Vakuendye Novafikuena —Oityi Mamulingi Nomuenyo Wenyi?

“Hilu pala okuveta omphepo.”—1 CORÍNTIOS 9:26.

1, 2. Opo omuenyo wove weende nawa putyina ukahi nokukula, oityi wesukisa?

INKHA ukahi nokulinga oungendi pofika imwe uhei nawa, wesukisa omunthu wii nawa ondyila opo ekuhongolele. Omunthu oo, mekukuatesako okuvasa ondyila yaviuka nokukuhindikila. Mahi, kametyivili okukuatesako inkha ove kutyii opi uhanda okuenda nako. Wesukisa okunoñgonoka oku uhanda okuenda, opo omunthu oo ekuhongolele.

² Ove ukahi monkhalelo ngoyo putyina ukula. Iya una ovipuka vivali vipondola okukuhongolela. Ombimbiliya ipondola okukuatesako okuholovona ondyila yaviuka. (Provérbios 3:5, 6) Iya omutima wove inkha ulongwa nawa, upondola okukukuatesako unene okuendela mondyila oyo yaviuka. (Romanos 2:15) Mahi, opo omuenyo wove weende nawa, tupu wesukisa okunoñgonoka oku uhanda okuenda nako. Wesukisa okunoñgonoka nawa oityi uhanda okulinga movilinga via Huku.

3. Ouwa patyi Paulu apopia mu 1 Coríntios 9:26 utunda kokuovola ovilinga via Huku?

³ Apostolu Paulu walekesa ouwa utunda kokuovola ovilinga via Huku, nokulinga ononkhono mbokuvivasa, etyi ati: “Ame hihateka tyihei oku ndyenda nako, tupu hilu pala okuveta omphepo.” (1 Coríntios 9:26) Inkha una ovilinga uhanda movilinga via Jeova, kala nonthumbi yokuti motyivili. Apa katutu mosukisa okulinga omatokolo amwe akolela konthele yefendelo, novilinga, notyinepo, nombunga, novikuavo vali. Ovikando vimwe, upondola okulitehelela okuti una omatokolo omanyingi epuiya. Mahi, inkha utetekela okusoka nawa etyi mokalinga komutwe, okuendesila omatokolo ove motyili no movitumino Viondaka ya Huku, kumayondyua okulandula ondyila ihaviukile.—2 Timóteo 4:4, 5.

4, 5. (a) Oityi tyipondola okumoneka inkha kuholovona etyi uhanda okulinga? (b) Omokonda yatyi omatokolo ove esukisila okuhongolelwa nehando liokuhambukiswa Huku?

⁴ Inkha kusoko nawa ovilinga uhanda okuvasa, vana ulongeswa navo novalongesi vove, mavekuhongiliya okulinga etyi vasoka okuti tyaviuka. Na tyina wasokale etyi uhanda okulinga, nkhele vamwe vapondola okukuhongiliya opo ulinge etyi vahanda. Putyina, utehelela etyi vekupopila, lipula okuti, ‘Etyi vapopia okuti matyinkhuatesako okuhinangela Omupakeko wange tyina nkhele ndyimukuendye, ine matyinthalula?’—Tanga Eclesiastes 12:1.

⁵ Omokonda yatyi omatokolo omuenyo wove esukisa okuhongolelwa nehando liokuhambukiswa Huku? Ehunga limwe, omokonda Jeova oe wetuavela ovipuka aviho oviwa tuna. (Tiago 1:17) Tyotyili, atuho tuesukisa okupandula Jeova. (Revelação 4:11) Okuti kuna vali onkhalelo yaviuka yokupandula Jeova, tyipona okuovola ovilinga meongano liae? Tutalei omatokolo patyi upondola okulinga, netyi una okulinga opo utyivile okuefuisapo.

Ovilinga Patyi Usoka Okulinga?

6. Otyilinga patyi tyakolela upondola okulinga? Omokonda yatyi?

⁶ Ngetyi tyapopiwa monthele yotete, otyilinga tyakolela upondola okulinga, okuovola ove muene okunoñgonoka okuti etyi Ombimbiliya ipopia otyili. (Romanos 12:2; 2 Coríntios 13:5) Tyipondola vakuenyi vetavela elongeso liokuti ovanthu vatuka kovinyama, ine o komalongeso omanyingi omatutu onongeleya, mokonda vapopilwa navakuavo okuti otyo vena okutavela. Anthi, ove kutavela vala otyipuka tyimwe mokonda vakuenyi vahanda utyitavele. Hinangela okuti, Jeova uhanda ove umuumbile nomutima wove auho. (Tanga Mateus 22:36, 37.) Tate yetu keulu uhanda upameke ekolelo liove movipuka wii.—Hebreus 11:1.

