Lilongesa Ondaka ya Huku

Okuti Huku Maetako Omutumini Wouye Auho?

Monthele ei muna omapulo amwe hamwe uhole okulinga, nokulekesa apa movasi omakumbululo Mombimbiliya yove. Onombangi mba Jeova mavakala nehambu liokutomphola noove konthele yomakumbululo oo.

1. Oityi ovanthu vesukisila omutumini wouye auho?

Hono, ovanthu vekahi nokumona ovitateka ovinene. Movilongo vimwe ovanthu vahepa nokumona ononkhumbi. Movikuavo ovanthu vena ovipuka vilamba puetyi vesukisa. Kuna vala outumini wike upondola okuavununina ovanthu aveho omalumono oohi.​—Tanga Eclesiastes 4:1; 8:9.

2. Olie upondola okuyumbwa onthumbi yokutumina ouye auho?

Olusoke luokuti makukala omutumini wouye auho kaluhambukiswa ovanthu mokonda kutupu omulume ine omukai utyivila okutumina nawa. Kutupu omunthu utavelwa novanthu aveho. Tupu, omutumini patyi uhemukalavi? Mokonda yomutumini vala wike omukalavi ovanthu aveho vakala nowoma.​—Tanga Provérbios 29:2; Jeremias 10:23.

Jeova Huku waholovona Omona wae, Jesus, opo atumine apeho ouye. (Lucas 1:32, 33) Jesus welilongesa etyi akala pano pohi. Etyi ekahi pano wahakula ovavei, nokulongesa ovatendi, nokukala omuvo omunyingi novana. (Marcos 1:40-42; 6:34; 10:13-16) Ngotyo Jesus oe vala Omutumini omuwa.​—Tanga João 1:14.

3. Okuti tyivilwa umwe okutumina ouye auho?

Huku waholovona Omona wae opo atumine ouye, otyo ekahi keulu. (Daniel 7:13, 14) Ngotyo opo atumine ovanthu kamakala momapundaumbo ekahi nokutumina, Jesus kesukisile okukala pano pohi opo atumine ovanthu.—Tanga Mateus 8:5-9, 13.

Okuti ovanthu aveho mavetavela akale Omutumini? Au. Ovanthu vehole oviwa, ovo vala mavemutavela. Jeova makakombako aveho vana vaanya Omutumini wohole, nomuviuki, aholovona.​—Tanga Mateus 25:31-33, 46.

4. Oityi Omutumini wouye auho makalinga?

Ngetyi omunthita aongiya onongi mbae, Jesus wamanale okuongiya ovanthu vomitima omiwa movilongo aviho nokuvelongesa onondyila mba Huku mbohole. (João 10:16; 13:34) Ovanthu ovo vekahi nokutavela Jesus nombili noutumini wae. (Salmo 72:8; Mateus 4:19, 20) Ouye auho, ovataveli va Jesus vekahi nokuivisa kumwe okuti Jesus wakala Ohamba.​—Tanga Mateus 24:14.

Apa katutu Jesus nepondolo liae, makamanako omautumini ovanthu ovakalavi. Oe waholovona ovalanduli vae ovakuatyili opo vakatumine nae ouye ngonohamba keulu. (Daniel 2:44; 7:27) Ouhamba wa Jesus maukeyulisa oohi aiho enoñgonoko lia Jeova nokukaetako omphangu yombembwa ankho yakota tunde ponthyimbi yovanthu.​—Tanga Isaías 11:3, 9; Mateus 19:28.

Opo unoñgonoke vali konthele yotyo, tala okapitulu 8, momukanda ou walingwa no Nombangi mba Jeova. Oityi Ombimbiliya Tyili Ilongesa?