Okuti Tupondola Umwe Okuvasa Huku?
“Huku kevilwa okunoñgonokwa.” —Philo wo ko Alexandria, omunongo umwe kotyita tyotete.
“[Huku] kekahi kokule na kese umwe ponthue.” —Saulu wo ko Tarsu, wapopilile ovanongo vamwe mo Atena, kotyita tyotete.
TYINA OVE utanga etyi tyapopia ovanthu ovo vevali, olie wapopia ngetyi ove usoka? Ovanyingi vasoka okuti onondaka mba Saulu yo ko Tarsu, tupu utiwa apostolu Paulu, onongwa, tupu mbupameka. (Atos 17:26, 27) Mo Mbimbiliya muna vali omilao omikuavo. Mongeleka, Jesus walingile elikuambelo lina omulao wokuti ovalongwa vae vapondola okunoñgonoka Huku, nokupewa ononkhano onongwa.—João 17:3.
Mahi, ovanongo nga Philo, ankho vena olusoke luelikalela. Ankho vapopia okuti onthue nalumwe matunoñgonoka Huku, mokonda kevilwa okunoñgonokwa. Otyili otyipi?
Tyotyili Ombimbiliya ipopia okuti kuna ovipuka vimwe konthele ya Huku, vipuiya okunoñgonokwa novanthu. Mongeleka, omuvo Omutungi waviho ekahi-ko kauvilwa okuvalulwa, iya enoñgonoko liae liavilapo, nounongo wae waya kohi, kavivilwa okuelekwa. Viavilapo unene tyipona enoñgonoko liovanthu. Ovipuka ovio vilekesa okuti Huku okueli, mahi kavitutyilika okumunoñgonoka. Tyotyili, okusokolola nawa ovipuka ovio, tyipondola okutukuatesako “okufuena ku Huku.” (Tiago 4:8) Tutalei onongeleka mbehehi, konthele yovipuka ovio vipuiya okunoñgonokwa. Iya atutale ovipuka onthue tupondola okunoñgonoka, konthele ya Huku.
Ovipuka Patyi Vipuiya Okunoñgonokwa?
HUKU UKAHI-KO OMUVO UHAPU: Ombimbiliya ilongesa okuti Huku ukahi-ko “tunde komuvo wahapu alo komuvo wahapu.” (Salmo 90:2) Monondaka ononkhuavo, Huku utupu onthyimbi, tupu kamakala nonthyulilo. Monkhalelo ovanthu vasoka, “omanima ae nawike weevila okuevalula.”—Jó 36:26.
Oñgeni mopolo-ko ouwa: Huku ulaa okuti ove mokakala nomuenyo wapeho, inkha tyotyili umunoñgonoka. (João 17:3) Inkha ñgeno Huku kamakala-ko apeho, oñgeni metyivili okufuisapo omulao oo? “Ohamba yomuvo uhapu” vala, upondola okufuisapo omulao ngoo.—1 Timóteo 1:17.
ONKHALELO YA HUKU YOKUSOKA: Ombimbiliya ilongesa okuti “enoñgonoko lia Huku kalivilwa okuovololwa” mokonda omalusoke ae aya vali peulu tyipona etu. (Isaías 40:28; 55:9) Ombimbiliya ilinga epulo lihakevela ekumbululo, okuti: “Olie wanoñgonoka onkhalelo ya Tatekulu yokusoka, opo emulongese?”—1 Coríntios 2:16. English Standard Version.
Oñgeni mopolo-ko ouwa: Huku upondola okutehelela omalikuambelo omanyingi momuvo wike vala. (Salmo 65:2) Huku uluete alo umwe kese kaila katokela pohi. Okuti nthiki imwe omutwe wa Huku, maukeyula, ehevili vali okukumona nokutehelela omalikuambelo ove? Au, mokonda omutwe wae kauyula. Haunene, kwe “ove wakolela vali tyipona oviila ovinyingi.”—Mateus 10:29, 31.
ONONDYILA MBA HUKU: Ombimbiliya ilongesa okuti ovanthu kavapondola “okunoñgonoka ovilinga Huku yotyotyili alinga tunde konthyimbi alo konthyulilo.” (Eclesiastes 3:11) Ngotyo, onthue nalumwe matunoñgonoka ovipuka aviho konthele ya Huku. Ounongo umoneka monondyila mba Huku, “kauvilwa okuovololwa.” (Romanos 11:33) Mahi, Huku uhanda okuhololola onondyila mbae ku vana vahanda okumuhambukiswa.—Amós 3:7.
Omuvo Omutungi waviho ekahi-ko kauvilwa okuvalulwa, iya enoñgonoko liae liavilapo, nounongo wae waya kohi, kavivilwa okuelekwa
Oñgeni mopolo-ko ouwa: Inkha utanga Ombimbiliya nokulilongesa-yo, motualako okunoñgonoka apeho ovipuka ovipe konthele yonondyila mba Huku. Otyo, tyilekesa okuti tupondola okutualako okufuena vali ku Tate yetu keulu apeho.
