oo upondola alo umue okupolwa mewaneno. Opo etavelwe okukondoka mewaneno, una okulivela nomutima weliola nokuyekapo otyituwa otyo otyivi. Movipuka ovio novikuavo vielifwa no ovio, onondaka mba Provérbios 29:23, mbuungumanesa: “Omalityindailo omunthu, oo maekemuvondeka, mahi wokueliola omutima makahivilikwa.”
Oñgeni Jeova Etuhongolela?
16, 17. Oñgeni tupondola okupola esilivilo enene Mombimbiliya, ondyivi-ndyivi yehongolelo lia Huku?
16 Ondaka ya Huku Ombimbiliya oyo ondyivi-ndyivi onene yehongolelo liae. (Tanga 2 Timóteo 3:16, 17.) Opo tupole esilivilo enene Mondaka ya Huku, tuesukisa okuovola ekuateso Liombimbiliya, tyina nkhele tuhenevasiwe novitateka. Tuna okukala notyituwa tyokutanga Ombimbiliya kese nthiki. (Salmo 1:1-3) Mokulinga ngotyo, matunoñgonoka nawa Ondaka ya Huku. Matukala nomalusoke ngo a Huku, nokukala tyelipongiya opo tukoleleye tyina tuvasiwa novitateka.
17 Tupu, tyakolela okusokolola nawa kuevi tuatanga Mombimbiliya nokulikuambela konthele yetyi tuatanga. Putyina tuvoyolola nawa onoversikulu mbo Mbimbiliya, tutala nawa oñgeni tupondola okumbuundapesa momuenyo wetu. (1 Timóteo 4:15) Putyina tuvasiwa novitateka viepuiya, tulikuambela opo Jeova, etukuateseko okuvasa ehongolelo tuesukisa. Ospilitu ya Jeova maitukuatesako okuhinangela ovitumino tuatanga Mombimbiliya, ine momikanda omikuavo viapolwa Mombimbiliya.—Tanga Salmo 25:4, 5.
18. Oñgeni Jeova aundapesa ovakuatate vetu Ovakristau pala okutuhongolela?
18 Ovakuatate vetu Ovakristau tupu vetukuatesako okuovola ehongolelo lia Jeova. Povakuatate ovo, pena onthumbo yakolela unene “yomupika wekolelo nokualunguka,” no Nonkhalamutue mbo Nombangi mba Jeova, vekahi nokupongiya omikanda, nomaliongiyo omatutu, nomanene pala okututekula mopaspilitu. (Mateus 24:45-47; yeeleka na Atos 15:6, 22-31.) Tupu, povakuatate vetu Ovakristau pena vana vekula nawa mopaspilitu haunene ovakulu vomawaneno, vafwapo pala okutukuatesako nokutuavela onondonga mbo Mbimbiliya. (Isaías 32:1) Ovakuendye Ovakristau tupu vena ombatelo yakolela monombunga mbavo. Vana vena ovo he Ovakristau, vatumwa okuovola apeho ehongolelo kovo tate yavo, mokonda ovo Huku aavela otyilinga tyokulongesa ovana vavo.—Efésios 6:1-3.
19. Okutualako okuovola ehongolelo lia Jeova tyituetela ouwa patyi?
19 Enga, Jeova utuhongolela mononkhalelo ononyingi. Otyiwa tulinge ononkhono mbokulandula nawa ehongolelo olio. Ohamba David wapopia konthele yova Isilayeli etyi ankho vena ekolelo okuti: “Ovo tate yetu, vayumbile onthumbi muove. Vekuyumbile onthumbi, iya ove otualako okuveyovola. Veliyavela kuove, avetyivili okuyovoka. Vayumbile onthumbi muove, iya ove kuevekundisile.” (Salmo 22:3-5) Inkha tulandula nonthumbi ehongolelo lia Jeova, tupu nonthue “kametukundisa.” Kamatukelivela mokonda yekevelelo lietu. Inkha ‘tuyeka Jeova ahongolele ondyila yetu,’ atuhayumbu onthumbi menoñgonoko lietu muene, matukamona ondyambi ongwa, alo umue pahetyino. (Salmo 37:5) Iya inkha tutualako okukoleleya nokutavela okuhongolelwa na Jeova, ondyambi oyo maikakala ya apeho. Ohamba David wahoneka okuti: “Jeova uhole ouviuki. Oe kamayekepo vana vemuyumba onthumbi. Mekeveyunga apeho. . . . Ovaviuki mavapiñgana o ohi, avakakalamo apeho.”—Salmo 37:28, 29.
Okuti Ove Upondola Okuhangununa?
• Omokonda yatyi tuyumbila onthumbi mehongolelo lia Jeova?
• Okuanya okuhongolelwa na Jeova matyituetela tyi?
• Omovipuka patyi vimue Ovakristau vesukisa omutima weliola?
• Oñgeni Jeova etuhongolela hono?
[Omalutalatu 16]
Okuti ove utavela ku Jeova movipuka aviho momuenyo wove?