Panda Oukuatyili Wa Jeova Notyituwa Tyae Tyokuevela

1, 2. (a) Omokonda yatyi tupandela omapanga ovakuatyili nokuafwapo pala okuevela? (b) Matukumbulula omapulo patyi?

KUOVE epanga liotyotyili likahi ñgeni? Ashley omphange umwe Omukristau wati: “Kuame epanga liotyotyili, oyouna ukahi apeho noove, nokukuevela tyina wamaponyo.” Atuho tuhole omapanga ovakuatyili, vafuapo pala okuevela, vetukuatesako okulitehela okuti tuapama nokuholwe.​—Provérbios 17:17.

² Epanga tupondola okukala nalio omukuatyili vali, nokuafwapo pala okuevela o Jeova. Omuhoneki wo no salmu wati: “Ove Jeova, umuwa nokuafwapo pala okuevela. Una oluembia olunene novanthu aveho vapopia enyina liove.” (Salmo 86:5) Okukala omukuatyili nokuafwapo pala okuevela tyihangununa tyi? Oñgeni Jeova alekesa ovituwa ovio oviwa? Oñgeni tupondola okumuhetekela? Omakumbululo omapulo oo maetukuatesako okuyawisa ohole yetu Kepanga lietu omuwa Jeova. Tupu maetukuatesako okupameka oupanga wetu navakuetu.​—1 João 4:7, 8.

JEOVA OMUKUATYILI

3. Okukala omukuatyili tyihangununa tyi?

³ Oukuatyili otyituwa tyimwe tyakutikinya okukala nonthilo, okuhakembe, nekolelo. Omunthu omukuatyili kapilauluka. Mahi ukakatela nohole momunthu (ine motyipuka tyimwe), utualako tyafuena komunthu oo (ine otyipuka) namphila pamoneka ovitateka. Tyotyili, “omukuatyili” wavilapo vali o Jeova.​—Revelação 16:5.

4, 5. (a) Oñgeni Jeova alekesa okuti omukuatyili? (b) Oñgeni okusoka koukuatyili wa Huku tyipondola okutupameka?

⁴ Oñgeni Jeova alekesa okuti omukuatyili? Apeho ukuatesako ovaumbili vae vekolelo. Umwe puvo, Ohamba David, wamuene oukuatyili wa Jeova. (Tanga 2 Samuel 22:26.) Mokueenda kuovitateka via David, Jeova wemuhongolelele noukuatyili, nokumuamena, nokumuyovola. (2 Samuel 22:1) David ankho utyii okuti Jeova kapopi vala okuti omukuatyili, mahi ukuatesako umwe ovaumbili vae. Omokonda yatyi Jeova akalele omukuatyili na David? Omokonda David ankho “omukuatyili.” Jeova upanda oukuatyili wovafendi vae, iya uveyamba noukuatyili.​—Provérbios 2:6-8.

⁵ Okusoka okuti Jeova omukuatyili novaumbili vae, tyitupameka. Reed, omukuatate umwe wekolelo wati: “Okutanga etyi Jeova alingile na David pomivo viovitateka, tyotyili tyankhuatesileko unene. Alo umwe puetyi David ankho enda nkholo, nokukaholama momaleva, Jeova ankho apeho umutekula. Otyo tyamphameka unene! Tyanthyinangelesa okuti inkha ndyikala novitateka, tyilinge ovinene ine ovitutu, Jeova mankhuatesako okutualako omukuatyili nae.” Tyotyili, nove usoka ngotyo.​—Romanos 8:38, 39.

6. Omononkhalelo patyi ononkhuavo Jeova alekesa oukuatyili? Oñgeni otyo tyietela ouwa ovafendi vae?

⁶ Omononkhalelo patyi ononkhuavo Jeova alekesa oukuatyili? Onkhalelo imwe, okukakatela movitumino viae muene. Utupopila okuti: “Alo umwe omunthu akulupa, Ame vala.” (Isaías 46:4) Omatokolo alinga apeho elikuata novitumino viae vihapiluluka konthele yetyi tyaviuka netyi tyahaviukile. (Malaquias 3:6) Tupu, Jeova ulekesa oukuatyili pokufuisapo omilao viae. (Isaías 55:11) Oukuatyili wa Jeova wetela ouwa ovafendi vae aveho vekolelo. Ñgeni ngotyo? Tyina tulinga ononkhono mbokulandula ovitumino via Jeova, tupondola okukala nonthumbi yokuti mafuisipo omulao wae wokutuyamba.​—Isaías 48:17, 18.

