Ombimbiliya Tyilityili Ondaka Yatumwa Okuhonekwa na Huku

TYOTYILI oityi apostolu Paulu ahandele okupopia etyi ati Ombimbiliya “yatumwa okuhonekwa na Huku”? (2 Timóteo 3:16) Paulu wahoneka melaka lio Gregu, okuundapesa ondaka ihangununa okuti “yafilwa na Huku.” Paulu wahandele okupopia okuti Huku waundapesa ospilitu sandu yae ihongolele ovahoneki Vombimbiliya opo vahoneke vala etyi Oe evetuma.

Apostolu Petulu wapopia okuti, ovahoneki ovo Vombimbiliya “vahoneka onondaka mba Huku kononkhono mbae.” (2 Pedro 1:21) Tupu, apostolu Paulu wahoneka omikanda Viombimbiliya okuti ‘ovihonekwa vikola, vipondola okutukalesa nonondunge pala eyovo, mokonda yekolelo mu Kristu Jesus.’—Timóteo 3:15.

Ovanthu ovanyingi kavetavela okuti Huku oe muene Wombimbiliya. Sir Charles Marston omulume wokuheyulula pomatunthu, wahonekele konthele yovanthu ovo okuti ‘vapenya Ombimbiliya,’ avepopi okuti kaisilivila. Vamwe veitala ngatyina omukanda umue “omukulu upopia ounkhembi no noñgano.”

Omokonda Yatyi Upondola Okuyumba Onthumbi Mombimbiliya

Ombimbiliya ipondola okuyumbwa onthumbi? Tyakolela utokole nawa konthele oyo. Omokonda yatyi? Mokonda inkha Ombimbiliya ina onondaka mba Huku owova okuheiyumbu onthumbi. Inkha utala vala Ombimbiliya ngatyi ondaka yovanthu tyipona Ondaka ya Huku, kumayeke oyo ihongolele ovituwa viove nomatavelo ove.—1 Tessalonicenses 2:13.

Oñgeni motokola inkha upondola okuyumba onthumbi Mombimbiliya? Oñgeni utokola inkha uyumba onthumbi komunthu wavasa? Tyotyili, tyipuiya unene okuyumba onthumbi momunthu umue uhanoñgonokele nawa. Putyina unoñgonoka nawa ovanthu, mokueenda kuomuwo moimbuka inkha ovakuatyili, nokuatokala okuyumbwa onthumbi. Tupu, upondola okunoñgonoka Ombimbiliya monkhalelo oyo. Uhetavele omapulo anguanguanesa ine omalongeso ahaviukile anyona onthumbi Mombimbiliya. Ovola omuwo opo ulilongese ononthele mbulekesa okuti Ombimbiliya “yatumwa okuhonekua na Huku.”

Vana Veliti “Omapanga” Ombimbiliya Vekahi Nokuipopia Omapita

Uhasoye mokonda yovanthu vamwe veliti “omapanga” Ombimbiliya vekahi nokupopia okuti oyo kaipopi otyili, nokuhayumbwa onthumbi. The New Dictionary of Theology (Novo Dicionário de Teologia) yati, hono, ovanthu ovanyingi vapopia konthele Yombimbiliya, namphila veliti Ovakristau, “vapopia vala ovihonekwa ngatyina omahipululo ovanthu.”

Ovanongo ovanyingi vapopia unene konthele yo oku kuatuka omikanda Viombimbiliya. Mongeleka, vamwe vapopia okuti omuuli Isaia haeko wahoneka omukanda wa Isaia. Ovo vati, omukanda wa Isaia wahonekua konyima yononkhia mba Isaia. Lowther Clarke wapopia konthele Yombimbiliya okuti “yahonekwa novanthu ovanyingi, mokueenda kuomanima omanyingi.” Mahi, onondaka ombo, kambelikuatele netyi Jesus Kristu novalongwa vae vapopia konthele yomukanda wa Isaia.—Mateus 3:3; 15:7; Lucas 4:17; João 12:38-41; Romanos 9:27, 29.

Tyavilapo vali, vana vokupopia omapita Ombimbiliya, nga J. R. Dummelow, vati omaulo avahiwa momukanda wa Daniele “omahipululo apitale kohale, mahi una wahoneka omahipululo oo, weepopia ngatyina omaulo.” Tyotyili, ovo vaanya oumbangi Jesus Kristu aavelele. Jesus walondola etyi oe aihana okuti “otyipuka tyitoyesa tyieta ehanyu, tyikahi lutai pomphangu ikola, ngetyi tyapopiwa menyina liomuuli Daniele.” (Mateus 24:15) Tyitavela Omukristau umwe etavele okuti Jesus Kristu walinga onthele mokuyondya ovanthu—okukemba okuti, omahipululo apopiwa vala novanthu omaulo? Au.

