Lilongesa Ondaka Ya Huku

Oñgeni Upondola Okufuena ku Huku?

Onthele ei ipopia omapulo hamwe uhole okulinga, naapa movasi omakumbululo mo Mbimbiliya yove. Onombangi mba Jeova vena ehambu liokupopia nove konthele yao.

1. Okuti Huku utehelela omalikuambelo aeho?

Jeova ukonga ovanthu vomalongo aeho opo vafuena kwe melikuambelo. (Salmo 65:2) Mahi oe katehelela omalikuambelo aeho. Nkhele tala, tyina ankho ova Isilayeli vatualako okulinga ovivi, Huku ankho katehelela omalikuambelo avo. (Isaías 1:15) Tupu, katehelela omalikuambelo ovalume vatekula onya ovakai vavo. (1 Pedro 3:7) Mahi, Huku matehelela omalikuambelo alo umwe a vana valinga ononkhali inkha velivela.—Tanga 2 Crônicas 33:9-13.

2. Oñgeni tuna okulikuambela?

Elikuambelo elao, tupu lilinga onthele mefendelo lietu. Ngotyo tuesukisa okulikuambela vala ku Jeova. (Mateus 4:10; 6:9) Mokonda tuvakuankhali, tuesukisa okulikuambela menyina lia Jesus, mokonda oe “ondyila” yanakwa. (João 14:6) Jeova kahande tuwane-wane omalikuambelo tuapaka momutwe ine ahonekwa, mahi uhanda tulikuambele okupola momutima.—Tanga Mateus 6:7; Filipenses 4:6, 7.

Omupakeko wetu utehelela alo umwe omalikuambelo alingilwa momutima. (1 Samuel 1:12, 13) Oe utuita tulikuambele apeho, komuhuka, no komutenya, no kongulohi, na tyina tulia, no putyina tuna ovitateka.—Tanga Salmo 55:22; Mateus 15:36.

3. Omokonda yatyi Ovakristau veliongiyila?

Okufuena ku Huku katyapepukile mokonda tukahi pokati kovanthu vehena ekolelo mu Huku, valinga omukuele omilao viae konthele yombembwa pano pohi. (2 Timóteo 3:1, 4; 2 Pedro 3:3, 13) Moluotyo, tuesukisa okuliongiya novakuatate vetu opo tulipameke.—Tanga Hebreus 10:24, 25.

Ove upondola okufuena ku Huku inkha ulinga oupanga novanthu vehole Huku. Omaliongiyo Onombangi mba Jeova etukuatesako okupola ouwa kekolelo liavakuetu.—Tanga Romanos 1:11, 12.

4. Oñgeni upondola okufuena ku Huku?

Ove upondola okufuena ku Jeova mokusokolola nawa kuetyi ukahi nokulilongesa Mondaka yae. Tala nawa ovilinga viae, nehongolelo liae, nomilao viae. Okulikuambela nokusokolola nawa tyitukuatesako okupanda oluembia lwa Huku nounongo wae.—Tanga Josué 1:8; Salmo 1:1-3.

Ove mofuene vala ku Huku inkha umuyumba onthumbi, nokukolela mwe. Mahi ekolelo likahi ngotyipuka tyina omuenyo tyesukisa okutekulwa. Ove una okutekula ekolelo liove mokusokolola nawa etyi ukahi nokulilongesa.—Tanga 1 Tessalonicenses 5:21; Hebreus 11:1, 6.

5. Oñgeni okufuena ku Huku matyikuetela ouwa?

Jeova wasuka na vana vemuhole. Oe uveamena ku kese tyimwe tyipondola okunyona ekolelo liavo nekevelo liavo liomuenyo uhapu. (Salmo 91:1, 2, 7-10) Oe utulondola konthele yonondyila mbupondola okunyona ekongoko lietu nehambu. Jeova utulongesa onkhalelo ongwa yomuenyo.—Tanga Salmo 73:27, 28; Tiago 4:4, 8.

Opo unoñgonoke vali konthele yotyo, tala okapitulu 17 komukanda ou, walingua no Nombangi mba Jeova. Oityi Ombimbiliya Tyili Ilongesa?