Onondaka Onongwa Momalaka 500

MOKUEENDA kuovita ko Rwanda, okanthumbo kamwe kehehi kovapitiyi, vatunda momaumbo avo, okusapo atyiho ankho vena. Mahi, kavasilepo ono kombutador mbavo mbo peke, avaende nambo kononthanda vakaholama. Omokonda yatyi? Opo vatualeko okupitiya melaka lio Kinyarwanda, omikanda viomupika wekolelo.

Omukai umwe omufikuena kokumbili kuo Asia, uhoneka ko kombutador yae alo mokati kovinthiki, elikuatehila namphila epuila, kuatokota, nolusi pamwe luenda, tupu pamwe otyo tyityika ovilinga viae viokupitiya. Oityi ankho ahanda? Ankho uhanda okumana momuvo wanakua.

Ovapitiyi ovo valinga onthele membamba lio 2.300 ya vana velipakula movilinga ovio, ponomphangu 190 okuliseta nouye. Vena omanima elikalaila, okutunda po vomanima 20 alo 90. Vaundapa nononkhono, opo ovanthu momalaka 500, vatambule onondaka mbuungumanesa mbo Mbimbiliya.—Revelação 7:9.

Vihika Kovanthu Vomalaka Omanyingi

Momanima ano, ovilinga vio Nombangi mba Jeova viokupitiya, vikahi nokuliyawisa unene. Menima 1985, Omutala Womulavi ankho upitiyua vala momala 23. hono, Omutala Womulavi ukahi nokupitiyua momalaka 176. Vilingwa kumwe momalaka oo aeho, opo ovatangi mouye auho, velilongese otyipuka tyike momuvo wike.

Momalaka atuuka 50, omukanda vena vala, Omutala Womulavi upitiya apeho. Omokonda yatyi? Omokonda omaongano okulinga omikanda viokulandesa, kavasukile nokupitiya momalaka opotyilongo. Anthi, Onombangi mba Jeova ouye auho, vaovola okuhikiya omikanda viavo kovanthu ovanyingi, opo Ondaka ya Huku, nomikanda vapola mo Mbimbiliya, vihika kese kuna kuesukisa.—2 Coríntios 8:14.

Ovanthu vapanda unene onondaka mbo Mbimbiliya melaka liavo muene. Mongeleka, kononthiki mbuno kukahi nokulingwa omikanda Viombimbiliya melaka lio Miskito, lipopiwa novanthu valamba po 200.000, ko Nicaragua. Omukai umwe waita Omukanda Womahipululo Ombimbiliyaa melaka lio Miskito. Etyi eupewa ankho pena onkhalamutwe umwe wo ngeleya yopotyilongo. Etyi amona omukanda oo omuwa, onkhalamutwe oyo ahande ukale wae. Omukai oo aanye okumupao. Alo umwe ahande okumuavela ononeka 20 mbokafe, momukanda oo, mahi omukai ketavelele!

Okupolelela menima 1999, kukahi nokupitiyua omikanda viomupika wekolelo, momalaka alamba po 22, ovanthu vakala mo Mexico, okukutikinyamo elaka lio Maya, Nahuatl, no Tzotzil. Nkhele kapenelambe omanima ekwi, omawaneno Onombangi mba Jeova momalaka oo, novimpholo, ekahi nokuliyawisa unene motyilongo otyo. Ankho ali omawaneno 72, pahe alamba po 1.200. Onombangi mba Jeova, vekahi nokukuna onondaka mbo Mbimbiliya momitima viovanthu, mahi avayeke Huku amenese ombuto oyo yotyili.—1 Coríntios 3:5-7.

Ombimbiliya Hono Yapitiyua Momalaka 80

Hono, Onombangi mba Jeova, vekahi nokuundapa nononkhono mbokupitiya Ombimbiliya Tradução do Novo Mundo das Escrituras Sagradas aiho ine onthele imwe yayo, momalaka 80. Otyo tyikahi nokueta ehambu patyi? Ombangi umwe ko Afilika do Sul, wapopia konthele Yombimbiliya melaka lio Tswana okuti: “Etyi, otyiti otyiwa unene. Maimbatela okunoñgonoka vali nawa Ondaka ya Huku, nokuipanda vali. Onondaka mbukahimo, mbapepuka okumbutanga nokuhambukiswa.” Omulume umwe ko Moçambique utanga o Tsonga, wahoneka okuti: “Namphila tuna omikanda aviho viomupika wekolelo, tyihena Ombimbiliya, ankho tyilifwa vala nomititimo nomitetanena viombila, mahi aihaloko! Anthi, pahe ombila yawa etyi tuapewa Ombimbiliya, Tradução do Novo Mundo melaka lio Tsonga.”

Monkhalelo yavilapo, vana vapitiya, nokuyandyaneka onondaka onongwa mbukahi mo Mbimbiliya, vekahi nokufuisapo eulo limwe lio kohale. Jesus Kristu watile: “Onondaka ombu onongwa mbouhamba wa Huku, mambukaiviswa kombanda yoohi aiho, pala oumbangi movilongo aviho, konyima onthyulilo aiya.”—Mateus 24:14.

[Onondaka Poutoi]

[Ografico pefo 30]

(Onondaka mba onganekua nawa, tala momukanda)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

OMBALULO YOMALAKA

[Omalutalatu pefo 29 30]

Onombangi 2.300 velipakula pala okupitiya omikanda viomupika wekolelo momalaka 500.

BENIN

SLOVENIA

ETIOPIA

GRÃ-BRETANHA