Okuti Otyo Tyesukisa Umwe?

Ove upondola okulipula: “Mahi okuti tyesukisa umwe okunoñgonoka olie wahoneka omikanda Viombimbiliya?” Enga, tyesukisa unene. Okuti ñgeno wetavela komukanda umwe ovanthu vati muna onondaka mbepanga liove, inkha wanoñgonoka okuti tyotyili haeko wahoneka omukanda oo? Soka ñgeno omunongo umwe ukutolela okuti omukanda ha wotyotyili, wahonekua nomapanga ae ankho vetavela okuti eli ehando liepanga liove. Okuti moutale ngatyina una esilivilo? Ñgeno wakala nonthumbi yokuti tyotyili omukanda upopia umue ehando liepanga liove?

Otyo tyelifwa Nombimbiliya. Katyihuvisa okuti ovanthu ovanyingi—alo umue vana veliti Ovakristau, kavetavela etyi Ombimbiliya ipopia konthele yokulinga omaumbalehi, okupopia otyili, novikuavo vali. Ovikando vimwe weiviliale ovanthu okupopia okuti: “Mahi etyi tyikahi mo Testamendu onkhulu!”—tyilekesa okuti tyitupu esilivilo enene. Namphila ovanthu vapopia ngotyo, apostolu Paulu wapopia o Testamendu Onkhulu okuti “ovihonekwa vikola” “viatumwa okuhonekua na Huku.”

Hamwe ove upondola okupopia okuti: “Tyotyili ove kupondola vala okuanya ovipuka aviho vipopiwa novanongo, na vana vokuelilongesa unene kosikola.” Au! Mongeleka, onthue tupandula oukuatyili wavana velilongesa unene kosikola vetukuatesako okunoñgonoka Ombimbiliya. Tyayandyuluka nawa okuti Mombimbiliya muavasiwa oviponyo vimwe ovitutu mokonda yapitiyua ovikando ovinyingi mokueenda kuomanima. Hinangela okuti: Tyelikalela unene okuimbuka okuti Mombimbiliya muavasiwa oviponyo vimwe ovitutu tyipona okuanya Ombimbiliya aiho ngatyina muna omalusoke ovanthu.

Tualako Nekolelo “Movihonekwa Vikola”

Katyisukisa vala okupopia okuti Ombimbiliya yatumwa na Huku, Paulu wapopila Timóteo omokonda yatyi ovihonekwa ovio viakolela. Oe wati: “Kononthiki mbahulako” “onondingavivi no vomatutu mavakavilapo unene, okuyondya nokuyondyua.” (2 Timóteo 3:1, 13) Mahi, kononthiki mba Paulu tyafuile ‘ovalume ovanongo nokualunguka’ ankho vaundapesa ‘omalongeso omatutu’ pala okuyondya ovanthu nokutepulula ekolelo liavo mu Jesus Kristu. (1 Coríntios 1:18, 19; Colossenses 2:4, 8) Opo veliyakulile komahongiliyo avo, apostolu Paulu walondola Timóteo opo ‘atualeko movipuka elilongesa tunde pouna movihonekwa vikola’ viaawa na Huku.—2 Timóteo 3:14, 15.

Tupu, tyakolela unene pala ove ulinge ngotyo mokueenda ‘kuononthiki mbuno mbokuhulila.’ Uhatombe otyiponga tyokuyondyua ‘nomalongeso omatutu’ apopiwa novanthu vokualunguka unene. Mahi, Ngovakristau votete, liyakulila mokuyumba onthumbi kuetyi welilongesa konthele Yombimbiliya—tyotyili Ondaka yatumwa okuhonekwa na Huku.

Onombangi mba Jeova vena ehambu liokukuvatela okupameka ekolelo Mombimbiliya. Mongeleka, ovo vapondola okukulekesa oñgeni ovitumino Viombimbiliya viayumbwa onthumbi tunde kohale, oñgeni etyi Ombimbiliya ipopia tyelikuata nounongo womouye namphila kailongesa konthele youongo oo. Tupu, mavekulekesa oñgeni Ombimbiliya yelikuata kumwe tunde oku yahimbikila alo oku yavitukila, oñgeni omaulo Ombimbiliya otyotyili—novipuka ovikuavo vali. Inkha wahanda ita kovahoneki vomukanda ou, una onondaka mbuhole okukuatesako ovanthu ovanyingi vomutima waviuka okutala okuti Ombimbiliya tyotyili Ondaka ya Huku.

[Olutalatu pefo 5]

Oñgeni utokola inkha uyumba onthumbi komunthu wavasa?

[Olutalatu pefo 6]

Onthue tupandula oukuatyili wavana velilongesa unene kosikola vetukuatesako okunoñgonoka Ombimbiliya