Yumba-ko Onthumbi Okuti Siovaa Weevela

1-2. Tyina twamelivele oityi Siovaa alinga, otyo tyitukalesa ñgeni? (Tala olutalatu lwo kondye.)

OHAMBA Ndaviti pena omuvo umwe ankho akalela vala okulivela onombei mokonda yononkhali alingaile. Ngwe tyili Ndaviti walingile umwe ononkhali ononene. (Ovii. 40:12; 51:3; onondaka mbokwahimbika) Mahi etyi elivela, apiluluka, Siovaa emweevela. (2 Sam. 12:13) Etyi Ndaviti etyimona okuti Siovaa wemweevela ahambukwa unene. — Ovii. 32:1.

² Nga Ndaviti noonthwe tupondola okuhambukwa unene tyina twamamono okuti Siovaa mokankhenda kae waevela ononkhali mbetu. Tyitupameka unene okunoñgonoka okuti Siovaa weevela ononkhali mbetu, nononkhali umwe ononene, mahi putyina twelivela atupopi ononkhali mbetu atulikwatehila umwe twahapaleke-po vali pweetyi twalingile. (Omih. 28:13; Ovil. 26:20; 1 Swau 1:9) Tupu tyitupameka okunoñgonoka okuti Siovaa weevela ononkhali twalingile atukala umwe ngatyina twehembulingile-ale. — Isek. 33:16.

3-4. Jennifer ankho tyimupwiya okutavela-tyi? Oityi matulilongesa monthele ei?

³ Vamwe tyina vamalingi onkhali pamwe tyivepwiya okutavela okuti Siovaa weveevela. Tutalei etyi tyalingile omufikwena umwe utiwa o Jennifer, ankho ukala no vohe Onombangi. Pweetyi omona ovohe vemulongesile umwe otyili, mahi etyi akola-ko katutu ai vala mokulinga ovivi, otyo etyiholeka kovohe. Wapopia wati: “Nelipakele mouhayo wokulihanda, nokunwa unene, no mokusuka vala nonombongo tupu ankho ndyinumana vala.” Pahe etyi pakala elivele, evi ankho alinga eviyeke-po ambatisalwa. Wapopia vali wati: “Ankho ndyityii umwe okuti ine ndyilivela Siovaa mandyevela mokonda otyilikutila tya Sesusi tyaawa umwe tyitusukule ononkhali. Mahi tyemphwiyile unene okutyipaka komutima tyokuti naevelwa umwe.”

⁴ Okuti noove pamwe tyikupwiya okutyipaka komutima tyokuti Siovaa waevela ononkhali mbove? Ndaviti wayumbile-ko umwe onthumbi okuti Siovaa wolwembia olunene wemweevela. Noonthwe Siovaa uhanda tuyumbe-ko onthumbi okuti wetweevela, wetulinga olwembia. Monthele ei, matutale omokonda yatyi twesukisila okuyumba-ko onthumbi okuti Siovaa utweevela, atutale etyi matyitukwatesako tutavele otyipuka otyo.

OITYI TWESUKISILA OKUTAVELA OKUTI SIOVAA WETWEEVELA?

5. Satanasi uhanda tusoke-tyi? Popia-po tyimwe.

⁵ Ine tutavela okuti Siovaa wetweevela kamatunkhi momaliva a Satanasi. Wahalimbwe-ko okuti Satanasi lili umwe nokututumba opo lituyapule ku Siovaa. Opo Satanasi lityivile, lipaka momutwe wetu olusoko lwokuti tyina twalinga onkhali Siovaa ketweevela-le nga tulivele vala. Tusokei komulume una, wo mewaneno lyo Kolindu wapolelwe mewaneno mokonda yokulinga ouhayo wokulihanda. (1 Kol. 5:​1, 5, 13) Etyi pakala omulume oo elivele mahi Satanasi ankho uhanda vomewaneno vehemweevele tupu vehemuyakule nawa. Satanasi ankho uhanda omulume oo asoke okuti onkhali alinga onene unene kayeevelwa-le, ‘elipetamene-po vala unene pahe ngatyo vali tyimuleka,’ otyo atyimutwala kokuyeka-po okufenda Siovaa. Satanasi kapilulukile, na hono eliva olio, olio eli nokutela. Mahi onthwe kamatunkhi-mo-ale “mokonda onomphango mbalio tumbwii.” — 2 Kol. 2:​5-11.

