ETOMPHO KONTHELE YOMBIMBILIYA
Onalupi Ouhamba wa Huku Mauhimbika Okutumina?—Onthele 1
Onthele ei etompho Ombangi umwe ya Jeova apondola okukala nalio konthele Yombimbiliya na munthele yae. Pahe tusokei ñgeno Ombangi ya Jeova utiwa o Cameron waya peumbo liomulume utiwa o Jon.
“TUALAKO OKUOVOLA” EKUNGUNYIKO
Cameron: Jon, ndyihambukwa tyina tupopia apeho konthele Yombimbiliya.a Metompho tuali nalio, ove walingile epulo limwe konthele Youhamba wa Huku. Ove wapula omokonda yatyi Onombangi mba Jeova vetavelela okuti Ouhamba wahimbika okutumina menima 1914.
Jon: Yoo, ame natanga omukanda wenyi umwe, iya oo wapopia okuti Ouhamba wa Huku wahimbika okutumina menima 1914. Otyo tyampha olumbwe mokonda ove wamphopila okuti omatavelo enyi aeho elikuata Nombimbiliya.
Cameron: Enga elikuata.
Jon: Tyotyili, ame ndyitanga Ombimbiliya yange. Mahi hihinangela napeke namuene pahonekwa enima 1914. Tupu, nanyingilile mo Internete okuovola mono Mbimbiliya enima “1914.” Naovola atyiho, o Internete ipopia vala okuti: “Ondaka wovola kaimo.”
Cameron: Ame ndyikupandula unene mokonda yovipuka vivali walinga Jon. Tete otyetyi watanga Ombimbiliya aiho. Ove uhole unene Ondaka ya Huku.
Jon: Otyili. Kutupu omukanda ngoo.
Cameron: Ndyityitavela. Tya vali ndyikupandulila otyetyi waovola Mombimbiliya ekumbululo liepulo liove. Ove walinga etyi itulunda okulinga: “Okutualako okuovola” ekungunyiko.”b Okulinga ononkhono ngoombo otyiwa unene.
Jon: Napandula. Ame nahanda okutyinoñgonoka nawa. Tyotyili, naovolola unene andyivasi etyi tyipopia vali konthele yo 1914 momukanda ou tulilongesa. Otyo tyipopia konthele yondyoi yohamba imwe—yalota konthele yomuti umwe omunene watyokuapo konyima auyovo vali, ngoti ongotyo.
Cameron: Iyaa. Olio eulo liahonekua momukanda wa Daniel mokapitulu 4. Lipopia ondyoi Yohamba Nambukondonosole.
Jon: Iyaa, oyo yatyo. Natanga eulo olio aliho okuliwana-wana. Mahi tyilityili, hetyinongokele oityi lipopia konthele Youhamba wa Huku ine enima 1914.
Cameron: Tyotyili Jon, nomuuli watyo muene Daniele, kanoñgonokele eulo olio ankho atumwa okuhoneka!
Jon: Otyo otyili?
Cameron: Yoo. Omukanda wa Daniel 12:8, wati: “Ame netyiiva mahi hetyinoñgonokele.”
Jon: Oo, muaina hame vala. Otyo tyimphameka katutu.
Cameron: Otyili, Daniele nae ketyinoñgonokele mokonda ankho omuwo kaunehikepo pala ovanthu vanoñgonoke nawa etyi tyihangununa omaulo omukanda wa Daniele. Mahi pahe, momuvo uno, tupondola okunoñgonoka nawa omaulo oo.
Jon: Omokonda yatyi wapopila ngotyo?
Cameron: Tala etyi tyikahi moversikulu ilandulako. Daniel 12:9 yati: “Onondaka mambuholekwa nokupatwa alo komuvo wonthyulilo.” Ngotyo eulo olio ankho lipondola okunoñgonokwa vala “komuwo wonthyulilo.” Melilongeso lietu Liombimbiliya matunoñgonoka nawa ovipuka vilekesa okuti tukahi momuwo oo wonthyulilo.c
Jon: Naina, upondola okunthyangununina eulo lia Daniele?
