Apa Katutu Oohi Maikala Omphangu Yombembwa!

“Tate yetu keulu, enyina liove linkhimanekwe. Ouhamba wove uye. Ehando liove lilingwe pano pohi, ngetyi lilingwa keulu.” ​—Mateus 6:9, 10.

ELIKUAMBELO olio liiwe novanthu ovanyingi ngatyina elikuambelo lia Tatekulu, liavela ovanthu ekevelelo. Ñgeni ngotyo?Ngetyi tyilekesa Elikuambelo lia Tatekulu, Ouhamba wa Huku maukalinga ehando lia Huku pano pohi ngetyi likahiale nokulingwa keulu. Huku uhanda oohi ino ikale omphangu yombembwa. (Revelação 21:1-5) Mahi, Ouhamba wa Huku oityi? Oñgeni maukapilula oohi ino omphangu yombembwa?

Ouhamba, Outumini Wavialekua na Huku

Ouhamba wa Huku outumini wotyotyili. Kese outumini, opo uundape nawa, wesukisa ovatumini, novitumino, naava mavatuminua. Okuti Ouhamba wa Huku otyo waonganekua ngotyo? Tala oñgeni Ombimbiliya ikumbulula omapulo etatu maalandulako:

Ovalie ovatumini Vouhamba wa Huku? (Isaías 33:22) Jeova Huku waholovona Omona wae Jesus Kristu, opo akale omutumini Wouhamba. (Mateus 28:18) Nehongolelo lia Jeova, Jesus waholovona ovanthu vamue vatunda ‘momihoko aviho, momalaka aeho, nomaanda aeho, novilongo aviho,’ opo vatumine na Jesus ‘ngonohamba oohi aiho.’—Revelação 5:9, 10.

Ovanthu mavatuminwa Nouhamba wa Huku vena okutavela ovitumino patyi? Ovitumino vimue, opo ovanthu vevifuisepo vesukisa okulinga ononkhono. Jesus wapopia otyitumino tyakolela vali kovitumino aviho, etyi ati: “‘Una okukala nohole na Jeova Huku yove nomutima wove auho, nomuenyo wove auho no nondunge mbove ambuho.’ Etyi, otyo otyitumino tyotete, no tyinene vali. Otyitumino tyavali tyelifwa notyo, otyetyi, ‘Kala nohole na vakuenyi ngetyi ulihole ove muene.’”—Mateus 22:37-39.

Ovitumino ovikuavo, opo ovanthu vevifuisepo vesukisa okulityilika okulinga ovipuka vimue. Mongeleka, Ombimbiliya ipopia nokuayandyuluka okuti: “Muhayondyuei! Na vana valinga omaundalelapo, vokufenda ovihuku, vokulinga oumbalehi, novipuka vikundisa, novalume valala novalume vakuavo, vokuvaka, ine vokuna elungavi, no nonkholwa, na vana vokupunda ovipuka viavakuavo, kamavapiñgana ouhamba wa Huku.”—1 Coríntios 6:9, 10.

Ovalie mavatuminwa Nouhamba wa Huku? Jesus waeleka ovanthu no nongi, vana mavatuminwa Nouhamba wa Huku. Jesus wati: “Ovo mavatehelela ondaka yange, iya avakala otyunda tyike vala, nomunthita wike.” (João 10:16) Opo omunthu akamone oviwa Mouhamba wa Huku, kesukisile vala okupopia okuti oe ulandula Omunthita Omuwa, Jesus, mahi tupu una okulinga etyi Jesus atuma. Jesus wapopile okuti: “Haaveho vati ‘Tatekulu, Tatekulu,’ mavakanyingila mouhamba wokeulu. Mukanyingila vala una ulinga ehando lia Tate yange uli keulu.”—Mateus 7:21.

Ngotyo, aveho vetavela Ouhamba wa Huku, vaundapesa, nokuhivilika enyina lia Huku, Jeova, ngetyi Jesus alingile. (João 17:26) Ovo vetavela otyitumino tya Jesus tyokulongesa vakuavo konthele ‘yonondaka onongwa mbouhamba oo.’ (Mateus 24:14; 28:19, 20) Iya ovo vena ohole pokati kavo.—João 13:35.

Okuhanyauna “Aveho Vekahi Nokunyona Oohi”

Onkhalelo youye hono, ilekesa okuti Ouhamba wa Huku apa katutu maukalinga omapiluluko omanene pano pohi. Oñgeni tutyii? Ovityita vivali viomanima konyima, Jesus wapopile konthele yovipuka ankho mavilekesa okuti ‘Ouhamba wa Huku ukahi popepi.’ (Lucas 21:31) Ngetyi tyalekesa onthele yokualamba, omanyingiliko okuti tukahi kononthiki mbahulililako ayandyuluka nawa mouye auho.