7, 8. (a) Ovilinga patyi usoka okulinga mavikuvatela okupameka ekolelo liove? (b) Ouwa patyi mokala nao tyina wamafuisapo vimwe povilinga ovio usoka?

⁷ Opo upameke ekolelo liove, oityi uhasokela kovilinga upondola okufuisapo momuvo uhehi? Otyipuka tyimwe upondola okulinga, okulikuambela kese nthiki. Opo utyivile okulinga omalikuambelo aviuka, ohapitaulula apeho otyipuka tyike, upondola okusoka tete ine okuhoneka ovipuka uhanda okukutikinya momalikuambelo ove. Tyina ulikuambela uhapopie vala ovitateka, mahi tupu popia ovipuka vikuhambukiswa. (Filipenses 4:6) Otyilinga otyikuavo, okutanga Ombimbiliya kese nthiki. Ove utyii okuti inkha utanga omafo ekuana Ombimbiliya kese nthiki, momane okuitanga menima like?a O Salmo 1:1, 2, yati: “Omunthu omuna-mbembwa . . . [oyouna] upanda ovitumino via Jeova, nokutangela pombuelo ovitumino viae otyitenya notyinthiki.”

⁸ Otyilinga tyatatu upondola okusoka okulinga momuvo uhehi, okupongiya ekumbululo mokaava mu kese eliongiyo. Pokuhimbika, upondola okutanga ekumbululo ine otestu. Mokueenda kuomuvo, upondola okukumbulula pahe monondaka mbove muene. Tyotyili, kese tyikando wava ekumbululo, ukahi nokuhivilika Jeova. (Hebreus 13:15) Tyina wamafuisapo vimwe povilinga ovio, onthumbi yove nolupandu luove ku Jeova maviliyawisa. Tupu mokala tyafuapo pala okusoka ovilinga ovikuavo uhanda okulinga mokueenda kuomanima.

9. Inkha nkhele kumuivisi Wouhamba, oityi upondola okuovola mokueenda kuomuvo?

⁹ Ovilinga patyi usoka okulinga mokueenda kuomuvo? Inkha kunehimbike okuivisa onondaka onongwa, upondola okusoka okukala omuivisi Wouhamba. Tyina wamahimbika ovilinga ovio viakolela, mohande okuundapa apeho nombili, tyihalambesa ohanyi naike. Tupu mohande okulilongesa okuundapesa Ombimbiliya movilinga viokuivisa. Tyina wametyivili, moimbuka okuti ohole una novilinga viokuivisa mailiyawisa. Ngotyo, upondola okuyawisa komuvo uundapa movilinga viokuivisa umbo na umbo, nokulinga alo umwe ononkhono mbokulongesa ovanthu Ombimbiliya. Iya inkha umuivisi uhenembatisalwe, upondola okusoka okumbatisalwa, opo ukale Ombangi ya Jeova Huku, yelipakula nokuambatisalwa.

10, 11. Ovilinga patyi ovakuendye vambatisalwa vapondola okuovola?

¹⁰ Inkha umuumbili wambatisaluale wa Jeova, kuna ovilinga vimwe upondola okuovola okulinga mokueenda kuomuvo, nokuvivasa. Ovikando vimwe upondola okukuatesako omawaneno okukaivisa povilongo pesukisa vali ovaivisi. Tupu, upondola okuundapesa ononkhono mbove nekongoko liove, movilinga vioukokoli-ndyila ine oukokoli-ndyila wapola pokati. Ovakokoli-ndyila 10.000 vehambu, mavekulekesa okuti, ovilinga viomuvo auho, onkhalelo ongwa vali yokuhinangela Omupakeko wove meti liove lioukuendye. Ovio, ovilinga upondola okuvasa na tyina nkhele ukahi meumbo liovoho. Tupu okuvasa ovilinga ovio, matyieta ouwa mewaneno lienyi.

¹¹ Ovilinga ovikuavo upondola okuovola mokueenda kuomuvo, kavietela vala ouwa ewaneno lienyi. Mongeleka, upondola okukakuatesako kuna kuesukisa unene ovaivisi motyilongo tyenyi ine ovikuavo. Upondola okukavatela okutunga Onondyuo mbo Maliongiyo ine ono mbetele kovilongo ovikuavo. Upondola alo umwe okunyingila movilinga vio Mbetele ine okukala omisionaliu. Tyotyili, otyilinga tyotete tyakolela wesukisa, okuovola okumbatisalwa opo uvase ovilinga ovikuavo, viapopiwa pombanda. Inkha kunembatisalwe, tala nawa oityi wesukisa okulinga opo uvase ovilinga ovio viakolela momuenyo wove.