HETEKELA OUKUATYILI WA JEOVA

7. Omonkhalelo patyi tupondola okuhetekela oukuatyili wa Huku?

⁷ Oñgeni tupondola okuhetekela oukuatyili wa Jeova? Onkhalelo imwe okukuatesako vana vena ovitateka. (Provérbios 3:27) Mongeleka, okuti wii omukuatate ine omphange wasoya, hamwe mokonda yokuvela, oundyale mombunga, ine oviponyo alinga? Omokonda yatyi uhailako okemupopila “onondaka onongwa, mbupameka”? (Zacarias 1:13)a Tyina ulinga ngotyo, ulekesa okuti upanga liotyotyili, iya umukuatyili, “upona vali una muatyitwa nae.”​—Provérbios 18:24.

8. Oñgeni tupondola okuhetekela oukuatyili wa Jeova motyinepo?

⁸ Tupu tupondola okuhetekela oukuatyili wa Jeova pokutualako okukala ovakuatyili navana tuhole. Mongeleka, inkha tuanepa ine tuanepwa, tutyii okuti tuna okutualako noukuatyili nauna tuelinepa nae. (Provérbios 5:15-18) Moluotyo, tuhalingei natyike tyipondola okutuala koumbalehi. (Mateus 5:28) Tupu, tulekesa oukuatyili kuvana tufenda navo, pokulityilika okuveamba ine okuvetendeleya, nokuhayandyanesa etompho olio evi ine okulitehelela.​—Provérbios 12:18.

9, 10. (a) Haunene okulie tuhanda okutualako okukala ovakuatyili? (b) Omokonda yatyi pamwe katyapepukile okutavela ovitumino via Jeova?

⁹ Haunene, tuhanda okutualako okukala ovakuatyili ku Jeova. Oñgeni matutyilingi? Pokulinga ononkhono mbokutala ovipuka ngetyi evitala, nokukala nohole netyi ehole, nokuyala etyi eyele, nokuendesila omuenyo wetu movitumino viae. (Tanga Salmo 97:10.) Tyina tulinga ononkhono mbokukala nomalusoke elikuata no a Jeova, matukala vali neyembelo liokutavela ovitumino viae.​—Salmo 119:104.

¹⁰ Tyotyili, pamwe katyapepukile okutavela ovitumino via Jeova. Mahi, tuesukisa okulinga ononkhono mbokutualako noukuatyili. Mongeleka, Ovakristau vamwe vahanda okunepa, mahi nkhele kavenevase povafendi va Jeova una vahanda. (1 Coríntios 7:39) Hamwe omphange umwe utala okuti vana aundapa navo vehelilongesa vemuhongiliya opo etavele ovakuendye vomouye. Omphange hamwe kelitehelale nawa mokonda yokuahanepelwe. Mahi nongotyo, ulinga ononkhono opo atualeko noukuatyili wae ku Jeova. Katupande onongeleka ombo onongwa mboukuatyili? Tyotyili, Jeova mayambe aveho vatualako noukuatyili mwe namphila vena ovitateka.​—Hebreus 11:6.

JEOVA OMUEVELI

11. Okukala omueveli tyihangununa tyi?

¹¹ Otyituwa otyikuavo otyiwa tya Jeova, ehando liae liokuevela. Okukala omueveli tyihangununa tyi? Omunthu omueveli katualako tyanumana tyina vakuavo vemulinga tyimwe ahahandele. Otyo katyilekesa okuti etyi vemulinga katyemuihamene ine ketyimuene. Mahi, utokola okuhakala nonkhongo. Ovihonekwa vitulongesa okuti Jeova “wafuapo pala okuevela” vana velivela nomutima auho.​—Salmo 86:5.