Cameron: Ewa, mandyihetekela.
ONDYOI YA NAMBUKONDOSOLE
Cameron: Opo tuhimbike, nkhele mandyipopi tyihasete etyi Ohamba Nambukondosole amona mondyoi yae. Pahe atupopi konthele yondyoi oyo.
Jon: Tyikahi nawa.
Cameron: Mondyoi, Nambukondosole wamona omuti omunene walambapo aviho automo peulu. Iya ondaka ya Huku yatuma omuti oo utyokuepo. Mahi, Huku wapopia okuti ehina liatyo liyekelei meheke. Konyima “yomivo epandu vali,” omuti oo maukulu vali.d Eulo olio tete nkhele ankho lipopia Nambukondosole. Namphila ankho Ohamba yankhimana unene, ngomuti watoma peulu, watetelueko “momivo epandu vali”. Ove uhinangela etyi tyamonekelepo?
Jon: Au, hityihinangela.
Cameron: Tyitupu tyimwe. Ombimbiliya ilekesa okuti Nambukondonosole wakalele otyova. Mokueenda kuomuvo oo, ehetyivili okutumina. Mahi konyima yomivo epandu vali wapua, Nambukondosole akala vali no nondunge ahimbika okutumina vali.e
Jon: Tyaviuka, etyi wapopia netyinoñgonoka. Mahi oityi otyo tyipopia konthele Youhamba wa Huku nenima 1914?
Cameron: Oñga, eulo olio liafuisuapo mononkhalelo onombali. Tete, liafuisuapo etyi Ohamba Nambukondonosole apolwa koutumini. Vali, eulo olio liafuisuapo etyi Outumini wa Huku wayekapo okutuminwa novanthu pano pohi. Ngotyo okufuisuapo oko kwa vali kulekesa Ouhamba wa Huku.
Cameron: Oñgeni ove utyii okuti okufuisuapo kwa vali kueulo olio kulekesa Ouhamba wa Huku?
Cameron: Tete elekeso tulivasa meulo liatyo muene. Ngetyi tyapopia Daniel 4:17, eulo liapopia okuti “opo ovanthu vetyinoñgonoke okuti Omukulami, Omutumini mouhamba wovanthu iya uwavela una ahanda.” Ove wamona onondaka “ouhamba wovanthu”?
Jon: Yoo, yati “Omukulami, Omutumini mouhamba wovanthu.”
Cameron: Otyo yatyo. Ove utyii olie “Omukulami”?
Jon: Tyafuile ipopia konthele ya Huku.
Cameron: Otyili. Ngotyo otyo tyitulekesa okuti eulo olio kalipopi vala konthele ya Nambukondonosole. Tupu muakutikinya “ouhamba wovanthu”, outumini wa Huku maukatumina ovanthu. Otyo tyaviuka tyina tutala onoversikulu ononkhuavo mbeulo olio.
Jon: Ove uhanda okutiwi?
OSAPI YOMUKANDA
Cameron: Ovikando ovinyingi omukanda Wombimbiliya wa Daniele uhangununa osapi yasukisa vali. Upopia komutwe konthele yokuvialekwa Kuouhamba wa Huku mamukatumina Omona wae, Jesus. Mongeleka, nkhele tukondokei ko vikapitulu vivali. Okuti upondola okutanga Daniel 2:44?
Jon: Yoo. yati: “Kononthiki mbovatumini vatyo ovo, Huku yo keulu makavialeka ouhamba umwe uhakahanyuako nalumwe. Ouhamba oo kamaukapita pomaoko elongo ekuavo. Maukahanyako omautumini atyo aeho nokuenyimako. Iya ouhamba watyo oo, ngoo ukakalako apeho.”
Cameron: Napandula. Ove usoka okuti tyaviuka okuti oversikulu oyo ipopia Ouhamba wa Huku?
Jon: Umm. Ame hityii nawa.
Cameron: Tala etyi yapopia okuti Ouhamba oo “maukakalako apeho.” Tyotyili Ouhamba wa Huku otyo hauhamba wovanthu, ine hatyo?
Jon: Au.