Ovola Okumbatisalwa

12. Oityi vamwe vambatisalelwa? Omokonda yatyi omahunga oo kaatuuka?

¹² Kuove okumbatisalwa tyihangununa tyi? Vamwe vasoka okuti, maiveamena opo vahalinge ononkhali. Ovakuavo, vasoka okuti vesukisa okumbatisalwa, mokonda omakula avo vambatisaluale. Ovakuendye novafikuena vamwe, hamwe vahanda okuhambukiswa ovohe. Anthi, ombatisimu hamphango maikutyilika okulinga ovipuka hamwe uhanda okulingila pokamphengi. Tupu kumbatisalwa vala mokonda yokukuluminyua navakuenyi. Wesukisa okumbatisalwa tyina wanoñgonoka nawa etyi tyihangununa okukala Ombangi ya Jeova, na tyina pahe una onthumbi yokuti wafuapo, uhanda okukala notyilinga otyo.—Eclesiastes 5:4, 5.

13. Omokonda yatyi wesukisila okumbatisalwa?

¹³ Ehunga limwe wesukisila okumbatisalwa, omokonda Jesus watuma ovalanduli vae okuti “kalongesei ovanthu . . . vakale ovalongwa. Iya amuvembatisala.” Oe tupu waava ongeleka yokumbatisalwa. (Tanga Mateus 28:19, 20; Marcos 1:9.) Moluotyo, ombatisimu yakolela unene pala vana vahanda okuyovolwa. Etyi apostolu Petulu amana okupopia konthele ya Noe watungile owato opo vahupilemo, oe nombunga yae mokueenda Kuombila Onene, ayawisako okuti: “Omeva oo otyilekeso tyombatisimu pahe imuyovola (hakumupola esilo liolutu, anthi omokuita omutima omuwa ku Huku,) menyina lietutilo lia Jesus Kristu.” (1 Pedro 3:20, 21) Mahi, otyo katyilekesa okuti mombatisalwa opo ombatisimu ikuamane. Anthi, ove wesukisa okumbatisalwa mokonda una ohole na Jeova, iya uhanda okumuumbila nomutima wove auho, nomuenyo wove, nonondunge mbove, nononkhono mbove ambuho.—Marcos 12:29, 30.

14. Oityi pamwe vamwe velikondolela okumbatisalwa? Mahi onthumbi patyi una?

¹⁴ Vamwe velikondola okumbatisalwa mokonda vena owoma wokuti nthiki imwe vapondola okutundiswa mewaneno. Okuti ove una owoma oo? Inkha ongotyo, okukala nowoma oo hatyiviko. Otyo tyilekesa okuti ove wanoñgonoka nawa otyilinga otyinene tyokukala Ombangi ya Jeova. Okuti kuna vali ehunga ekuavo? Hamwe nkhele utupu onthumbi yokuti okuendela movitumino via Huku, oyo ondyila yaviuka momuenyo. Monkhalelo ngoyo, okusoka konthele yetyi tyikevelela vana vatomba ovitumino Viombimbiliya, tyipondola okukukuatesako okulinga etokolo liove. Tupu, tyipondola ove uhole ovitumino via Huku, mahi utupu onthumbi yokuti motyivili okuvifuisapo. Tyotyili, otyo tyilekesa okuti weliola omutima. Okuhulililako, Ombimbiliya ipopia okuti omitima viovanthu aveho ovakuankhali omikengeleli. (Jeremias 17:9) Mahi ove upondola okutyivila inkha ‘utualako tyalunguka ngetyi ondaka ya Huku ilekesa.’ (Tanga Salmo 119:9.) Namphila una omahunga okulikondola okumbatisalwa, ove wesukisa okutokola konthele oyo.b

15, 16. Oñgeni motyimono okuti wafuapo pala okumbatisalwa?

¹⁵ Ngotyo, oñgeni ove monoñgonoka okuti wafuapo pala okumbatisalwa? Otyipuka tyimwe, okulipula ove muene okuti: ‘Ndyityivila okuhangununina vakuetu omalongeso otete Ombimbiliya? Ndyiundapa movilinga viokuivisa alo umwe tyina ovotate vehetyilingi? Okuti ndyilinga ononkhono mbokuenda komaliongiyo aeho Ovakristau? Ndyihinangela ovikando vimwe naanyene okuhongiliyua navakuetu? Okuti mandyitualako okuumbila Jeova alo umwe inkha ovotate ine omapanga ange vetyiyekapo? Ndyilikuambela konthele youpanga wange na Huku? Okuti nalingale elikuambelo liokulipakula ku Jeova?’

