OMAPULO OMBIMBILIYA AKUMBULULWA
Okuti ononkhali mbetu mbupondola okuevelwa?
Okupandwa na Huku katyipuiya unene
Ombimbiliya ipopia okuti ovanthu aveho ovakuankhali. Eyembelo liokulinga onkhali, tuelipiñgana komulume wotete, Andau. Moluotyo, pamwe tulinga ovipuka ovivi iya konyima atulivele. Omona wa Huku, Jesus Kristu, wankhila ononkhali mbetu. Mokonda yotyilikutila tyae tyeyovo, ononkhali mbetu mbupondola okuevelwa. Otyo otyali tya Huku.—Tanga Romanos 3:23, 24.
Ovanthu vamwe valingile ononkhali ononene, pahe velipula inkha Huku upondola umwe okuveevela. Tyihambukiswa unene mokonda Ondaka ya Huku ipopia okuti: “Ohonde Yomona wae Jesus, itusukukisa kononkhali mbetu ambuho.” (1 João 1:7) Jeova wafuapo pala okuevela alo umwe ononkhali ononene, inkha tulivela.—Tanga Isaías 1:18.
Oityi tuesukisa okulinga opo tuevelwe?
Inkha tuhanda okuevelwa na Jeova Huku, tuesukisa okulilongesa konthele yae, okunoñgonoka onondyila mbae, nomalondolo ae, novitumino viae. (João 17:3) Motyali tyae, Jeova wevela vana velivela mokonda yovivi valingaile, avalingi ononkhono mbokupiluluka.—Tanga Atos 3:19.
Okupandwa na Huku katyipuiya unene. Jeova utyii okuti tuvakuankhali. Una okankhenda, noluembia. Okuti okunoñgonoka okuti Jeova una oluembia nokankhenda, katyikukalesa nehando liokulilongesa vali oñgeni upondola okumuhambukiswa?—Tanga Salmo 103:13, 14.