Epulo 3: Omokonda Yatyi Huku Andyekela Ndyimone Ononkhumbi?
TATE ya Ian ankho onkholwa. Namphila Ian ekula nokuna atyiho esukisa mopalutu, mahi ankho he kemuavela ombatelo esukisa opo ahambukwe. Ian wati: “Nalumwe tate akalele nokankhenda naame iya mokonda yokunwa unene ankho ndyitekulua vala na me.” Etyi Ian ekula, ahimbika okulipula inkha okuna umwe Huku. Ankho ndyilipula okuti: “‘Inkha Huku tyilityili okuekahi omokonda yatyi ayekela ovanthu vamone ononkhumbi?’”
Okulipula ngotyo katyapengele mokonda yatyi? Alo umwe inkha ove utupu ovitateka, tyipondola okukuihama unene tyina utala ovanthu vahalingile natyike vamona ononkhumbi. Mahi, okulipula konthele yononkhumbi tyipondola okukusukisa vali inkha ove ngetyi tyali Ian, utokela moluhepo ine una uhole uvela ine unkhia.
Oityi vamwe vapopia konthele yekumbululo liepulo eli? Vamwe vetavela okuti Huku utuyeka tumone ononkhumbi opo etulongese okuliola omutima nokankhenda. Ovakuavo vati ovanthu vamona ononkhumbi mokonda yononkhali valingile kohale.
Ekumbululo olio lilekesa tyi? Lilekesa okuti Huku kesukile nononkhumbi mbo vanthu, moluotyo okumuhumba tyepuilisa. Huku utumonesa ononkhumbi.
Oityi Ombimbiliya ilongesa? Ombimbiliya yapopia nokuayandyuluka okuti Huku kavelua onombei mokonda yononkhumbi mbovanthu. “Omunthu ahapopie okuti, ndyikahi nokulolwa na Huku. Mokonda Huku kapondola okulolwa novipuka ovivi, tupu oe kalolo nawike.” (Tiago 1:13 The Bible in Basic English) Tyotyili, olusoke luokuti Huku oe uvelwa onombei mokonda yononkhumbi mbovanthu kaluelikuatele nonkhalelo Ombimbiliya ipopia okutuwa kwa Huku. Ñgeni ngotyo?
Otyituwa tyotete tya Huku ohole. (1 João 4:8) Pala okutoneka okupopia konthele yotyo, Ombimbiliya yeeleka etyi Huku elitehelela na ina unyamisa. Huku wapula okuti: “Okuti omukai upondola okulimbwa olukembe lwae, ahakala nokankhenda nomona watunda meimo liae? Namphila ovakai ovo vapondola okulimbuako, mahi, ame ove himekulimbwa.” (Isaías 49:15) Okuti upondola okusoka ina woluembia ulilisa omona wae tyawina? He woluembia ulinga atyiho opo aokeye ononkhumbi mbovana vae. Tyelifwa notyo, Huku kamonesa ononkhumbi ovanthu.—Gênesis 18:25.
Alo umwe, vana vahalingile natyike otyivi vamona ononkhumbi. Ove hamwe ulipula okuti, ‘Inkha Huku utuhole nokuna epondolo aliho omokonda yatyi ahamanenako etyi tyietela ovanthu ononkhumbi?’
Huku uyeka ononkhumbi mbutualeko mokonda una omahunga omawa. Tala limwe: Ovanthu vamonesa ononkhumbi vakuavo. Ovanyingi vavetwa nokumoneswa emone navana vahahande okupilulula onkhalelo yavo yomuenyo. Ngotyo opo Huku amaneko tyina tyieta ononkhumbi una okuhanyako ovanthu ovo.
Okuhangununa omokonda yatyi nkhele Huku ahahanyaunineko vana valinga ovivi, apostolu Petulu wahoneka okuti: “Jeova kekahi nokuseta konthele yomulao wae, ngetyi vamwe vasoka okuti waseta. Anthi, oe wapua elundo nonwe, mokonda kahande na umwe ahanyueko, mahi uhanda ovanthu aveho velivele.” (2 Pedro 3:9) Otyo tyilekesa okuti Jeova Huku una ohole nokankhenda.
Apa katutu, Jeova Huku mahanyeko onondingavivi. Huku “mafete ononkhumbi vana vemumonesa ononkhumbi” vakuavo. Ovo vokumonesa vakuavo ononkhumbi “mavakahitiswa mekoyeso liehanyauko lia apeho.”— 2 Tessalonicenses 1:6-9.
Ian, wapopiwa tete, wavasa ekumbululo liemukululukisa konthele yetyi ovanthu vamonena ononkhumbi. Etyi elilongesa tyapilulula omalusoke ae konthele yomuenyo.
Opo ulilongese vali konthele yomokonda yatyi Huku ayekelako ononkhumbi netyi mekembulinga, tala okapitulu 11 komukanda Oityi Ombimbiliya Tyili Ilongesa? Ukahi mo Internete, mo
www.jw.org
[Okakasa pefo 9]
Oityi Jesus Apopia Konthele Yononkhumbi?
Jesus kavelele Huku onombei mokonda yononkhumbi mbukahi nokumoneka mouye. Anthi, Jesus wapopia etyi tyikahi pombuelo.
Jesus walekesa okuti Huku kahitisa ovanthu nononkhumbi. Jesus wahakula ovavei, novilema novamphoki. (Mateus 15:30) Omahuviso ae etulongesa ovipuka vivali viotyotyili: Tete, Jesus waundapesa epondolo lia Huku pala okuokeya ononkhumbi mbovanthu, hakuvemonesa ononkhumbi. Vali, Jesus wahakula ovanthu tyahalingi okapungulula. Tyina ankho amona ovanthu vamona ononkhumbi “tyimuetesa okankhenda”. (Mateus 20:29-34) Jesus walekesa nawa etyi Tate yae elitehela konthele yononkhumbi. Ngotyo, okutala kuetyi Jesus apopia netyi alinga tyitulongesa okuti Huku tyimuihama unene tyina Atala vana vamona ononkhumbi iya Uhanda okuveyovola.—João 14:7, 9.
Jesus walekesa nawa una umonesa ovanthu ononkhumbi—Satanasi Eliapu. Jesus wati: “Oe omuipai etyi ahimbika.” (João 8:44) Tupu, Jesus walekesa okuti Satanasi Eliapu “omutumini wouye uno” una ukahi “nokuyondya ovanthu aveho.”—João 12:31; Revelação 12:9.
Jesus wetuavela ekevelelo liokuti ononkhumbi ambuho mambukapuako. Walongesa ovalanduli vae okulikuambela okuti: “Tate yetu keulu, . . . Ouhamba wove uye. Ehando liove lilingwe pano pohi.” (Mateus 6:9, 10) Tyina Ouhamba wa Huku wameya okulinga ehando liae pano pohi, maunyimiko ononkhumbi iya alilingwa ngetyi lilingwa keulu.
Elekeso Jesus aavela apostolu João, lipopia omuenyo omuwa maukakala na vana vatuminwa Nouhamba wa Huku. Pomuvo opo, Huku “makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 1:1; 21:3, 4.