Ouhamba wa Huku Oityi Uhangununa ku Jesus

Ngetyi tuetyimona monthele yokualamba Jesus wamanene omuvo wae movilinga “viokuivisa onondaka onongwa Mbouhamba wa Huku” (Lucas 8:1) Walingile ononkhono onene okuenda onokilometulu omakui nomakwi motyilongo tyo Isilayeli pala okulongesa Ouhamba wa Huku. Ovilinga via Jesus viokuivisa viahonekwa mono Evandyeliu ononkhuana muvahiwa ondaka Ouhamba ovikando vilamba po 100. Iya onondaka ombo ambuho mbapopiwa na Jesus, nkhele mbulekesa nawa onondaka ambuho Jesus apopia konthele Youhamba wa Huku!​—Joao 21:25.

Omokonda yatyi Ouhamba ankho otyipuka tyakolela unene ku Jesus puetyi ekahi pano pohi? Otyipuka tyimwe, omokonda Jesus ankho utyii okuti Huku wemuholovona akale omutumini Wouhamba. (Isaías 9:6; Lucas 22:28-30) Mahi Jesus ankho katale kovilinga viae ine komunkhima. (Mateus 11:29; Marcos 10:17, 18) Jesus kayandyanehile Ouhamba wa Huku pala omahando ae muene. Otyipuka tyotete ankho tyilunda Jesus okusuka vali Nouhamba wa Huku omokondaa yetyi mauya okulingila ovanthu ehole unene​—Tate yae keulu novalongwa vae vekolelo.

OITYI OUHAMBA MAULINGI PALA TATE YA JESUS

Jesus uhole unene Tate yae keulu. (Provérbios 8:30; João 14:31) Ovituwa via He vihuvisa unene Jesus, oluembia Lwae, okankhenda Kae, nouviuki Wae. (Deuteronômio 32:4; Isaías 49:15; 1 João 4:8) Tyotyili, uyele omatutu eiva ekahi nokupopiwa konthele ya Tate yae​—ngetyi okupopia okuti Huku kesukile no nonkhumbi mbovanthu, iya otyo ahanda ovanthu okumona ononkhumbi. Olio ehunga limwe liavela Jesus ondundo “yokuivisa onondaka onongwa Mbouhamba​—Jesus ankho utyii okuti nthiki imwe Ouhamba mausukukisa enyina ewa lia Tate yae.” (Mateus 4:23; 6:9, 10) Oñgeni Ouhamba mauketyilinga?

Nouhamba, Jeova makalinga omapiluluko omanene pala okukuatesako ovanthu. “Makasekuna ononkhuka momaiho” ovanthu ovakuatyili. Jeova makamanako ovipuka aviho vieta ononkhuka, tyilekesa okuti “ononkhia, nokulila, no nongembia kamavikakalako vali.” (Revelação 21:3, 4) Nouhamba wae, Huku makanyimako ononkhumbi ambuho mbovanthu.b

Katyihuvisa okunoñgonoka okuti Jesus waivisile nombili onene Ouhamba wa Huku kovanthu! Ankho utyii okuti otyo matyilekesa epondolo nokankhenda Tate yae ena. (Tiago 5:11) Jesus tupu ankho utyii okuti Ouhamba mauwetela ouwa vana ehole​—ovanthu vekolelo.

OITYI OUHAMBA WA HUKU MAUKALINGILA OVANTHU VEKOLELO

Etyi Jesus ankho eheneye pano pohi ankho ukala na Tate yae. He watuma Omona wae alinge ovipuka aviho vili keulu, ononthungululu, nomikeka-keka, nohi yetu ino ongwa, novinyama aviho vikahimo. (Colossenses 1:15, 16) Pokati kovipuka ovio aviho, Jesus “uholepo vali unene” ovanthu.​—Provérbios 8:31.

Oluembia Jesus ena novanthu lutalelwa kovilinga viae viokuivisa. Tunde ponthyimbi, Jesus walekesa nawa okuti weya pano pohi opo “aivise onondaka onongwa” kovanthu aveho vesukisa okukuatesuako. (Lucas 4:18) Mahi Jesus walingile ovipuka ovinyingi, kapopile vala konthele yokukuatesako ovanthu. Ovikando ovinyingi Jesus walekesa okuti uhole ovanthu. Mongeleka, puetyi ovanthu ovanyingi veya okumutehelela, Jesus “akala nokankhenda navo iya avelula ovavei vavo.” (Mateus 14:14) Etyi omulume umwe ankho apopila Jesus nonthumbi okuti ntyakule, Jesus akala nokankhenda. Jesus weiva omulume apopi okuti: “Nahanda! Hakuka.” (Lucas 5:12, 13) Puetyi Jesus amona epanga liae Maliya ukahi nokulila omphange yae, Lasalu wankhia, “tyemuihama unene, akeme” iya “Jesus ahimbika okulila.” (João 11:32-36) Konyima alingi otyipuka tyimwe, ankho vahasoko​—Jesus atutulisa Lasalu namphila ankho palambale ononthiki ononkhuana etyi ankhia!​—João 11:38-44.

