Oñgeni Upondola Okunoñgonoka Ombimbiliya 3. Tavela Ombatelo ya Vakuenyi

Etyi omulume umue utiwa Edward John Eyre alinga oungendi umue mehoko lio Nullarbor, ovanthu vakalamo avalongesa Eyre oñgeni ena okulinga pala okutapa omeva monomphunda Ononene mbeheke, no momiti viomingalipi. Mokonda wetavelele ombatelo ya vana vei nawa otyilongo otyo, atyihupisa omuenyo wa Eyre.

NGETYI ongeleka oyo ilekesa, opo tutyivile okulinga nawa otyipuka tyimue tyipuiya, tuesukisa ombatelo yomunthu umue unale ounongo konthele oyo. Tupu, otyo tyelifwa na tyina ove uhimbika okutanga Ombimbiliya.

Jesus ankho kakevelela okuti ovalongwa vae mavanoñgonoka Ombimbiliya tyihena ombatelo ya vakuavo. Nthiki imue, “oe waikula nawa omitima viavo opo vanoñgonoke ehangununo lio Vihonekwa.” (Lucas 24:45) Jesus waimbukile okuti ovatangi vo Mbimbiliya vesukisa ombatelo opo vanoñgonoke etyi Ovihonekwa vilongesa.

Olie Mekukuatesako?

Jesus watumine ovalongwa vae votyotyili opo vaave ombatelo oyo. Puetyi nkhele eheneende keulu, Jesus watuma okuti: “Moluotyo, endei, kalongesei ovanthu movilongo aviho, . . . velongesei okutavela ovipuka aviho ame nemutuma.” (Mat. 28:19, 20) Otyilinga tyotete tyo Vakristau okulongesa, iya otyo tyakutikinya okuhangununa oñgeni onondonga mbo Mbimbiliya mbupondola okuundapeswa momuenyo kese nthiki. Ovakristau votyotyili vakuatesako vakuavo okunoñgonoka Ombimbiliya.

Palamba vala okamuvo kehehi etyi Jesus avela ovalanduli vae otyilinga otyo, iya apamoneka otyipuka tyimue otyiwa. Ombimbiliya ipopia konthele yomulume umue woko Etiopia ankho ukahi nokutanga onthele imue yeulo lia Isaia. Oe wavasa onondaka mbumue mbeulo ahanoñgonokele nawa. Ombimbiliya ilekesa okuti oe ankho ukahi nokutanga oversikulu ahanoñgonokele yati: “Oe waetua ngongi peipaelo, iya ngatyina ongi yati filuu pu vana veiteta omainya, tupu nae kaikulile omulungu wae. Mokueenda kuononkhumbi mbae, ekoyeso elipolwa. Olie makahipulula konthele yonthuko yae? Mokonda omuenyo wae kombanda yoohi weupolua.” —Atos 8:32, 33; Isaías 53:7, 8.

Omulume oo apulu Filipe, Omukristau omunongo ankho wii nawa Ovihonekwa, okuti: “Omuuli ankho ukahi nokupopia konthele yalie? Konthele yae muene ine okonthele yomunthu omukuavo?” (Atos 8:34) Omulume oo woko Etiopia ankho wenda apeho ko Jelusalei okukafenda, tupu ankho ulikuambela okuita ehongolelo. Oe ankho ukahi nokutanga nombili onene, nokueliola omutima. Mahi, oe ankho kanoñgonokele onondaka ekahi nokutanga. Nomutima weliola oe waita ombatelo ku Filipe. Ehangununo lia Filipe liahambukiswa unene omulume nokumuavela ondundo yokukala Omukristau.—Atos 8:35-39.

Onombangi mba Jeova vatualako novilinga vialingilwe na Filipe no Vakristau ovakuavo vokohale. Movilongo 235, Onombangi velipakula pala okukuatesako vakuavo okunoñgonoka oityi tyili Ombimbiliya ilongesa. Ovo vaundapesa Ovihonekwa pala okulongesa. Ovilinga ovio viokulongesa Ombimbiliya viakutikinya okutala nawa oityi Ombimbiliya ipopia konthele yosapi imue ine onthele imue.⁠a—Tala okakasa “Omakumbululo Afuapo Konthele Yomapulo Ombimbiliya.”

“Omapulo Ange Aeho Akumbululwa”

Steven, na Valvanera, na Jo-Anne, vapopiwa ponthimbi yonthele ei, vahimbika okulilongesa Ombimbiliya no Nombangi mba Jeova. Steven wati: “Tyanthyuvisa okueeleka omuvalu wo nondonga mbo Vihonekwa ine omahipululo, aviuka apeho aava omakumbululo avasiwa Mombimbiliya. Etyi ankho nkhele nehelilongesa Ombimbiliya no Nombangi mba Jeova, nawike wandekesile oñgeni ndyina okutyilinga. Nahambukwa unene etyi natala okuti Ombimbiliya hamukanda undapeswa pala okulipatana, nokuhaave omakumbululo afuapo, nokupopia ovipuka vielikalela konthele ya Huku kumue Nombimbiliya.”

Valavanera wetavela okuti: “Atyiho nelilongesa no Nombangi tyaviuka nokuayandyuluka nawa. Nelilongesa okuti ame hipondola okutavela vala ovipuka mokonda tyalongeswa Mokapela, mahi, ndyina okutavela mokonda ehangununo liovipuka aviho liaviuka” Jo-Anne wapopia okuti: “Mokonda omapulo ange aeho akumbululwa no Mbimbiliya, nakala nonthilo onene na Muene wayo, mokonda oe utyii okuti ovanthu mavakala nomapulo omanyingi iya wakala nonthumbi opo Ombimbiliya ikale no makumbululo afuapo.”

Okuti ove wii Ombangi imue ya Jeova? Enda kapopie nae opo ekulekese oñgeni elilongeso lio Mbimbiliya lilingwa? Inkha kwi Ombangi naike ya Jeova, mbambavo vehonekela okuundapesa omanyina ekahi pefo 2 liomukanda ou. Nospilitu ya Huku, nomutima wasukuka, nombatelo yomunthu wafuapo pala okulongesa Ombimbiliya, Ondaka ya Huku kaipuiya okunoñgonoka. Ove upondola okunoñgonoka Ombimbiliya!

[Footnotes]

[Caption on page 8]

Omakumbululo Afuapo Konthele Yomapulo Ombimbiliya

[Caption on page 8]

Ombu o nosapi mbumue mbuhole okupopiwa no Nombangi mba Jeova tyina valongesa ovanthu Ombimbiliya:

• Olipi ehando lia Huku pala o ohi?

• Vokuankhia opi vekahi?

• Okuti tukahi umue “kononthiki mbokuhulilila”?

• Omokonda yatyi Huku ayekelako ononkhumbi?

• Oñgeni Ombunga Yove Ipondola Okukala Nomuenyo Wehambu?

[Caption on page 8]

OITYI OMBIMBILIYA

Tyili

ILONGESA?

[Caption on page 7]

Opo unoñgonoke Ombimbiliya . . . likuambela okuita ospilitu ya Huku, nokutanga nomutima wasukuka, nokutavela ombatelo yavakuenyi