12. (a) Oñgeni Jeova alekesa okuti wafuapo pala okuevela? (b) “Okunyimapo” ononkhali tyihangununa tyi?

¹² Oñgeni Jeova alekesa okuti wafuapo pala okuevela? Tyina Jeova aevela, wevela umwe ehetyihinangaila vali. (Isaías 55:7) Oñgeni tutyii okuti Jeova wevela umwe ehetyihinangaila vali? Tutalei onondaka mbukahi mu Atos 3:19. (Tanga.) Apostolu Petulu walondolele ovateheleli vae okuti, “livelei . . . amupilulula onkhalelo yomuenyo wenyi.” Tyina wokualinga onkhali elivela nomutima auho, uyekapo okulinga ovivi. Tupu utokola okuhalingi vali onkhali. (2 Coríntios 7:10, 11) Moluotyo, okulivela nomutima auho tyilunda omunthu “okupilulula onkhalelo yomuenyo wae,” ayekepo okulinga ovivi, aovola okuhambukiswa Huku. Inkha ovateheleli va Petulu velivelele nomutima auho, ouwa patyi ñgeno vapolako? Petulu wapopile okuti, ononkhali mbavo ñgeno “mbanyimuapo.” Ondaka oyo mo Gregu ihangununa “okusekuna, nokupela.” Moluotyo, tyina Jeova aevela, ongatyina akuata otyinyanga tyasila etyikoho atyisukuka nawa. Wevela umwe ehetyihinangaila vali.​—Hebreus 10:22; 1 João 1:7.

13. Onondaka “himahinangela vali onkhali yavo” mbutukalesa nonthumbi patyi?

¹³ Oñgeni tutyii okuti Jeova wevela ononkhali mbetu ehembuhinangaila vali? Tala eulo lia Jeremia konthele yomphango omphe, yalingwa Novakristau ovalembulwa, yaikula ondyila opo vana vena ekolelo mofeto yeyovo vaevelwe. (Tanga Jeremias 31:34.) Jeova wati: “Mandyievela otyiponyo tyavo, himahinangela vali onkhali yavo.” Moluotyo, Jeova utukalesa nonthumbi yokuti tyina aevela, kameketukoyesa vali mokonda yononkhali tualingaile. Kamapitaulula vali ononkhali mbetu opo etuhitise. Mahi, Jeova wevela ononkhali ombo, embutyindamena.​—Romanos 4:7, 8.

14. Oñgeni okusokolola kotyituwa tya Jeova tyokuevela tyitupameka? Ava ongeleka.

¹⁴ Okusokolola kotyituwa tya Jeova tyokuevela tyitupameka.Tala ongeleka imwe. Kohale, omphange umwe utiwa Elaine, wapolelwe mewaneno. Konyima yomanima omanyingi, akondoka mewaneno. Elaine wati: “Namphila ankho ndyitavela okuti Jeova wandyevela, apeho ankho ndyilitehelela okuti ukahi kokule naame ine vakuetu vafuena vali kwe, nokuna vali oupanga omuwa nae.” Mahi, Elaine wapamekua mokonda ankho utanga Ombimbiliya nokusokolola kuetyi ipopia konthele yotyituwa tya Jeova tyokuevela. Elaine wati: “Natehelela ohole ya Jeova nokankhenda monkhalelo imwe ankho nehei.” Haunene wapelue ondundo nolusoke olu: “Tyina Jeova amaevela ononkhali mbetu, katuesukisile vali okulivela onombei mokueenda kuomuenyo wetu auho.”b Elaine wati: “Ame ankho hitavela okuti Jeova upondola okundyevela, ankho ndyisoka okuti mandyitualako nomulemo oo mokueenda kuomuenyo wange auho. Palamba omuvo omunyingi, mahi etyi nahimbika okusoka okuti tyotyili ndyipondola okufuena ku Jeova, nelitehelela okuti omulemo wahimbika okutepuluka.” Tyotyili, Jeova o Huku woluembia, nokuafwapo pala okuevela!​—Salmo 103:9.

