Ovatangi Vapula . . .

Okuti Huku Una Oku Atuka?

▪ Ombimbiliya ikumbulula okuti Huku utupu oku atuka. Huku oko ekahiale tunde konthyimbi youye. Namphila tyipuiya okunoñgonoka okuti Huku ukahi ko apeho, mahi katupondola okuanya vala olusoke olo mokonda katuetyinoñgonokele nawa.

Okuti tyaviuka okukevelela okunoñgonoka onondyila ambuho mba Huku? Apostolu Paulu wati: “Omalumono a Huku nounongo wae nenoñgonoko viaya kohi unene ngatyi! Omakoyeso ae kaevilwa okunoñgonoka, onondyila mbae kambuvilwa okuovololwa!” (Romanos 11:33) Omutima wetu kaupondola okunoñgonoka nawa ounongo wa Huku waya kohi nenoñgonoko liae, ngetyi omona ahapondola okunoñgonoka ovipuka aviho konthele yo vohe. Namphila onondaka ombo Paulu atumwa na Huku okuhoneka, mbulekesa haunene ounongo wavilapo wa Huku nokankhenda kae, tupu mbulekesa okuti kuna ovipuka konthele ya Jeova Huku no yovilinga viae, viaya unene kohi tuhevili okunoñgonoka nawa. Povipuka ovio, tyimwe o tyokuti Huku utupu oku atuka. Anthi, tupondola okuyumba onthumbi aiho muetyi Ombimbiliya ilongesa konthele ya Huku. Jesus Kristu wapopia konthele yovihonekwa vikola okuti: “Ondaka yove otyili.”—João 17:17.

Moisesi wapopile na Jeova melikuambelo okuti: “Ove apeho oko ukahi, iya mokalako apeho.” (Salmo 90:2, Bíblia de Jerusalém nova edição, revista e ampliada) Apa Moisesi upopia kononthele onombali okuti Huku oko ekahi apeho. Onthele imwe, o komutwe. Jeova oe “Una ukahiko apeho omuvo wahapu.” (Revelação [Apocalipse] 4:10) Ngotyo, Huku makalako alo komavonge-vonge omanima ahapu komutwe. Onthele onkhuavo, o konyima. Huku katungilwe tupu keileko. Anthi, Huku oko ekahi omavonge-vonge omanima konyima.

Moluotyo, tyaviuka okuti Huku oe vala watokala enyina lienkhimano “Ohamba yomuvo uhakapwa-pwa.” (1 Timóteo 1:17) Nkhele soka vala: Jesus Kristu, nomambamba onoandyu keulu, novanthu pano pohi, aveho vena onthuko, mokonda vatungwa. (Colossenses 1:15, 16) Anthi, Huku ha ngotyo ko. Okutualako okusoka okuti Huku nae watungua, matyikatula epulo liepuiya vali, liokuti olie watunga Omupakeko watyiho. Na wike, Jeova ukahiko “tunde komuvo uhapu alo komuvo uhapu.” (Salmo 90:2, Bíblia Sagrada, na linguagem de hoje) Ine, Jeova ukahiko “etyi omuvo auho uhenehimbike.”—Judas 25, okatoi.

Ngotyo, paka nawa momutima okuti okupopia okuti Huku ukahiko omuvo uhapu, halusoke vala. Okutala nawa elikuambelo lia Moisesi, lilekesa okuti okupangailako kwa Huku, kutuavela onthumbi yokuti matukapewa tyili omuenyo uhapu alaa. Tupu, tyina omuenyo wetu hono ulamba liwa-liwa, Huku upopiwa okuti ‘otyitunge tyotyili pala onthue, mokueenda kuombuto aiho yovanthu.’ Mokonda Jeova o Tate woluembia, oko ekahi, iya makalako apeho pala ovanthu vae. Pamekwa notyili otyo otyiwa unene!—Salmo 90:1.