Cameron: Kuna eulo ekuavo liomukanda wa Daniele lipopia Ouhamba wa Huku. Eulo olio likahi mu Daniel 7:13, 14. Konthele youtumini wokomutwe, eulo liati: “Iya apewa outumini, nounene, nouhamba, opo ovanthu aveho, novilongo, nomalaka vemuumbile. Outumini wae, maukatualako apeho, kamaukapwa, iya ouhamba wae, kamaukahanyuako.” Una etyi wanoñgonoka meulo eli?
Jon: Liapopia ouhamba umwe.
Cameron: Otyili. Iya hakese vala uhamba. Tala okuti Ouhamba oo maikatumina “ovanthu aveho, novilongo, nomalaka vemuumbile.” Monondaka ononkhuavo, Ouhamba oo maukatumina ouye auho.
Jon: Ame ankho hityii okuti ongotyo, mahi wapopia nawa. Ongotyo yapopia.
Cameron: Tupu, tala okuti eulo liapopia okuti: “Outumini wae, maukatualako apeho, kamaukapwa, iya ouhamba wae, kamaukahanyuako.” Utavela okuti Omulao welifua nou tuatanga momukanda wa Daniel 2:44?
Jon: Enga vielifwa.
Cameron: Tupitupilule nkhele ovipuka aviho tuapopia. Eulo likahi mu Daniele okapitulu 4 opala ovanthu aveho vanoñgonoke okuti “Omukulami oe Omutumini mouhamba wovanthu.” Otyo tyilekesa okuti Eulo olio lipopia otyipuka otyinene vali tyipona etyi tyaendele na Nambukondonosole. Iya omukanda wa Daniele, upopia omaulo alekesa okuviala Kuouhamba wa Huku maukatuminua Nomona wae. Kuove tyaviuka okupopia okuti eulu likahi mokapitulu 4 komukanda wa Daniele lipopia konthele Youhamba wa Huku?
Jon: Yoo, tyaviuka. Mahi nkhele hiete oñgeni otyo tyelikuata nenima 1914.
“YEKA PALAMBE OMIVO EPANDU VALI”
Cameron: Nkhele tukondoke Kohamba Nambukondonosole. Oe ankho waelekua nomuti etyi eulo liafuisuapo tete. Wakalele tyihatumina etyi omuti watyokwapo apalambe omivo epandu vali, otyo o puetyi akala otyova. Omivo epandu vali viavituka etyi Nambukondosole akala vali nonondunge akondoka vali koutumini. Mokufuisuapo kwa vali keulo olio, outumini wa Huku wakalele omivo epandu vali tyihatumina momuwo umwe, mahi hakuti ankho pena tyimwe Huku ehevilile.
Jon: Ngotyo oñgeni?
Cameron: Kohale mo Isilayeli onohamba ankho mbutumina mo Jelusalei ankho mbupopia okuti mbukahi “kotyipundi tya Jeova.”f Ankho mbutumina ovanthu va Huku menyina liae. Ngotyo outumini wono hamba ombo ankho ulekesa outumini wa Huku. Mahi, konyima onohamba ombo mbumwe ambutyitukilapo Huku iya ovanthu mbutumina ovanyingi avalandula onohamba ombo. Mokonda ova Isilayeli kavetavelele, Huku ayeke vafindue nova Mbambilonia mo 607 P.K.E. Okutuka opo ankho petupu vali ohamba itumina menyina lia Jeova mo Jelusalei. Iya ngotyo ongatyina outumini wa Huku watyilikwa. Etyi napopia wetyinoñgonoka?
Jon: Yoo, tyiivala.
Cameron: Ngotyo enima 607 P.K.E. opo pahimbika omivo epandu vali, ine omuvo etyi outumini wa Huku watalamekwa. Etyi omivo epandu vali viapwa, Huku avialeka omutumini omupe matumina menyina Liae, pomuwo opo, omunthu umwe keulu. Opomuvo opo omaulo omakuavo tuatanga mu Daniele afuiswapo. Pahe epulo enene olieli: Onalupi omivo epandu vali viavituka? Inkha tutyivila okukumbulula epulo olio, matunoñgonoka onalupi Ouhamba wa Huku wahimbika okutumina.
