OSAPI YOKONDYE | OMATUTU ALINGISA OVANTHU OKUSOKA OKUTI HUKU KATOKALELE OKUHUMBWA
Tyesukisa Ononkhono Pala Okukala Nohole na Huku
“‘Una okukala nohole na Jeova Huku yove nomutima wove auho, nomuenyo wove auho no nondunge mbove ambuho.’ Etyi, otyo otyitumino tyotete, notyinene vali.”—Jesus Kristu, 33 P.K.a
Ovanthu vamwe tyivepuiya okukala nohole na Huku. Vasoka okuti Huku upuiya okunoñgonokwa, kesuku novanthu ine omukalavi. Tala etyi vamwe vapopia:
“Ankho ndyilikuambela ku Huku opo ankhuateseko, mahi ankho tupu ndyisoka okuti kesuku novanthu. Ankho ndyisoka okuti Huku utupu okankhenda.”—Marco, woko Itália.
“Namphila ankho nahanda umwe okuumbila Huku, mahi ankho ngoti kesuku novanthu. Ankho ndyisoka okuti Huku omukalavi uhanda vala okutumonesa ononkhumbi. Ankho hitavela okuti una oluembia.”—Rosa, woko Guatemala.
“Pouna ankho ndyitavela okuti Huku wovola vala oviponyo vietu opo atale inkha tuatokala okuhitiswa. Konyima, andyimutale ngatyina ehesuku novanthu. Huku ankho ndyimutala ngoti omutumini uhongolela ovanthu mahi kesukile navo.”—Raymonde, woko Canadá.
Oityi usoka? Okuti Huku katokalele okuhumbwa? Olio epulo Ovakristau velilinga mokueenda kuomanima omanyingi. Tyotyili, mokueenda kuenima 500 alo mo 1500 P.K., Ovakristau ovanyingi vomouye ankho kavelikuambela ku Huku Wepondolo Aliho. Omokonda yatyi? Ovanthu ankho vena owoma omunene na Huku. Omuhipululi Will Durant wati: ‘Oñgeni omunthu omukuankhali ankho apondola okulikuambela ku Huku omukalavi wehesuku novanthu?’
Omokonda yatyi ovanthu vatalela Huku ngatyina “omukalavi nokuhesuku novanthu”? Oityi Ombimbiliya tyili ilongesa konthele ya Huku? Okuti okulilongesa otyili konthele ya Huku tyipondola okukukuatesako okukala nohole nae?