Omatutu Alingisa Ovanthu Okusoka Okuti Huku Omukalavi

OITYI OVANYINGI VASOKA

O Katikisimu Kongeleya yo Katolika, kalongesa okuti “tyina onondingavivi mbunkhia, liwa-liwa onohande mbavo mbuenda mo ifelunu, muna mambukamona ononkhumbi, ‘motupia tuahapu.’” Ononkhalamutwe mbumwe mbo nongeleya mbupopia okuti vana vekahi mo ifelunu, vekahi kokule na Huku.

OTYILI TYOMBIMBILIYA

“Ohande ilinga onkhali oyo mainkhi.” (Ezequiel 18:4) Vokuankhia “kavei vali natyike.” (Eclesiastes 9:5) Inkha ohande inkhia iya kaii vali natyike, oñgeni ipondola okumona ononkhumbi “motupia tuahapu” ine okumona ononkhumbi mokonda ikahi kokule na Huku?

Mombimbiliya, onondaka mbo Hebreu no Gregu, apeho mbupitiya “o ifelunu” okuti elangalo liovanthu aveho. Mongeleka, etyi Job avelele unene, welikuambelele okuti: “Nahandele ñgeno wanthyolekele melangalo [“mo ifelunu,” Ombimbiliya Douay-Rheims].” (Jó 14:13, Holy Bible​—Easy-to-Read Version) Job ankho uhanda okupululukuapo melangalo, ankho ha momphangu mamoneswa ononkhumbi ine okukala kokule na Huku.

OTYO TYAKOLELA MOKONDA YATYI

Okupopia okuti Huku omukalavi katyitufueneka kwe, mahi tyituyapula. Rocío ukala ko México wati: “Tunde pouna nalongeswa okuti kuna o ifelunu. Ankho ndyina owoma omunene, iya ankho hisoko okuti Huku una ovituwa oviwa. Ankho ndyisoka okuti omukalavi iya kaevela.”

Etyi Ombimbiliya ipopia konthele yomakoyeso a Huku, nonkhalelo yo vokuankhia, tyakuatesako Rocío okupilulula onkhalelo ankho atala Huku. Wati: “Nelitehela nawa, ngatyina napolwa otyipuka tyimwe ankho tyalema. Andyihimbika okukala nonthumbi yokuti Huku utuhandela oviwa, utuhole, iya naame ndyipondola okukala nohole nae. Oe ukahi nga he ukuatesako ovana vae, nokuvehandela oviwa.”​—Isaías 41:13.

Ovanyingi valinga ononkhono mbokuenda kongeleya mokonda vena owoma no ifelunu. Mahi Huku kahande umufende mokonda una owoma nae. Jesus wapopile okuti: “Una okukala nohole na Jeova Huku yove.” (Marcos 12:29, 30) Tupu hono, tyina tunoñgonoka okuti Huku hamukalavi, tupondola okuyumba onthumbi komakoyeso makalinga komutwe wandyila. Nga Eliuu epanga lia Job, tupondola okupopia nonthumbi okuti: “Okulinga ovivi tyikahi kokule na Huku yotyotyili. Wepondolo Aliho kalingi natyike tyahaviukile.”​—Jó 34:10.