Jeremia Katalamene

Longesa Ovana Vove

OKUTI ove lumue wasoyele ohande okutalama?—a Ovanyingi velitehelelale ngotyo. Omukuendye Jeremia nae ankho otyo ahandele okulinga. Mahi, kayekele etyi vakuavo vapopia ine valinga tyimutalamese. Matupopi oñgeni Jeremia ankho ali omunthu wakolela ku Huku, mahi no ngotyo oe ankho wahandele okutalama.

Etyi Jeremia nkhele ehenetyitue, Huku yotyotyili Jeova, wemuholovona opo akale omuuli, opo alondole ovanthu okuti kavekahi nokuhambukiswa Huku. Utyii etyi Jeremia apopilile Jeova etyi palamba omanima komutwe?— “Ame hityivili okupopia, mokonda nkhele ndyimututu.”

Ove usoka okuti Jeova wakumbululile ñgeni Jeremia?— Nohole, mahi monkhalelo yapama, Jeova wati: “Uhatie, ‘Ame ndyimututu.’ Mahi una okuenda kuaveho vana nekutuma; iya okapopia atyiho nekutuma. Uhakale nowoma.” Mokonda yatyi? Jeova wapopia okuti, “Ame ndyikahi nove mandyikuyovola.”—Jeremias 1:4-8.

Mahi, ngetyi tuetyimona, Jeremia konyima wakala tyasoya. Welitehelela ngotyo mokonda ankho ukahi nokulingwa omukuele moluokuumbila Huku. Jeremia wati, ‘Aveho vekahi nokundyola ononthiki ambuho, nokundinga omukuele.’ Moluotyo, atokola okutalama. Oe ati, “Himapopi vali konthele ya [Jeova], himapopi vali konthele yenyina liae.” Mahi, okuti watalamene umue?

Jeremia wati, ‘momutima wange, ondaka ya Jeova ikahi ngotupia tuatema, tuaikilwa momankhipa ange iya atyimphuilisa okukala ngotyo.’ (Jeremias 20:7-9) Namphila Jeremia ovikando vimwe ankho akalele nowoma, ohole yae na Jeova kayemuyekele okutalama. Tutalei oñgeni Jeremia aamenenue mokonda yokuatualako.

Jeova watolela Jeremia opo alondole ovanthu okuti o Jelusalei maihanyaunuapo inkha kavayekepo okulinga ovipuka ovivi. Etyi Jeremia aava elondolo olio, ovanthu avanumana iya avati: “Omulume ou una wesukisa okuipawa.” Nongotyo, Jeremia eveiti opo “vetavele ondaka ya Jeova.” Iya evepopila okuti: ‘Kalei mutyii okuti inkha mundyipaa, mukahi nokuipaa omulume uhena etyi alinga, mokonda Huku wanthuma opo ndyimupopile.’ Ove utyii etyi tyapitapo?—

Ombimbiliya yati: “Ovatumini novanthu aveho, vapopila ovanakwa novauli okuti: ‘Omulume ou kesukisile okuipawa, mokonda oe wetupopila menyina lia Jeova Huku yetu.’” Mokonda Jeremia kayekele owoma umusoyese, Jeova emuamena. Pahe, matutale oityi tyapitile na Urijá omuuli omukuavo wa Jeova walinga ovipuka monkhalelo yelikalela.

Ombimbiliya yati, ‘Urijá ankho ukahi nokuula konthele yo Jelusalei ngetyi ankho tyapopile Jeremia.’ Mahi, etyi Ohamba Jeoiakim anumana na Urijá, ove utyii etyi Urijá alinga?— Oe wakala nowoma, ayekepo okulinga ehando lia Huku, atilila mo Egitu. Moluotyo, ohamba yatuma ovalume vekemuovole, avemueta. Etyi vemueta, utyii etyi ohamba ondingavivi yalinga?— Oe waipaa Urijá nomutunga!—Jeremias 26:8-24.

Omokonda yatyi upopila okuti Jeova waamenene Jeremia, mahi kaamenene Urijá?— Okutala Jeremia wakalele nowoma, nga Urijá, mahi, Jeremia kayekelepo okuumbila Jeova iya aende nkholo. Oe katalamene. Oityi tupondola okulilongesila ku Jeremia?— Ovikando vimwe, tupondola okutala okuti tyepuiya okulinga etyi Huku apopia, mahi tuesukisa apeho okuyumba onthumbi mu Huku nokumutavela.

[Onondaka Poutoi]

[Ehangununo liolutalatu pefo 23]

Omapulo:

❍ Otyilinga patyi Huku aholovonene pala Jeremia?

❍ Omokonda yatyi Jeremia ahandele okutalama?

❍ Omokonda yatyi Jeremia aamenenue, mahi Urijá kaamenenwe?

❍ Oityi ove welilongesa ku Jeremia?