¹⁶ Ombatisimu ipilulula omuenyo wetu, iya etokolo olio liakolela unene. Okuti ove walongoka nawa opo umbatisalwe? Okulongoka nawa, hakuvilako vala okulinga ononthele onongwa momaliongiyo, nokuava omakumbululo omawa. Tyihanda okukala tyafuapo pala okulinga omatokolo elikuata nenoñgonoko liovitumino Viombimbiliya. (Tanga Hebreus 5:14.) Inkha ove una enoñgonoko ngolio, una otyipuka tyakolela unene kuaviho—okuumbila Jeova nomutima wove auho, nokutyinda omuenyo ulekesa okuti tyotyili ove welipakula kwe.

17. Oityi matyikuvatela okufinda ovitateka vipondola okukutumbukila tyina wamambatisalua?

¹⁷ Tyina wamambatisalua, mokala nehambu enene liokuumbila Huku. Tupu motumbukilwa novitateka vipondola okulola ekolelo liove nonthumbi yove. (2 Timóteo 3:12) Uhasoke okuti una okutetulula ovitateka ovio awike. Ovola onondonga mbovoho. Ovola ovakulu valongoka nawa mewaneno opo vekuvatele. Linga oupanga na vana mavekukuatesako. Uhalimbueko nalumwe okuti Jeova mekutekula, nokukuavela ononkhono wesukisa opo utetulule ovitateka vipondola okukutumbukila.—1 Pedro 5:6, 7.

Oñgeni Movasi Ovilinga Wovola?

18, 19. Okupunga nawa ovipuka viakolela vali matyikuetela ouwa patyi?

¹⁸ Namphila una omalusoke omawa, okuti pamwe ngoti omuvo wove kautuuka okulinga etyi uhanda netyi wesukisa? Inkha, ongotyo, wesukisa okutala oityi tyakolela vali momuenyo wove. Tala ongeleka ei: Pola ombaliti opakemo omamanya omanene. Pahe yulisamo eheke. Ngotyo, una ombaliti yeyula omamanya neheke. Pahe viuyulamo aviho. Tetekela pahe okupakamo eheke opakeko omamanya. Okuti omamanya afuamo? Kaafumo, mokonda tete wapakamo eheke.

¹⁹ Ove una otyitateka tyelifwa notyo konthele yomuvo wove. Inkha upaka tete momuenyo ovitalukiso, kumakala nomuvo pala ovipuka viakolela vali—okuumbila Huku. Mahi, inkha ulandula elondolo Liombimbiliya ‘liokupunga nawa ovipuka viakolela vali,’ mokala nomuvo wovilinga via Huku, no wovitalukiso.—Filipenses 1:10.

20. Inkha una otyiho nohuhunia pokulinga ononkhono mbokuvasa ovilinga wovola, oityi wesukisa okulinga?

²⁰ Putyina ulinga ononkhono mbokuvasa ovilinga wovola, okukutikinyamo ombatisimu, upondola okukala notyiho, nohuhunia. Tyina wamakala ngotyo, “pakula omulemo wove ku Jeova, iya oe mekuvatela.” (Salmo 55:22) Pahe una omphitilo yokuundapa movilinga vihambukiswa unene nokuakolela, viokuivisa onondaka onongwa nokulongesa. (Atos 1:8) Upondola okuholovona okuhaundapa movilinga ovio. Ine okuundapa movilinga ovio vihambukiswa. Uhelityilike okuundapesa ounongo wove pala okuvatela ovilinga Viouhamba wa Huku. Nalumwe mokelivela mokonda yokuumbila “Omupakeko wove putyina nkhele umukuendye.”—Eclesiastes 12:1, Tradução Intecofessional.

[Onondaka Poutoi]

Oñgeni Ove Mokumbulula?

• Oityi wesukisila okusoka ovilinga uhanda okuvasa?

• Ovilinga patyi vimwe upondola okuvasa?

• Oityi wesukisa okulinga opo umbatisalwe?

• Oñgeni okupunga ovipuka viakolela vali matyikuvatela okuvasa ovilinga wovola?

[Olutalatu pefo 23]

Okuti wovola okutanga Ombimbiliya kese nthiki?

[Olutalatu pefo 24]

Oityi ulilongesila kongeleka ei?