Okuti Ovanthu Aveho Onondalawa Venda Keulu?
ETYI Jesus alia ondalelo yahulililako nono apostolu mbae motyinthiki tyahulililako kononkhia mbae, Oe walaele okuveavela ondyambi yokuenda keulu. Oe wati: “Meumbo lia Tate yange muna onondyuo ononyingi. Inkha mutupu ñgeno nemupopila tyo, mokonda ndyienda opo ndyikemupongiyile omphangu.” (João 14:2) Omokonda yatyi Jesus evepakela omphangu keulu? Oityi mavakalingako?
Jesus ankho ukahi nokusoka kotyilinga tyakolela pala ovalongwa vae. Mokueenda kuotyinthiki otyo, oe wati: “Onwe, onwe muakala naame pononkhumbi mbange, ame ndyilinga omphango nonwe, ngetyi Tate alinga naame omphango, youhamba.” (Lucas 22:28, 29) Huku walaele Jesus okuti makala Ohamba maavela ovanthu outumini omuwa, otyipuka vesukisa unene. Jesus mayovola ovanthu kononkhumbi nokuhanyaunako vana vevemonesa emone. Namphila Jesus makatumina ovanthu “alo kuna kuaoyela oohi,” otyipundi tyae matyikala keulu.—Salmo 72:4, 8; Daniel 7:13, 14.
Mahi, Jesus kamakatumina aike. Moluotyo, oe walaele ono apostolu mbae okuti mevepakela omphangu keulu. Ovo vaholovonwa tete “opo vakatumine ngo nohamba kombanda yo ohi.”—Revelação 5:10.
Veñgapi mavaende keulu? Ngetyi tyikahi momautumini aeho, ovatumini Vouhamba wa Huku kavehi okuveeleka novanthu ovanyingi mavakakala mombuelo youtumini oo. Jesus wapopila vana mavakatumina nae okuti: “Uhakale nowoma kahambo okatutu, mokonda Tate yenyi wapanda okumuavela ouhamba.” (Lucas 12:32) “Okahambo oko okatutu” makakala novanthu 144,000. (Revelação 14:1) Ovanthu ovo kavehi tyina tuveeleka novanthu ovanyingi mavakakala nomuenyo wahapu pano pohi mombuelo Youhamba oo.—Revelação 21:4.
Tyotyili, haavehoko ovanthu onondalawa mavaende keulu. Apostolu Petulu wapopile nokuayandyuluka konthele Yohamba ongwa David okuti: “David kalondele keulu.” (Atos 2:34) João Batista wali omunthu omuwa. Mahi, Jesus walekesile okuti oe kamaende keulu pala okukatumina ngohamba. Jesus wapopile okuti: “Puvana vatyitwa novakai petupu omunthu omunene upona pu João Batista. Anthi, omututu mouhamba wo keulu, oe omunene vali tyipona João.”—Mateus 11:11.
Okuti Ove Mokapewa Ondyambi Yovanthu Ovawa?
Oityi omunthu ena okulinga opo apewe ondyambi yokukala nomuenyo wahapu pano pohi? Jesus wati: “Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakahanyaunueko, mahi akakale nomuenyo wahapu.” (João 3:16) Tala okuti ohole Huku ena novanthu yemulingisa okuava omuenyo wahapu pala aveho, mahi, ondyambi oyo maipewa vala vana “vena ekolelo.”
Omunthu wesukisa enoñgonoko liafuapo opo akale nekolelo. (João 17:3) Ove molekesa okuti umunthu omuwa inkha ulilongesa vali konthele yehando lia Jeova pala ovanthu. Kala nekolelo muetyi ulilongesa. Iya, kala nonthumbi yokuti ove una omphitilo yokukala nomuenyo wahapu.
[Ehangununo liolutalatu pefo 7]
Oityi Ombimbiliya Ipopia?
Epulo:
Oityi tyipita novanthu onondalawa tyina vankhia?
Ekumbululo:
“Vokuankhia kavei vali natyike.”—ECLESIASTES 9:5.
Epulo:
Ekevelelo patyi ovanthu onondalawa vena komutwe wandyila?
Ekumbululo:
“O ola ikahi nokuya tyina aveho vekahi momalangalo mavekeiva ondaka yae [Jesus] iya avatundumo.”—JOÃO 5:28, 29.
Epulo:
Otyinyingi tyovanthu onondalawa matyikakala pi?
Ekumbululo:
“Ovaviuki mavapiñgana oohi, avakakalamo apeho.”—SALMO 37:29.