Okuti Ombimbiliya Ipondola Okunoñgonokwa?
“Ombunga yetu itanga Ombimbiliya Ovityalumingu aviho. Tyotyili ame ankho hityihande unene. Ame ndyitavela okuti Ombimbiliya Ondaka ya Huku, mahi, ovipuka ovinyingi ndyitanga ankho vimphuiya unene okuvinoñgonoka.”—Steven Britain.
Puetyi ankho ndyina omanima 17, nahetekelele okutanga Ombimbiliya. Ankho okuinoñgonoka tyepuiya unene, moluotyo, andyityiyekepo.”—Valvanera Spain.
“Ame ndyitanga vala Ombimbiliya mokonda ndyisoka okuti, mokonda ndyi mu Katoliku otyo ndyina yokulinga. Nakala omanima etatu pala ndyimane okuitanga! Mahi natyike nanoñgonokamo.” —Jo-Anne, Australia.
OMBIMBILIYA itualako okukala omukanda weliyandyana kovanthu aveho mouye. Utualako okulandeswa vali unene tyipona omikanda aviho omikuavo, momalaka omanyingi, mononkhalelo mbelikalela tyipona kohale. Anthi, ovanthu ovanyingi vena Ombimbiliya, vatala okuti kavetyivili okuinoñgonoka. Okuti noove una otyitateka ngotyo?
Okuti Huku Uhanda Tunoñgonoke Ondaka Yae?
Ombimbiliya ipopia okuti: “Ovihonekwa aviho o Huku watuma vihonekwe.” (2 Tim. 3:16) Tyotyili, Jeova Huku oe wetuavela Ombimbiliya. Okuti oe uhanda tunoñgonoke Ondaka yae? Ine oe walinga Ombimbiliya opo ihanoñgonokwe novanthu aveho, mahi, ainoñgonokwa vala novanthu vamue, ngo nonkhalamutue mbo nongeleya ine Ovanongo konthele Yombimbiliya?
Tala onoversikulu ombu mbulandulako Mbombimbiliya:
“Otyitumino etyi hono ndyikupopila katyalemene unene pala ove, katyikahi kokule.”—Deuteronômio 30:11.
“Eyandyuluko lio Ndaka yove liava otyitei. Vana vahanoñgonokele avakala ovanongo.”—Salmo 119:130.
“Povola yatyo oyo [Jesus] wakala nehambu enene mospilitu sandu iya ati: ‘Ame ndyikuhivilika mounyingi Tate, Muene weulu noohi, mokonda waholeka ovipuka evi kovanongo no vokualunguka. Mahi, wevihololola kovatutu.’”—Lucas 10:21.
Muene Wombimbiliya tyotyili uhanda ove unoñgonoke Ondaka yae! Mahi, namphila Huku ahanda ovanthu vanoñgonoke Ondaka yae ovanyingi vatala okuti tyepuiya okuinoñgonoka. Oityi tyipondola okukukuatesako? Ononthele mbulandulako mbuna onondonga ononthatu mbupondola okukukuatesako okunoñgonoka Ombimbiliya.