Ovita Vio Armagedom Maviya Nalupi?

“Ame namona otyikumba otyinyingi, tyihevilwa okuvalulwa nomunthu nawike, tyatunda movilongo aviho, no momihoko, nomalongo, no momalaka aeho . . . vekahi nokutunda mononkhumbi ononene.”—REVELAÇÃO 7:9, 14.

PAHE tukahi nokuenda no kovita vio Armagedom. Ñgeni ngotyo?

Mouye auho muna ovanthu vaumbila Jeova nokutyinda omuenyo welikuata novitumino viavilapo Viombimbiliya. Nombatelo ya Huku, ovanthu ovanyingi vatunda momalongo aeho, nomalaka nomihoko, veliongiya kumwe nohole youkuatate ouye auho. Ohole oyo ikahi vala pokati Konombangi mba Jeova.—João 13:35.

Apa katutu Satanasi maongiya ovanthu vae ahimbika okulwisa ovanthu ovo vombembwa, vamoneka ngoti nawike meveamena. (Ezequiel 38:8-12; Revelação 16:13, 14, 16) Oñgeni upondola okukala nonthumbi yokuti otyo otyili? Ombimbiliya ipopia ovipuka vimwe mavitukuatesako okunoñgonoka onalupi ovilwa vio Armagedom maviya. Ovinyingi puvio vikahiale nokufuiswapo.

Evi Weete Okuti Vikahi Nokufuiswapo

Ovalongwa va Jesus vemupulile oñgeni ovanthu mavaimbuka okuti “onthyulilo youye” yehikapo. (Mateus 24:3) Jesus wakumbulula etyi apopia okuti makuya omuvo “otyilongo matyikalwisa otyilongo otyikuavo iya ouhamba maukalwisa ouhamba omukuavo. Iya kovilongo ovinyingi makukakala ondyala, novinimawe.” Iya ati: “Ovipuka ovio aviho, onthyimbi yonongembia mbemone.” (Mateus 24:7, 8) Apostolu Paulu wapopia konthele yomuvo oo okuti “ononthiki mbahulililako,” ati ononthiki ombo mambukakala “omuvo wepuiya.” (2 Timóteo 3:1) Ove kuete okuti omaulo oo, apopia ovipuka vikahi nokumoneka hono?

Oityi omuvo uno wepuiyila unene? Apostolu João wetyipopia. Oe wapopia okuti makukakala “omuwo uhehi” muna ovilinga via Satanasi no viovilulu viae mavikalingwa vala pano pohi. Satanasi wapopiwa okuti makala “nonyengo onene” mokueenda kuomuvo uno. (Revelação 12:7-12) Ove kuete okuti hono kononthele ambuho mbouye ovanthu onongangala nokuna onyengo onene?

Tupu Jesus wati mokueenda kuomuvo uno wovitateka ovinene, makulingwa ovilinga vimwe ovinene. Wati: “Onondaka ombu onongwa mbouhamba wa [Huku] mambukaiviswa kombanda yoohi aiho, pala oumbangi movilongo aviho, iya konyima onthyulilo aiya.” (Mateus 24:14) Hono, movilongo vilamba po 235, Onombangi mba Jeova vekahi nokuivisa onondaka onongwa Mbouhamba wa Huku momalaka alamba po 500. Omikanda vivali viapolwa Mombimbiliya, Omutala Womulavi no Despertai! vikahi nokuyandyaneswa unene mouye auho. Tupu Onombangi mba Jeova vekahi nokupitiya Ombimbiliya momalaka ehungi po 100. Ovilinga viavo vikahi nokulingwa novanthu veliava nokuvatelwa nonombongo mbuawa novanthu votyali. Okuti ovilinga ovio viakolela viokuivisa vikahi nokufuisapo eulo lia Jesus?

Ombimbiliya tupu yapopia ovipuka mavituala kovilwa pokati ka Jeova Huku no nondyale mbae. Tala omaulo etatu mokamona okuti ekahi nokufuiswapo.

Ovipuka Apa Katutu Motale Okuti Mavifuisuapo

Eulo 1. Ombimbiliya yati omalongo maakapopia onondaka mbakolela okuti “ombembwa netuliyo.” Ovo mavasoko okuti vetyivila okutetulula ovitateka ovinene. Anthi, ovipuka mavilandula konondaka ombo ha viombembwa.—1 Tessalonicenses 5:1-3.

Eulo 2. Okulandulako, ovatumini ovanyingi mavatokola okulwisa omaongano onongeleya mouye. Mombimbiliya, ovatumini ovo vaelekwa nenyama, iya onongeleya mbomatutu mouye, mbuelekwa nomukai wavelama kenyama olio. (Revelação 17:3, 15-18) Enyama olio tyihetyi malikalinga etyi Huku ahanda, okuhanyako onongeleya mbukemba okuti mbuumbila Huku.

Apostolu João wapopia ehanyauno olio okuti: “Onombinga ekwi wamona, nenyama, mavayale ekunga avelihanyauna nokulikalesa muhoyo. Mavali ohitu yae no kumuyoka motupia. Mokonda Huku wapaka momitima viavo okufuisapo olusoke lwae.”—Revelação 17:16, 17.

Eulo 3. Konyima yeutukilo olio lionongeleya mbomatutu, Satanasi mahongiliya omalongo opo atyitukilepo vana vafenda Jeova Huku.—Revelação 7:14; Mateus 24:21.

Oñgeni Otyo Matyikukalesa?

Inkha kulilongesa nawa Ombimbiliya, matyikupuiya okutavela okuti ovipuka ovio viapopiawa pombanda mavikaendako. Mahi kuna ehunga ewa liokukala nonthumbi yokuti kese eulo malikafuisuapo, tyotyili apa katutu aeho maafuiswapo. Omaulo aeho apopiwa Mombimbiliya ekahi nokufuiswapo, tyilekesa okuti nomakuavo maafuiswapo.a

Oityi uhataindyila omuvo opo unoñgonoke oityi Onombangi mba Jeova vetavelela okuti “ovita vionthiki onene ya Huku Wepondolo Aliho” vikahi popepi nomokonda yatyi uhapondola okukala nowoma? Mavekulongesa etyi Ombimbiliya ipopia netyi una okulinga opo ukale pokati ka vana Jeova Huku maamena. (Revelação 16:14) Etyi molilongesa tyipondola okupilulula olusoke luove konthele yetyi matyikamoneka komutwe.

[Onondaka Poutoi]

[Onondaka Mbavilapo pefo 8]

Okuti ovilinga vio Nombangi mba Jeova vikahi nokufuisapo eulo Liombimbiliya?