6. Ine tulivela onombei mokonda yeevi twalingaile, oityi tuna okulinga?

⁶ Ine tutavela okuti Siovaa utweevela kamatukalela okulivela onombei. Tyina twalinga onkhali tyokulivela onombei tyikala-po-ale. (Ovii. 51:17) Okulivela onombei tyikahi nawa, mokonda tyilekesa okuti etyi twalinga katwetyihandele, pahe atulikwatehila tulinge ovipuka nonondunge. (2 Kol. 7:​10, 11) Mahi pahe ine naapa twelivela-le tulivela vala onombei, otyo tusoka okuti Siovaa ketwevelele, opo matusoyo atuyeke-po okufenda Siovaa. Ine tutavela okuti Siovaa wetweevela umwe opo kamatulivele vali onombei. Opo matumulingila umwe ngeetyi ahanda, atumufende nehambu, nomutima upumphi. (Kolo. 1:​10, 11; 2 Tim. 1:3) Naina, oityi tuna okulinga tyikale umwe komutima tyokuti Siovaa wetweevela?

OITYI MATYITUKWATESAKO TUYUMBE-KO ONTHUMBI OKUTI SIOVAA UTWEEVELA?

7-8. Pokupopia na Mwisesi Siovaa welipopile okuti ukahi ñgeni, otyo tyitwavela onthumbi yatyi? (Okutunda 34:​6, 7)

⁷ Soka kweetyi Siovaa elipopia. Tala vala etyi apopilile Mwisesi Pomphunda Sinai.a (Tanga Okutunda 34:​6, 7.) Namphila Siovaa ena ovituwa ovinyingi oviwa ankho apondola okupopia, mahi tala vala evi atetekela-ko, wati, o “Huku wokankhenda wolwembia olunene.” Pahe okuti Huku wokankhenda wolwembia olunene, okumona omunthu welivela upondola okuhemweevela? Nii vala hatyo-ko alinga! Ou umona omunthu welivela mahi ehemweevela oo omukalavi una onya, mahi Siovaa Huku yetu hatyo-ko ekahi ngootyo.

⁸ Tuyumbei-ko onthumbi kweetyi Siovaa apopia okuti una olwembia mokonda ngwe kakembe, apeho upopia umwe otyili. (Ovii. 31:5) Naina tutavelei umwe kweetyi Ondaka yae ipopia. Mahi ine no ngootyo ulivela vala onombei mokonda yovivi walingaile kohale, lipula okuti: ‘Ndyitavela okuti Siovaa una olwembia una okankhenda okanene, ou walinga onkhali elivele umweevela? Opo omokonda yatyi nahayumbila-ko onthumbi okuti naame wandyevela?’

9. Oityi Oviimbo 32:5 itulongesa tyiyemba kokweevela kwa Siovaa?

⁹ Soka kweetyi Siovaa atuma ovahoneki v’Ombimbiliya vapopie tyiyemba kokweevela kwae. Tala vala etyi tyahoneka Ndaviti tyiyemba kokweevela kwa Siovaa. (Tanga Oviimbo 32:5.) Ndaviti wati “ove waevela ononkhali mbange novivi nalinga.” Mo Hembeleu ondaka “waevela,” ipopia “okuhumphula,” “okupola,” ine “okutyinda.” Naina etyi Siovaa aevela Ndaviti, ankho ongatyina ahumphula ononkhali mba Ndaviti embutyindi-po. Ndaviti akala umwe nawa ehelivele vali onombei mokonda wetyimona umwe okuti Siovaa wemweevela. (Ovii. 32:​2-4) Noonthwe tyina twamelivele ononkhali twalingaile, twahakalelei vali okulivela onombei, tuhatyindei vali omulemo wononkhali Siovaa etupola-le, embutyindi-po.