Jon: Ndyityiete. Kevela utale, omivo epandu vali viavituka 1914?
Cameron: Otyo yatyo! Wetyimona.
Jon: Mahi oñgeni ove utyii?
Cameron: Mokueenda kuovilinga viae viokuivisa pano pohi, Jesus walekesa okuti omivo epandu vali ankho nkhele kavinepwe.g Ngotyo omuwo oo waenda ehimbwe. Omivo epandu vali viahimbika ovityita viomanima etyi Jesus nkhele eheneye pano pohi, avituakalo omuvo omunyingi etyi akondola keulu. Tupu, hinangela okuti, ehangununo liomaulo a Daniele liakala tyiheiwe nawa alo “komuwo wonthyulilo.”h Okupolelela menima 1800 ovalilongesi ovakuatyili Vombimbiliya vakala nombili yokulilongesa nawa eulo olio nomakuavo vali. Vetyimona nawa okuti omivo epandu vali mavipu menima 1914. Iya ovipuka ovinyingi vimoneka mouye okuhimbikila opo vilekesa nawa okuti 1914 enima Ouhamba wa Huku wahimbika okutumina keulu. Olio enima mouye muamoneka ovipuka vialekesa okuti tukahi komuwo wonthyulilo. Otyo otyipuka otyikuavo wesukisa okusoka nawa . . .
Jon: Eenga. Ame tyotyili mandyikatanga opo ndyityinoñgonoke vali nawa.
Cameron: Wehesuke. Ame naame mandyitaindya omuvo opo ndyitale nawa omaulo oo no ñgeni afuiswapo. Mahi pahe, ndyisoka okuti etyi tuapopia tyekukuatesako okutala okuti omatavelo Onombangi mba Jeova konthele Youhamba elikuata Nombimbiliya.
Jon: Yoo. Ame nahuva unene okutala onthumbi una Nombimbiliya etyi walekesa omatavelo enyi.
Cameron: Naame netyimona okuti ove una onthumbi Mombimbiliya. Tuapopia konthele yonondaka ove ankho uhei wesukisa okutala nawa. Tyipondola hamwe una omapulo amwe. Mongeleka, tuapopia okuti omiwo epandu vali vipopia konthele Youhamba wa Huku iya viahimbika mo 607 P.K.E. Mahi pahe ove utyii umwe nawa okuti omivo epandu vali viavituka mo 1914?i
Jon: Enga, ame ndyikahi nokulipula konthele yotyo.
Cameron: Ombimbiliya itukuatesako okupunga nawa oñgeni omivo epandu vali viafuiswapo. Ove uhanda tupopie vali konthele yotyo onthiki onkhuavo?j
Jon: Tyikahi nawa.
Okuti nove una etyi uhanda okunoñgonoka nawa konthele Yombimbiliya? Okuti una etyi uhanda okunoñgonoka konthele yomatavelo ine ovilinga vio Nombangi mba Jeova? Inkha una, pula Kombangi umwe ya Jeova, makala nehambu liokutomphola noove konthele yotyo.
a Notyilinga tyavo tyokulongesa ovanthu Ombimbiliya otyali, Onombangi mba Jeova apeho vatomphola no vomunthele yavo konthele Yombimbiliya.
c Tala o kapitulu 9 komukanda Oityi Ombimbiliya Tyili Ilongesa? walingwa no Nombangi mba Jeova. Tupu upola mo Internete www.jw.org.
g Konthele yeulo liomuvo wonthyulilo, Jesus wati: “O Jelusalei [tyilekesa outumini wa Huku] maikaliatwa novanthu vovilongo, alo ononthiki mbalulikwa mbovilongo mbufuisuapo.” (Lucas 21:24) Ngotyo okuatyilikwa kuoutumini wa Huku ankho kutualako alo kononthiki mba Jesus iya ankho matyitualako alo komuwo wonthyulilo.
j Onthele onkhuavo ngei, maikapopia konthele yono versikulu mbo Mbimbiliya mbupopia omivo epandu vali.