Omatutu Alingisa Ovanthu Okusoka Okuti Huku Utupu Enyina

ETYI OVANYINGI VASOKA

“Tuna omalusoke elikalaila konthele ya Huku inkha una enyina ine utupu, mahi, inkha una enyina, utiwa olie.”​—Onondaka mbo Mulongesi David Cunningham, Theological Studies.

OTYILI TYOMBIMBILIYA

Huku wati: “Ame, ame Jeova. Eli olio enyina liange.” (Isaías 42:8) Enyina Jeova mo Hebreu lihangununa okuti “Oe Ukala Etyi Ahanda.”​—Gênesis 2:4, onondaka pokatoi.

Jeova uhanda tuundapese enyina liae. Ombimbiliya yati: “Popiei enyina liae. Noñgonokesei ovanthu aveho ovilinga viae. Popiei okuti enyina liae lina okunkhimanekwa.”​—Isaías 12:4.

Jesus ankho upopia enyina lia Huku. Melikuambelo, Jesus wapopilile Jeova okuti: “Ame nevenoñgonokesa [ovalongwa va Jesus] enyina liove, iya mandyitualako okulinoñgonokesa.” Omokonda yatyi Jesus anoñgonokesila enyina lia Huku ovalongwa vae? Watuaileko okuti: “Opo ohole ei ove [Huku] una naame, nayo ikale muvo iya naame ndyikale navo.”​—João 17:26.

OTYO TYAKOLELA MOKONDA YATYI

Omunongo Walter Lowrie wahonekele okuti: “Omunthu uhei enyina lia Huku, tyilityili kemwi, iya kapondola okukala nohole nae inkha umwii vala okuti ononkhono ononene.”

Omulume umwe utiwa Victor, ankho wenda onosimano ambuho kokapela, mahi ankho kelitehela okuti tyilityili wii Huku. Wati: “Etyi nelilongesa okuti enyina lia Huku o Jeova, tyakala ngatyina o Huku yatyo muene ukahi nokumphopila enyina liae. Nelitehela ngatyina nelivasa Nomunthu ankho ndyiiva-ivale. Nanoñgonoka okuti Omunthu wotyotyili iya andyilingi oupanga nae.”

Jeova ukala epanga liavana vapopia enyina liae. Konthele “yavana vasoka kenyina liae,” Huku walaa okuti: “Mandyikala nokankhenda navo, ngetyi omulume ena okankhenda nomona wae umuumbila.” (Malaquias 3:16, 17) Tupu Huku uyamba vana vapopia enyina liae. Ombimbiliya yati: “Kese munthu wivisa enyina lia Jeova, makayovolwa.”​—Romanos 10:13.