Omokonda Yatyi Omuteheleli Womalikuambelo Ayekelelako Ononkhumbi?
NAMPHILA ovanthu vamwe velikuambela, kavetavela okuti kuna Huku. Omokonda yatyi? Hamwe omokonda veete ononkhumbi ononyingi mouye uno. Noove ulipula omokonda yatyi Huku ayekelelako ononkhumbi?
Okuti tyilityili Huku walinga ovanthu ngetyi vekahi hono, ovakuankhali nokumona ononkhumbi? Tyotyili, tyipuiya okukala nehumbilo na huku walinga ovanthu opo vamone ononkhumbi. Nkhele soka kuetyi: Ñgeno ukahi nokuliseta netuku-tuku epe otyo ulitala nawa, mahi otale okuti nthele imwe lielisipata, mosoko okuti otyo lialingwa? Au! Mosoko okuti una welilinga, welilinga “nawa” mahi pena umwe ine otyimwe tyelisipata.
Tupu, tyina tutala nokuahuva onkhalelo ovipuka viaonganekwa nawa mouye, pahe atutale ovitateka ovinene, nononkhumbi ovanthu vekahi nokumona, oityi tusoka? Ombimbiliya ilongesa okuti Huku walinga ovanthu votete tyehena onkhali, mahi konyima avelietela ononkhumbi. (Deuteronômio 32:4, 5) Tyihambukiswa okunoñgonoka okuti Huku walaa okumanako ononkhumbi, tyina amamaneko ononkhali mbovanthu aveho vetavela. Mahi, oityi asetela okutyilinga?
Oityi Asetela Okutyilinga?
Waseta mokonda yotyitateka konthele yolie una okutumina ovanthu. Jeova nalumwe ahandele ovanthu velitumine ovo muene. Oe ankho o pala akale Omutumini wavo. Ombimbiliya ipopia okuti: “Ovanthu kavetyivili okuviukisa onondyila mbavo.” (Jeremias 10:23) Mahi, ovanthu votete vaholovona okuhetavela outumini wa Huku. Mokonda vatomba ovitumino, vakala ovakuankhali. (1 João 3:4) Moluotyo, vapumbwa omuenyo omuwa ankho vena, avelietela ononkhumbi ovo muene novana vavo.
Mokueenda kuomanima omanyingi, Jeova ukahi nokuyeka ovanthu velitumine ovo muene, iya tyikahi nokumoneka nawa okuti ovanthu vetupu epondolo liokulitumina. Otyo tyilekesa okuti ovanthu aveho vatumina, vaetako ononkhumbi. Nawike utyivila okumanako ovita, noungangala, nonya, nomauvela.
Oñgeni Huku Makamanako Ononkhumbi?
Ombimbiliya ilaa okuti apa katutu Huku makaetako ouye omupe wouviuki. (2 Pedro 3:13) Mouye omo, mamukakala vala vana vaholovona okukala nohole navakuavo na Huku.—Deuteronômio 30:15, 16, 19, 20.
Ombimbiliya tupu ipopia okuti “monthiki yekoyeso” ikahi popepi, Huku makamanako ononkhumbi, navana vembuetako. (2 Pedro 3:7) Konyima, Jesus Kristu, Omutumini waholovonua na Huku, makatumina ovanthu ovataveli. (Daniel 7:13, 14) Outumini wa Jesus maukalinga tyi? Ombimbiliya yati: “Ovatendi mavakapiñgana oohi, iya avakakala nombembwa onene.”—Salmo 37:11.
Ohamba yo keulu Jesus, makamanako ononkhumbi ambuho mbeyako etyi ovanthu vatyitukilapo “ondyivindyivi yomuenyo,” okukutikinyamo omauvela, nokukulupa, nononkhia. (Salmo 36:9) Jesus makahakula aveho vetavela outumini wae woluembia. Moutumini wae, omaulo aa Ombimbiliya maekelifuilapo:
◼ “Nawike omunthu kombanda yoohi makati: ‘Ame ndyivela.’ Ovanthu vakala kombanda yoohi, mavakaevelwa ononkhali mbavo.”—Isaías 33:24.
◼ “[Huku] makasekuna ononkhuka momaiho avo, ononkhia, nokulila, nonongembia kamavikakalako vali. Mokonda ovipuka ovio aviho mavikalamba.”—Revelação 21:4.
Katyiungumanesa okunoñgonoka okuti apa katutu Huku makafuisapo omulao wae wokumanako ononkhumbi ambuho? Putyina tukevela omuvo oo, tuesukisa okutualako okukala nonthumbi yokuti Huku utehelela omalikuambelo etu, namphila nkhele ayekelelako ononkhumbi.
Huku oko ekahi. Mekutehelela, alo umwe tyina umupopila omuihamo wove, nononkhumbi mbove. Iya oe uhanda unene ukakaleko tyina ononkhumbi ambuho mbamapu, onoñgonoka ovipuka aviho.