Okuti Ombimbiliya Ondaka Umwe ya Huku?
“Ovihonekwa aviho viatumwa okuhonekwa na Huku nokuna esilivilo pala okulongesa, nokuviyula, nokuviukisa ovipuka, nokulonga nouviuki. Opo omunthu wa Huku akale tyafuapo nawa, nokuapongiyua nawa pala ovilinga aviho oviwa.”—2 TIMÓTEO 3:16, 17.
ONONDAKA ombo mbokuakolela mbapopiwa no apostolu Paulu, mbulekesa nawa okuti Ombimbiliya yakolela unene! Oe ankho ukahi nokupopia onthele Yombimbiliya ankho yahonekwale momuvo oo—ovihonekwa ovanthu pamwe vapopia okuti o Testamendu Onkhulu. Mahi, onondaka mbae tupu mbupopia omikanda aviho 66 vio Mbimbiliya, okukutikinyamo vina viahonekwa novalongwa vekolelo va Jesus pomuvo wo Vakristau votete P.K.
Okuti nove upandapesa unene Ombimbiliya nga Paulu? Ove utavela okuti ovahoneki vo Mbimbiliya vafiminwa na Huku? Ovakristau vokohale ankho vetyitavela. Olio apeho etavelo lio Vakristau votyotyili. Mongeleka, omulume umwe utiwa John Wycliffe, ankho utala Ombimbiliya ngo “tyitumino tyotyili tyihaponyo.” Omukanda Novo Dicionário da Biblia, wapopia konthele yonondaka mba Paulu mbukahi pombanda okuti, “mokonda Ombimbiliya yafiminwa na Huku, atyiho tyikahimo otyili.”
Okupilulula Omalusoke Konthele Yombimbiliya
Mononthiki mbuno ovanthu vetupu vali onthumbi Mombimbiliya. Omukanda As Religiões do Mundo, upopia okuti “momulungu, ovanthu aveho Ovakristau vetavela Ombimbiliya ihongolele ovilinga viavo nomatavelo.” Mahi, otyo hatyiliko. Ovanyingi hono vatala Ombimbiliya ngo “mukanda womahipululo omatutu.” Mokonda vetyii okuti Ombimbiliya yahonekwa novanthu vokuna ekolelo enene, ovo vatala ovahoneki ovo ngovalume valinga ononkhono pala okunoñgonoka otyili konthele ya Huku, mahi, ankho vetupu enoñgonoko neyandyuluko onthue tuna hono.
Tyotyili, hono ovanthu vehehi vayeka Ombimbiliya ihongolele omalusoke avo novilinga. Mongeleka, ovikando viñgapi ove utehelela ovanthu vapopia okuti konthele yovituwa ovitumino Viombimbiliya ovikulu iya vitupu esilivilo? Ovanyingi vasoka okuti vapondola okulongesa ovitumino vimwe Viombimbiliya ovanthu vahanda okutehelela ine okuanya ovitumino ovio inkha vahanda. Vamwe veliti Ovakristau, kavetavela etyi Ombimbiliya ipopia konthele youndalelapo, noumbalehi, nounkhembi, nounkholwa.—1 Coríntios 6:9, 10.
Omokonda yatyi? Kohale, omulume umwe wokuheyulula omatunthu utiwa Charles Marston wapopia ehunga limwe momukanda wae una osapi yati The Bible Is True. Oe wati, ovanthu “vetavela liwa omatutu apopiwa novanthu ovanyingi vehetavela Ombimbiliya.” Okuti otyo otyili hono? Oñgeni ove una okutala onondaka nomalongeso avana vehena onthumbi Mombimbiliya? Tala etyi onthele ilandulako ipopia konthele oyo.