Omokonda Yatyi Otyiwa Okutala Nawa Ongeleya Yove?

Soka ñgeno wesukisa okutandwa mokonda youvela umwe. Uhanda okuvasa ondotolo imwe uyumba onthumbi opo ekutande, mokonda omuenyo wove maukala pomaoko ae. Hatyiwa okutala nawa inkha ondotolo oyo iholeale okutyilinga?

Tupu, otyiwa okutala nawa ongeleya. Inkha uli mongeleya imwe, tyotyili oupanga wove na Huku utei kuetyi ulilongesa mongeleya oyo. Otyo tyakutikinya ekevelelo liove liomuenyo wahapu.

Jesus waava onondonga mbutukuatesako okutala nawa inkha ongeleya yetu oyotyotyili. Wati: “Kese omuti utalelwa kovinyango viao.” (Lucas 6:44) Mongeleka, tyina utala ongeleya imwe, ovinyango patyi yaava? Okuti ononkhalamutwe mbonongeleya vapopia vali unene konthele yonombongo? Okuti vokukahimo valandula onondonga Mbombimbiliya konthele yovilwa, novituwa? Okuti kuna ongeleya yatokala okuyumbwa onthumbi? Tukuavela ondundo opo utale nawa ononthele mbulandulako.