Nombimbiliya vakumbulula omapulo aeho!

OMUENYO WANGE KOHALE:

Etyi natyitwa ovotate ankho vakala mokalongo okatutu mo Galicia monomphati mbekumbi ko Espanya. Ame ankho ndyimona wakuana povana etyinana. Meumbo lietu ankho tuna ombembwa. Pomuvo opo ankho mo Espanya, monombunga ononyingi omona wahulililako una okulinga o siminaliu ine okunyingila mo kapela. Mombunga yetu, vetatu puonthue tuetyivilile okulinga ngotyo.

Etyi natuula omanima 13, andyikakala nomukulu wange mokapela mo Madrid. Mokati omo ovanthu ankho vetupu oluembia. Kamulingwa oupanga —ovitumino vala, nomalikuambelo, novilinga. Komuhuka apeho ankho tuliongiya mokapela pala okusokolola, namphila ame ankho nehena natyike ndyisoka. Konyima, atuhimbika okuimba oviimbo viokapela nokulinga omisa, mo Latin. Ame ankho hinoñgonoka natyike, ankho ndyilitehela okuti Huku ukahi kokule naame. Ankho ndyihimama momphangu omo muati vala filuu. Alo umwe tyina ankho tulivasa nomukulu wange, ankho tuti vala, “Oñgeni mumphembela Maliya.” Vomo kapela ankho vetuyeka vala tutomphole ono minutu 30 tyina tuamana okulia. Otyo ankho tyelikalela unene nombunga yange yehambu nasapo keumbo! Ankho ndyilitehela naliwa nounye andyilili.

Namphila nalumwe nelitehelele okuti nafuena ku Huku, mahi nalingile atyiho napanga, etyi natuula omanima 17 andyikala omadre. Tyotyili, navasa etyi ankho ndyikevela, mahi konyima andyihimbika okulipula inkha tyilityili naholovonwa umwe na Huku opo ndyilinga otyilinga otyo. Ono mandre apeho ankho vapopia okuti omunthu una ondima makapia mo ifelunu! Mahi, ame nkhele ankho ondima yange itualako. Ndyityii okuti Jesus Kristu ankho kakala aike, ankho uundapa unene okulongesa nokukuatesako vakuavo. (Mateus 4:23-25) Etyi natuula omanima 20, anahahande vali okutualako noumandre. Nthiki imwe, omandre yokututumina amphopila okuti inkha kuhande vali okukala muno upondola okuenda. Tyafuile ankho una woma wokuti ndyipondola okuhongiliya vakuetu. Ngotyo okapela andyikesipo.

Etyi nehika keumbo, ovotate avetavela etyi natundilako. Mahi pomuvo opo, potyilongo tyetu ankho ovilinga kavimoneka, andyiilukila ko Alemanya ankho kukala omphange yange. Ankho ulinga onthele yo Comunista (otyikundyi tyokuamena ovanthu) ko Espanya. Okukala pokati kovanthu ovo, ankho tyinkhalesa nawa ankho valinga ononkhono mbokuamena ovaundapi nokuhatombo ovakai. Ngotyo, andyikala wotyikundyi otyo, etyi pakala katutu atulinepe na umwe motyikundyi otyo. Ame ankho ndyisoka okuti ndyikahi nokulinga etyi tyaviuka, okutyinda omikanda vio Comunista nokuenda momatapalo okulekesa okuti tuayala etyi ovatumini vekahi nokulinga.

Mahi, etyi pakala, andyisoyo. Ankho ndyilitehela okuti vo Comunista kavekahi nokulinga etyi vapopia. Menima 1971 omalusoke oo aevilipo etyi ovakuendye vamwe motyikundyi tyetu vayoka Ondyuo Yokuamena ova Espanya (Consulado), mo Frankfurt. Ankho vanumana mokonda yokuhanda etyi vatokala kovatumini vo Espanya. Mahi ame ankho ndyityii okuti onkhalelo oyo vaovola ouviuki yapenga.

Etyi omona wetu wotete atyitwa, andyipopila omulume wange opo nahaye vali komaliongiyo o Comunista. Ankho ndyilitehela okuti ndyimulike mokonda nawike epanga liange uya okunthalelapo ine okutala olukembe luange. Ankho ndyihanda okunoñgonoka oityi omuenyo walingilua. Okuti ankho tyaviuka okulinga ononkhono mbokuamena otyilongo?

OÑGENI OMBIMBILIYA YAPILULULA OMUENYO WANGE:

Menima 1976, onombangi vevali voko Espanya avatotola kepitu lietu avandyavela omikanda viapolwa Mombimbiliya, andyivitambula. Etyi veya okunthalelapo otyikando tyavali, andyivelingi omapulo etano konthele yononkhumbi, nomutomba, nokulingwa onya. Andyikala tyahuva etyi vaundapesa Ombimbiliya pala okukumbulula omapulo ange! Andyitavela okulilongesa Ombimbiliya.

Tete ankho nahanda vala okutala inkha etyi vapopia otyili. Mahi ovipuka avipiluluka etyi ame nomulume wange tuahimbika okuenda komaliongiyo Onombangi mba Jeova. Pomuvo opo, ankho tuna ovana vevali. Onombangi avetuyakula nokankhenda nokutukuatesako okulela ovana vetu momaliongiyo. Ndyilitehela ndyikahi nawa pokati Konombangi.

Mahi nongotyo, ankho nkhele ndyina ondima konthele yonongeleya. Andyitokola okutalelapo ombunga yange ko Espanya. Manthu yange, ankho omunakwa, anthyongiliya ndyiyekepo okulilongesa Ombimbiliya. Mahi Onombangi vopotyilongo avakuatesako unene. Vakumbulula omapulo ange Nombimbiliya, ngetyi tyalingile Onombangi voko Alemanya. Etyi nakondoka ko Alemanya, andyitualako okulilongesa Ombimbiliya. Namphila omulume wange ayekelepo okulilongesa Ombimbiliya, ame andyitualako. Mo 1978, andyimbatisalwa andyikala Ombangi ya Jeova.

OUWA PATYI NAPOLAKO:

Enoñgonoko liafuapo liotyili Tyombimbiliya liandyetela esilivilo liomuenyo nonkhalelo ongwa. Mongeleka, 1 Pedro 3:1-4 ulunda ovakai okuti “okutavela” kovalume vavo “nehumbilo enene” nokukala “nomutima weliola tyakolela unene komaiho a Huku.” Ovitumino viankhuatesako okukala omukai omuwa nokutekula nawa ovana.

Palambale omanima 35 tunde apa nakala Ombangi. Ame ndyina ehambu enene liokuumbila Huku mombunga yotyotyili yopamphepo nehambu enene liokutala ovana vekuana povana vange vetano navo vakahi nokulinga ngotyo.