Oityi matyilandulako? Jesus wakumbulula okuti: “Makukakala ononkhumbi mbumue onene, mbehenekaleko tunde konthyimbi youye alo pahe. Tupu, kamambukeya otyikando tyavali.” (Mateus 24:21) Ononkhumbi ombo kamambuetuako nomunthu nawike. Mahi, mambukaetuako na Huku pala ‘okuhanyaunako vana vekahi nokunyona o ohi.’ (Revelação 11:18) Ovanthu onondingavivi, vekahi nokuhanyauna oohi mokonda yelulu liavo, ‘mavakanyimuako kombanda yoohi.’ Mahi, onondalawa, vokuumbila Huku monkhalelo yaviuka, “mavakatualako okukala kombanda yoohi.”—Provérbios 2:21, 22.

Jeova Huku una omahunga omawa pala okutyilinga. Mokonda yatyi? Tala ongeleka ei: Soka ñgeno una ondyuo yove muene. Ovanthu vamue vokualukala ondyuo, vena onondunge novituwa oviwa. Tupu vafeta onombongo mbo ondyuo, nokuiyunga nawa. Mahi, ovakuavo vetupu onondunge, nokuna elungavi. Kavafete onombongo mbo ondyuo tupu keveilingi nawa. Namphila wevelondolale ovikando ovinyingi, ovo vatualako novituwa ovio ovivi. Oityi ove ñgeno walinga? Tyotyili, mokonda ove umuene weumbo, movetaatamo.

Tupu, Jeova Huku, Omutungi wo ohi, novipuka aviho vikahimo, una epondolo liokutokola ovalie mavakala mo ohi ino. (Revelação 4:11) Jeova wapopia okuti makamanako ovanthu onondingavivi vahahande okulinga ehando liae, navana vokulipaka povipuka viavakuavo.—Salmo 37:9-11.

O Ohi Yalingwa Omphangu Ongwa Yombembwa

Apa katutu, Jesus Kristu ohamba Youhamba wa Huku makatumina oohi. Jesus waihena onthyimbi oyo omphe okuti ‘okuhimbika okutunga vali.’ (Mateus 19:28) Mouye omupe, ovipuka mavikakala ñgeni? Tala etyi Ombimbiliya ipopia:

Salmo 46:9 “Huku makamanako ovita alo kuna kuaoyela oohi.”

Isaías 35:1 “Ehoko, nomphangu yakukuta mavikahambukwa, etunda malikahambukwa nokukala nononthemo.”

Isaías 65:21-23. “Ovanthu aveho mavakalinga ovilinga vieeta ehambu liotyotyili, kamavalingi ovilinga tyahapoloko esilivilo, kamavakatyita pala ononkhumbi.”

João 5:28, 29 “Makuya omuvo umue aveho vekahi mehinangelo lia Huku momalangalo mavekeiva ondaka ya [Jesus] avatundumo.”

Revelação 21:4 “[Huku] makasekuna ononkhuka momaiho avo, ononkhia, okulila, no nongembia kamavikakalako vali.”

Omahunga pala Okutavela

Okuti ove utavela komilao Viombimbiliya? Ombimbiliya yapopia okuti ovanthu ovanyingi kamavetavela. Oyo yati: “Kononthiki mbahulililako makuya ovanthu vokulinga omukuele . . . vokulinga ngetyi ovo muene vahanda, nokupopia okuti: ‘Elekeso liokuti Tatekulu weya likahipi? Tunde etyi ovakuakulu vetu vankhia ovipuka vikahi nokutualako ngetyi ankho vikahiale konthyimbi yetungo.’” (2 Pedro 3:3, 4) Mahi, ovanthu ovo, vokutulinga omukuele vekahi nokupengesa unene. Tala omahunga ekuana alekesa omokonda yatyi tupondola okutavela kuetyi Ombimbiliya ipopia:

(1) Kohale, Huku wahanyaunineko onondingavivi pano pohi. Ongeleka imue onene, Ombila onene yalokele kononthiki mba Noe.—2 Pedro 3:5-7.

(2) Ondaka ya Huku, yapopia nokuayandyuluka onkhalelo youye hono.

(3) Ovipuka kavikahi “nokutualako ngetyi ankho vikahiale konthyimbi yetungo.” Ovanthu vekahi nokuvilapo vali okulinga ovivi, oohi yetu ikahi nokumoneswa unene emone.

(4) “Onondaka onongwa mbouhamba” hono mbukahi nokuiviswa kononthele ambuho mbo ohi, tyilekesa okuti ‘apa katutu onthyulilo maiya.’—Mateus 24:14.

Onombangi mba Jeova vekahi nokukukonga opo ulilongese navo Ondaka ya Huku, Ombimbiliya, opo ukale vali nenoñgonoko konthele yekevelelo lituala komuenyo wahapu moutumini Wouhamba wa Huku. (João 17:3) Tyotyili, ovanthu mavakakala nomuenyo umue omuwa komutue wandyila. Apa katutu, onkhalelo yovanthu maikaviuka! Okuti noove mokakalamo?

[Ehangununo liolutalatu pefo 7]

Ovanthu aveho vapopia okuti ovipuka vikahi nokutualako ngetyi ankho vikahiale, vekahi nokupengesa unene.

[Ehangununo liolutalatu pefo 8]

Okuti noove mokakalamo?