10-11. Onondaka mbokwati Siovaa “okupolela-po ovanthu oviponyo kusete” mbulekesa-tyi? (Oviimbo 86:5)

¹⁰ Tanga Oviimbo 86:5. Movelesikulu ei Ndaviti wati Siovaa ‘okupolela-po ovanthu oviponyo kasete.’ Onondaka ononkhwavo mbovelesikulu ei mbati: “Ove una olwembia lumwe olunene novanthu aveho vekuhivilika.” Ombimbiliya imwe pokupopia okweevela kwa Siovaa, onondaka ombo yembweenda ñgana: “[Siovaa] ‘weevela,’ ‘tyokweevela otyae.’” Ngeetyi twapopia-le monthele yokwalamba, Siovaa ulinga olwembia olunene ovanthu aveho vemuhole vehemuyeke-po. Olwembia lwae olunene olo lumutwala kokweevela “tyihakuluminywa” ovanthu aveho velivela. (Isa. 55:7 okatoi) Naina ine pamwe tyikupwiya okutavela okuti Siovaa wekweevela lipula ñgana: ‘Ndyitavela okuti aveho valinga onkhali avelivele avaiti Siovaa evelinge okankhenda, Siovaa uveevela umwe tyihasete? Opo naina naame ñgeno hitavela okuti etyi nelivela andyimwiiti andinge okankhenda wandyevela umwe?’

¹¹ Tyitupameka unene okunoñgonoka okuti Siovaa utyii umwe nawa okuti tuvakwankhali. (Ovii. 139:​1, 2) Otyo Ndaviti wetyipopia nawa motyiimbo otyikwavo pahe matulilongesa. Otyiimbo otyo natyo tyipondola okutuyumbisa-ko onthumbi yokuti Siovaa utweevela.

WAHALIMBWE ETYI SIOVAA AHINANGELA

12-13. Omu mutyipopila Oviimbo 103:​14, oityi Siovaa ahinangela, otyo tyimutwala kokulinga-tyi?

¹² Tanga Oviimbo 103:14. Ndaviti wapopia okuti Siovaa “kalimbwa okuti tumbuma yeheke.” Otyo Ndaviti apopia o tyimwe tyitwala Siovaa kokweevela tyihasete, ou walinga onkhali elivele. Siovaa utyii okuti twayemba kokulinga etyi tyapenga. Opo tutyinoñgonoke nawa tutalei onondaka ononkhwavo Ndaviti apopia.

¹³ Ndaviti wapopia okuti, Siovaa “utyii nawa etyi twatungwa.” Siovaa utyii okuti watungile Andau “nombundu yeheke.” Siovaa utyii okuti novanthu umwe vehena nkhali vesukisa okufima, nokulia, nokulangala-po. (Ehim. 2:7) Mahi pahe etyi ovo Andau na Eva valinga onkhali, ava vokwatuka muvo ankho vesukisa vali ovipuka ovikwavo. Onthwe vokwatuka muvo twati umwe onthwe tunthata onthwe tutyitwa-le nonkhali, otyo twayembela vala kokulinga evi viapenga. Siovaa utyii umwe nawa okuti tunthata tuvakwankhali pamwe matupengesa. Ndaviti wapopia okuti Siovaa otyipuka otyo ‘ketyilimbwa’ nii vala katutu, otyo apeho etulingila olwembia. Onondaka ombo tupondola okumbweenda ñgana: Siovaa utyii umwe okuti pamwe matupengesa. Mahi tyina twamapengesa atulivele atumwiiti etweevele, metweevela umwe. — Ovii. 78:​38, 39.

14. (a) Oityi vali Ndaviti apopia tyiyemba kokweevela kwa Siovaa? (Oviimbo 103:12) (b) Oityi tulilongesila kotyipuka Siovaa aevelele Ndaviti? (Tala okakasa kati: “Tyina Siovaa Amaevela Onkhali Wiilimbwa.”)

¹⁴ Oityi vali tyipondola okutukalesa nonthumbi yokuti Siovaa utweevela? (Tanga Oviimbo 103:12.) Ndaviti wapopia okuti tyina Siovaa ametweevela, ovivi tulinga “uvipakela kokule unene noonthwe, atulikala umwe navio ngeetyi outundilo welikalela kokule noutakelo.” Outundilo welikalela unene kokule noutakelo, nii vala kaulivasi-ale. Oityi otyo tyitulongesa tyiyemba kokweevela kwa Siovaa? Omukanda umwe otyipuka otyo wetyipopia ñgana: “Ine onkhali twiipolwa aitukala kokule, opo omuniko wayo nao wenda, nomalapia ayo asekuka-po.” Nkhele soka vala, otyipuka tyanika tyipondola okutukalesa omapita. Tyina Siovaa ametweevela, ongatyina elipola omuniko wonkhali apahamoneka vali natyike tyimuhinangelesa onkhali twalingile, etuvele onombei. — Isek. 18:​21, 22; Ovil. 3:19.

