Omapulo Ombimbiliya Akumbululwa
Okuti nthiki imwe makukakala outumini wike ouye auho?
Oñgeni outumini wouye auho maukawaneka ovanthu aveho? Isaías 32:1, 17; 54:13
Soka oñgeni outumini wouye auho maukaetela ovanthu ouwa. Hono, ovanthu ovanyingi vamona ononkhumbi, iya ovakuavo ovahona unene. Mahi, omutumini una oluembia novanthu, uvepa atyiho vesukisa. Okuti ovanthu mavetyivili okuetako omutumini ukahi ngotyo?—Tanga Jeremias 10:23.
Tunde kohale, ovatumini kavekahi nokutyivila okulinga ovipuka ovinyingi opo vakuateseko ovanthu vavo, haunene vokuahepa. Ovatumini vamwe ovakalavi. (Eclesiastes 4:1; 8:9) Mahi, Huku Wepondolo Aliho, walaa okuti maetako outumini umwe maukapinga-ko omautumini aeho. Omutumini watyo, tyotyili makatekula nawa ovanthu.—Tanga Isaías 11:4; Daniel 2:44.
Oityi Ouhamba wa Huku maukalinga?
Jeova Huku waholovona Omutumini ukahi nawa, Omona wae, Jesus. (Lucas 1:31-33) Puetyi Jesus ankho ekahi pano pohi, wakuatesileko ovanthu. Mokonda Ohamba, makawaneka ovanthu aveho, nokukeveyovola kononkhumbi ambuho.—Tanga Salmo 72:8, 12-14.
Okuti ovanthu aveho mavetavela Okutuminwa na Jesus? Au. Mahi Jeova wapua elundo. (2 Pedro 3:9) Ukahi nokuavela ovanthu omphitilo yokutavela Okutuminwa na Jesus. Apa katutu, Jesus makamanako ovivi aviho, aeta ombembwa, nepamo mouye auho.—Tanga Miquéias 4:3, 4.