OMAPULO OMBIMBILIYA AKUMBULULWA

Oityi tuesukisila okulikuambela?

Jeova Huku uhanda tulikuambele apeho kwe konthele yomasukalalo etu tyihena tyinkhe. (Lucas 18:1-7) Huku ututehelela mokonda wesuka nonthue. Inkha Tate yetu keulu utukonga tulikuambele kwe, oityi tuhetavelela?​—Filipenses 4:6.

Okulikuambela hakuita vala ekuateso. Mahi, okulikuambela tyitukuatesako okuhika ku Huku. (Salmo 8:3, 4) Tyina tupopila Huku omalusoke etu, tupameka oupanga wetu nae.​—Tiago 4:8.

Oñgeni tuna okulikuambela?

Tyina tulikuambela, Huku kahande tupopie onondaka onongwa unene ine okuwanawana onondaka. Tupu ketuiti onkhalelo tuna okukala. Jeova uhanda tupopie etyi tyitunda momutima. (Mateus 6:7) Mongeleka, kohale mo Isilayeli, Ana welikuambelele konthele yotyitateka tyimwe mombunga. Konyima, ononkhumbi mbae ambupingwa nehambu, apandula Huku nelikuambelo alingila momutima.​—Tanga 1 Samuel 1:10, 12, 13, 26, 27; 2:1.

Tuna elao enene ngatyi! Onthue tupondola kohika Komutungi wetu nomasukalalo etu. Tupu tupondola okumuhilivika nokumupandula muatyiho alinga. Tyotyili katupondola okuyekapo elao ngolio.—Tanga Salmo 145:14-16.