Tyotyili, Jesus ankho utyii okuti etyi ekahi nokulinga opala vala omuvo uhehi. Ankho utyii okuti vana ahakula mavavele vali tupu nava atutilisa mavankhi vali. Tupu, Jesus ankho utyii okuti Ouhamba wa Huku mauya okumanako apeho ovitateka viovanthu. Otyo, tyilekesa nawa omokonda yatyi Jesus ahalingilile vala omahuviso; mahi tupu wivisa nombili “onondaka onongwa mbouhamba.” (Mateus 9:35) Omahuviso ae alekesa nawa etyi Ouhamba wa Huku maukalinga apa katutu mouye auho. Tala omilao Viombimbiliya mavikafuisuapo momuvo oo.

• 

  Ovitateka viekongoko kavikakalako vali.

  “Pomuvo watyo oo, omaiho ovamphoki maakapatuka, omakutui onompholo maakahituluka. Pomuvo watyo oo, otyilema matyikalombauka ngombambi, elaka liotyihita mulungu malikaimba nokukuiilila nehambu.” Tupu “nawike omunthu kombanda yohi makati: ‘Ame navela.’”​—Isaías 33:24; 35:5, 6.

• 

  Kamakukala vali ononkhia.

  “Ovaviuki mavakapiñgana ohi, avakakalako apeho.”​—Salmo 37:29.

  “Huku makamanako ononkhia, iya Ohamba Tatekulu Jeova, makasekuna ononkhuka movipala aviho.”​—Isaías 25:8.

• Vokuankhia mavakatutila.

  “Aveho vekahi momalangalo mavekeiva ondaka yae, iya avatundumo.”​—João 5:28, 29.

  “Makukakala etutilo.”​—Atos 24:15.

• 

  Ovanthu kamavakakala vali tyihena omaumbo ine ovilinga.

  “Mavakatunga onondyuo avakalamo, mavakatuika omiti avakalia ovinyango viavio. Kavakatunga iya mukuavo ngae ukakalamo, kamavakatuika iya vakuavo ngavo vakalia. . . . ovanthu vange mavakalinga ovilinga vieta ehambu liotyotyili.”​—Isaías 65:21, 22.

• 

  Kamakukakala vali ovilwa.

  “Huku makamanako ovita alo kuna kuaoyela ohi.”​—Salmo 46:9.

  “Kamavekeliluisa vali, tupu kavekelilongesa vali ovilwa.”​—Isaías 2:4.

• 

  Nawike vali makakamba okulia.

  “Ohi maikaava okulia okunyingi.”​—Salmo 67:6.

  “Makukakala ovilia ovinyingi kombanda yohi. Alo umwe kononthongo-nthongo mbo nomphunda makukakala okulia okunyingi.”​—Salmo 72:16.

• Kakukala vali oluhepo.

  “Omuhepi kamalimbuwa apeho.”—Salmo 9:18.

  “Huku mayovola omuhepi uliyavela okuhanda ombatelo, na una umona ononkhumbi, na kese umwe uhena omuvateli. Makalingila okankhenda una uhena tyae nomuhepi, nokukayovola omienyo viovahepi.”​—Salmo 72:12, 13.

Tyina utala omilao ovio aviho konthele Youhamba wa Huku, utyiete pahe omokonda yatyi Jesus ankho esukila unene Nouhamba wa Huku? Etyi ekahi pano pohi ankho upopila kese munthu uhanda okutehelela konthele Youhamba wa Huku, ankho utyii okuti Ouhamba maukamanako ovitateka aviho vinumanesa ovanthu hono.

Okuti omilao ovio Viombimbiliya konthele Youhamba kavikuhambukiswa? Inkha ongotyo, oñgeni monoñgonoka vali konthele Youhamba? Iya oityi molingi opo ukale nonthumbi yokuti mopolo ouwa Kouhamba? Onthele onkhuavo ikahi komutwe maikumbulula omapulo oo.