HETEKELA OTYITUWA TYA JEOVA TYOKUEVELA

15. Oñgeni tupondola okuhetekela otyituwa tya Jeova tyokuevela?

¹⁵ Tupondola okuhetekela otyituwa tya Jeova tyokuevela tyina tuevela vakuetu. (Tanga Lucas 17:3, 4.) Hinangela okuti tyina Jeova aevela, ulimbuako ononkhali mbetu, kembupitaulula vali opo etuhitise. Tupu tyina tuamaevela vakuetu, tulimbueiko, atuhetyinkhindaulula vali.

16. (a) Okuti okuevela okunianga ine okuyeka vakuetu vanyanene kuonthue? Hangununa. (b) Opo tuevelwe na Huku, oityi tuna okulinga?

¹⁶ Okuevela katyilekesa okuti tuna okunianga ine okuyeka vakuetu vanyanene kuonthue. Mahi, tyilekesa okutokola okuhakala nonkhongo. Tyotyili, tuesukisa okuhinangela okuti inkha tuhanda okuevelwa na Huku, nonthue tuna okuevela vakuetu. (Mateus 6:14, 15) Jeova uhinangela okuti “tuatunda keheke,” iya tuvakuankhali. (Salmo 103:14) Moluotyo, tyina vakuetu vetupopia ine vetulinga tyimwe tuahahandele, tuesukisa okuhinangela okuti navo ovakuankhali ngonthue, iya atuveevela nomutima auho.​—Efésios 4:32; Colossenses 3:13.

17. Inkha tuanumana nomukuatate wetu, oityi tyipondola okutukuatesako?

¹⁷ Tyotyili, okuevela pamwe katyapepukile. Alo umwe Ovakristau vamwe ovalembulwa vokohale tyevepuilisile okutetulula ovitateka viavo. (Filipenses 4:2) Inkha tuanumana nomukuatate wetu, oityi tyipondola okutukuatesako? Tala ongeleka ya Job. Wanumanene unene etyi “omapanga” ae, Elifaz, na Bildade, na Zofar, vemutendeleyile. (Jó 10:1; 19:2) Konyima, Jeova aviyula ovatendeleyi ovo. Huku evetumu vaye ku Job vakaave otyilikutila tyononkhali mbavo. (Jó 42:7-9) Mahi, tupu Jeova wahandele Job alinge otyipuka tyimwe. Oityi? Jeova waitile Job alingileko elikuambelo ovalume vokuemutendeleya. Job walingile etyi Jeova emuita, iya Jeova emuavela ononkhano onongwa mokonda yotyituwa tyae tyokuevela. (Tanga Jó 42:10, 12, 16, 17.) Otyo tyitulongesa tyi? Okulingilako elikuambelo nomutima auho una wetuleva, matyitukuatesako okuhakala nonkhongo.

TUALAKO OKUPANDA VALI UNENE OVITUWA VIA JEOVA

18, 19. Oityi tuesukisa okulinga opo tutualeko okupanda vali ovituwa oviwa via Jeova?

¹⁸ Tyotyili, tyetupameka unene okulilongesa ononthele ononyingi mbovituwa oviwa via Jeova. Tuelilongesa okuti Jeova wapepuka omutima, utupu okapungulula, una otyali, wapola pokati, omukuatyili, nokuafwapo pala okuevela. Tyotyili, tuelilongesa vala katutu konthele yovituwa ovio. Mahi, tupondola okukala nehambu liokulilongesa vali konthele ya Jeova apeho. (Eclesiastes 3:11) Tutavela etyi apostolu Paulu ahoneka okuti: “Omalumono a Huku nounongo wae nenoñgonoko viaya kohi unene ngatyi,” mahi kapopile oluembia, novituwa epandu tuelilongesa.​—Romanos 11:33.

¹⁹ Atuho tutualeiko okupanda vali ovituwa oviwa via Jeova. Opo tutyilinge, tuesukisa okuvinoñgonoka, nokuvisokolola, nokuvihetekela. (Efésios 5:1) Tyina tuamalingi ngotyo, tyotyili matutavela vali unene onondaka mbomuhoneki wo no salmu waimbile okuti: “Kuame okufuena ku Huku otyiwa.”​—Salmo 73:28.