Omutala Womulavi Wotete mo Ingelesi Yapepuka

ONTHUE tuna ehambu liokumupopila okuti, mokueenda kuenima like okuhimbikila mononthele mbo kulilongeswa mbo Mutala uno, kese hanyi matulingila kumwe omutala womulavi mo Ingelesi yapepuka. Mamuya ononthele mbokulilongeswa, no nonkhuavo mambuholovonwa tyina muna omphangu. Tutyii okuti otyo matyikuatesako ovanyingi po Nombangi mba Jeova momasuka-suka avo opaspilitu. Omokonda yatyi?

Ovakuatate vetu movilongo vimwe, ngo ko Fiji, no Gana, no Kenia, no Liberia, no Nigeria, no Papua Nova Guine, no Koulongo wo pokati komeva ko Solomau, vapopia o Ingelesi. Namphila ovakuatate vetu movilongo ovio vapopia omalaka omakuavo ovilongo viavo, haunene kese nthiki momaliongiyo ewaneno no movilinga viokuivisa vapopia o Ingelesi. Anthi, o Ingelesi yavo yapepuka vali tyipona ei ivasiwa momikanda vietu. Tupu, vamwe povanthu va Jeova vailukila kovilongo kuna vena okupopia vala o Ingelesi, namphila kaveii nawa. Anthi, kavaende komaliongiyo elaka liavo muene, mokonda kutupu.

Ononthele tulilongesa kese simano Momutala Womulavi mbakolela unene pala okututekula nawa nokulia kuopaspilitu momuvo wanakua. Moluotyo, opo tukuateseko aveho momaliongiyo okupolako esilivilo, omutala oo, una onondaka mbapepuka nawa. Efo lio kombanda liomutala oo omupe, lielikalela. Ousapi wo mokati, nono palagrafu, nomapulo okupitulula, nomalutalatu mavilifu no ononthele tulingale. Ngotyo, aveho vapondola okulandula elilongeso Nomutala Womulavi vahanda. Opo tulekese oñgeni omutala oo wapepuka vali, tala ongeleka pombuelo yatunda mo palagrafu ya 2, yonthele yotete Yomutala Womulavi.

Tukevelela okuti omutala ou omupe maukumbulula omalikuambelo ovakuatate ovanyingi vehole okuita ku Jeova okuti: “Ndonge onondunge, opo ame ndyililongese ovitumino viove.” (Salmo 119:73) Onthue tuna onthumbi yokuti vana vehei nawa o Ingelesi, novana vamwe vapopia o Ingelesi, mavetyivili okupongiya nawa onthele maililongeswa Yomutala Womulavi kese simano. Tupandula unene Jeova mokonda ‘yoluembia ena novakuatate mouye auho,’ oe ukahi nokuundapesa “omupika wekolelo nokualunguka” pala okutuavela okulia okunyingi kuopamphepo.—1 Pedro 2:17; Mateus 24:45.

Ononkhalamutwe mbo Nombangi mba Jeova