Omokonda Yatyi Ounkhembi Utuailako?

“Omunthu utumina omunthu mukuavo pala okulimonesa ononkhumbi.”—ECLESIASTES 8:9.

ONONDAKA ombo mbulekesa nawa etyi ovanthu vokutumina valinga. Outumini wavo ukahi nokueta ononkhumbi ononene, noluhepo. Tunde kohale, ovanthu vomitima omiwa vaovola okuetako ouviuki, apeho vanyonwa notyipululu, nounkhembi. Omokonda yatyi? Omokonda yatyi ounkhembi utuailako? Omokonda yovipuka evi vitatu vihongiliya ovanthu.

1. Onkhali.

Ombimbiliya ipopia nawa okuti atuho “tuna onkhali.” (Romanos 3:9) Ngatyina ouvela wahahakulua iya ulipingua, onkhali “ikahi” ine “ikala” mokati ketu. Onkhali ikahi “nokutumina” ovanthu mokueenda kuomanima omanyingi ngatyina ohamba. “Otyitumino” tyonkhali tyitualako okuundapa mokati ketu. Eyembelo liokulinga onkhali, lilingisa ovanthu ovanyingi okupaka tete omasuka avo, nokuovala vala omalumono ine epondolo, avehesuku navakuavo.—Romanos 5:21; 7:17, 20, 23, 25.

2. Ouye tukahi wovivi.

Ouye uno weyula otyipululu nelungavi. Moluotyo, ovanthu tyivepuiya unene okukala tyelikalela. Mokonda vahongolelwa nelungavi, vekahi ngatyina vena ondyala yepondolo. Tupu vahanda unene okukala nonombongo ononyingi nomalumono omanyingi tyipona etyi tyili vesukisa. Ngotyo, vakemba nokulinga ovipuka ovikuavo viahaviukile opo vakale netyi vahanda. Kavelityilika omahando oo, anthi, ovanthu ovo “valandula ounyingi pala okulinga ovivi.”—Êxodo 23:2.

3. Satanasi Eliapu.

Satanasi oandyu omphuki, ukahi “nokuyondya ovanthu aveho.” (Revelação 12:9) Oe uhambukilwa unene okuyondya ovanthu. Nounongo, upondola okuhongiliya omunthu okuundapesa omapita ehando liae liokukala nomalumono, nomuenyo omuwa iya ahimbika okulinga ovipuka viahaviukile opo evimone.

Okuti otyo tyilekesa okuti tuna okutavela vala ku Satanasi, muatyiho etuhongiliya okulinga? Matukumbulula epulo olio monthele ilandulako.