Oityi Ove Upondola Okunoñgonoka
Okuhanoñgonoka vala ovipuka vimwe konthele ya Huku, katyilekesa okuti ngotyo katupondola okumunoñgonoka. Ombimbiliya yeyula onondaka mbupondola okutukuatesako okunoñgonoka nawa Huku. Tala onongeleka mbumwe:
ENYINA LIA HUKU: Ombimbiliya itulongesa okuti Huku muene weliluka enyina. Oe wati: “Ame, ame Jeova. Eli, olio enyina liange.” Enyina lia Huku limoneka ovikando 7.000 mo Mbimbiliya, ovinyingi vali tyipona kese nyina livasiwa-mo.—Isaías 42:8.
Oñgeni mopolo-ko ouwa: Jesus wapopia melikuambelo liae aava okuti: “Tate yetu keulu, enyina liove lisukukiswe.” (Mateus 6:9) Okuti ove upondola okupopia enyina lia Huku momalikuambelo ove? Jeova uhanda okuyovola kese munthu una onthilo yaviuka nenyina liae.—Romanos 10:13.
OMPHANGU APA HUKU AKALA: Ombimbiliya itulongesa okuti kuna “onomphangu onombali mbukalwa,” eulu kukala onondyu, ovanthu volutu luhamonwa, nohi yetu mukala ovanthu. (João 8:23; 1 Coríntios 15:44) Mo Mbimbiliya ondaka “omaulu” ovikando ovinyingi ilekesa eulu kukala onoandyu. “Omphangu apa Omutungi waviho akala,” ikahi “komaulu” oo.—1 Reis 8:43.
Oñgeni mopolo-ko ouwa: Ove wamona nawa oñgeni Huku ekahi. Omutungi wetu, hanonkhono-ko mbuhamoneka mbukahi ponomphangu ambuho no movipuka aviho. Jeova Omunthu wotyotyili ukala keulu. Mahi, ovipuka aviho atunga, ‘natyike ahamono.’—Hebreus 4:13.
OVITUWA VIA HUKU: Ombimbiliya itulongesa okuti Jeova una ovituwa oviwa unene. “Huku oluembia.” (1 João 4:8) Huku nalumwe akemba. (Tito 1:2) Utupu okapungulula, una onkhenda, tupu kanumana liwa. (Êxodo 34:6; Atos 10:34) Tyipondola okuhuvisa ovanthu ovanyingi, okuiva okuti Omutungi waviho uhanda okukala “noupanga omuwa,” na vana vena onthilo nae.—Salmo 25:14.
Oñgeni mopolo-ko ouwa: Ove upondola okukala epanga lia Jeova. (Tiago 2:23) Tupu, tyina wamanoñgonoka ovituwa via Jeova, matyikukuatesako okunoñgonoka nawa etyi Ombimbiliya ipopia.
“OVOLA HUKU”
Ombimbiliya ilekesa nawa oñgeni Jeova Huku ekahi. Katyipuiya okumunoñgonoka. Tyotyili, Omutungi wetu uhanda ove umunoñgonoke. Ondaka yae Ombimbiliya yaula okuti: “Inkha umuovola mayeke umuvase. Mahi, inkha umuyeka-po, mekuyumbuhi apeho.” (1 Crônicas 28:9) Omokonda yatyi uhaovolela okunoñgonoka Huku, mokutanga apeho Ombimbiliya nokusokolola komahipululo ayo? Ombimbiliya yati, inkha ulinga ngotyo, Huku “mafuene kuove.”—Tiago 4:8.
Inkha utanga Ombimbiliya nokulilongesa-yo, motualako okunoñgonoka ovipuka ovipe konthele ya Huku nonondyila mbae
Ove upondola okulipula okuti: ‘Inkha ame hipondola okunoñgonoka ovipuka aviho konthele Yomutungi watyiho, oñgeni mandyikala epanga liae?’ Nkhele soka: Okuti opo omunthu akale epanga enene liondotolo, nae una okukala nenoñgonoko ngo liondotolo? Au! Ondotolo ipondola okukala nepanga lina ovilinga vielikalela. No ngotyo, vapondola okukala omapanga omanene. Etyi epanga liondotolo liesukisa, okunoñgonoka vala ovituwa viayo, netyi ihole, netyi iyele. Tupu, nove upondola okunoñgonoka nawa oñgeni Jeova atuwa mokulilongesa Ombimbiliya. Upondola okunoñgonoka etyi wesukisa opo ukale epanga lia Huku.
Ombimbiliya kaipopi vala katutu konthele ya Huku Omutungi wetu, mahi ipopia atyiho tuesukisa opo tumunoñgonoke. Okuti ove uhanda okunoñgonoka vali nawa Jeova Huku? Onombangi mba Jeova valongesa ovanthu Ombimbiliya pomaumbo avo, otyali. Onthue tukukonga opo wovole Onombangi mba Jeova potyilongo tyenyi ine tala mo www.jw.org.