15. Oityi tuna okulinga ine tukalela vala okulivela onombei mokonda yovivi twalingaile?

¹⁵ Oityi vali Ndaviti apopia m’Oviimbo 103 tyitukwatesako okuyumba-ko onthumbi okuti Siovaa utweevela? Ine tukalela vala okulivela onombei mokonda yononkhali twalingaile tupondola okulipula ñgana: ‘Ndyikahi nokulimbwa etyi Siovaa ahinangela? Ndyikahi nokulimbwa okuti Siovaa utyii okuti ndyimukwankhali, una walinga onkhali elivele nga ame, umwevela? Ndyikahi nokuhinangela etyi Siovaa alimbwa, okuhinangela ononkhali aevela-le?’ Siovaa kakalela vala okusoka kovipuka ovivi twalingaile, noonthwe ñgeno otyo tulinga. (Ovii. 130:3) Ine tutavela okuti Siovaa wetweevela opo kamatulivele vali onombei, atutwalako okufenda Siovaa nehambu.

16. Popia-po tyimwe tyilekesa okuti hatyiwa-ko okukalela vala okusoka kovivi twalingaile. (Tala olutalatu.)

¹⁶ Okukalela vala okulivela onombei mokonda yononkhali twalingaile, tyafwa omunthu uli nokutaha etuku-tuku otyo atala vala motyilivandyelo. Tyili otyiwa umwe okutala pamwe motyilivandyelo opo umone etyi tyili konyima yove. Mahi opo uhike umwe oku uhanda, tupu ohapumu mwaava veli komutwe wove, otyiwa okutala oku wenda nako. Noonthwe otyiwa umwe pamwe okusoka kovivi twalingaile opo tulondokele-ko, atutyipake komutima tyokuhevipaleka vali. Mahi pahe ine otyo tukalela vala otyo, matulivele unene onombei atwehelipake vali unene movilinga vya Huku. Naina otyiwa okutala komutwe oku twenda nako. Ngwe tuli mondyila imwe onene maitutwala no mouye omupe wa Huku, omu ovipuka ovivi ‘viahakahinangailwa vali.’ — Isa. 65:17; Omih. 4:25.

TYIKALE KOMUTIMA

17. Oityi twesukisila okutyipaka komutima tyokuti Siovaa utuhole ya utweevela?

¹⁷ Twesukisa umwe okutyipaka komutima tyokuti Siovaa utuhole ya weevela ononkhali tulinga. (1 Swau 3:19 okatoi) Omokonda yatyi? Omokonda Satanasi uli umwe nokututumba etupake-tyo momutwe tyokuti Siovaa ketuhole-ale, tyina twamalingi etyi tyapenga ketweevela. Etyi Satanasi ahanda tyike vala, uhanda tuyeke-po okufenda Siovaa. Ya tutyii okuti matutumba vali unene mokonda utyii okuti omuvo wae kauhi. (Ehol. 12:12) Twehemuyekei etuyapule ku Siovaa.

18. Oityi tuna okulinga tyikale umwe komutima tyokuti Siovaa utuhole, utweevela?

¹⁸ Opo uyumbe-ko umwe onthumbi okuti Siovaa ukuhole, linga ovipuka twapopia monthele ei. Tyipaka umwe komutima tyokuti Siovaa utweevela, osoko kotyipuka Siovaa yatyo mwene elipopia. Soka kweetyi ovanthu vokwahoneka Ombimbiliya vapopia tyiyemba kokweevela kwae. Wahalimbwe-ko okuti Siovaa utyii okuti, twayemba kokupengesa, otyo etulingila okankhenda. Tupu hinangela okuti tyina Siovaa ametweevela, ulimbwa-ko umwe. Ine uyumba-ko onthumbi okuti Siovaa una olwembia, noove mopopi nga Ndaviti, watile: “Napandula Siovaa, ‘ove waevela ononkhali mbange novivi nalinga’!” — Ovii. 32:5.