Onalupi Ouhamba wa Huku Wahimbika Okutumina?​—Onthele 2

ONDYOI YA NAMBUKONDOSOLE​—OKUPITULULA

Cameron: Nahambukwa etyi nekuvasa vali, Jon. Apeho ndyihambukwa tyina tulilongesa Ombimbiliya.a Oñgeni, onawa?

Jon: Vaketu, ndyikahi nawa.

Cameron: Ove ukahi nokulinga nawa. Etyi neile, tuapopile omokonda yatyi Onombangi mba Jeova vetavelela okuti Ouhamba wa Huku wahimbika okutumina menima 1914.b Tuapopile etyi tyilekesa konthele yotyo meulo likahi Mombimbiliya mokapitulu 4 komukanda wa Daniele. Ove utyihinangela?

Jon: Lipopia konthele yondyoi Yohamba Nambukondonosole yomuti omunene.

Cameron: Yoo, otyili. Mondyoi oyo Nambukondonosole wamona omuti omunene wekula automo peulu. Eivi ondaka ya Huku yatuma omuti oo utyokuepo, mahi ehina nomii viatyo aviyekelwa meheke. Konyima yomivo “epandu vali,” omuti oo aukulu vali.c Tupu tuapopia oñgeni eulo liafuisuapo tuvali. Ove uhinangela oñgeni liafuisuapo tete?

Jon: Otyo tyamonekelele Nambukondonosole yatyo muene, hatyili? Etyi akala otyova momanima epandu vali.

Cameron: Otyo yatyo. Momuvo uhehi Nambukondonosole wakala otyova, ngotyo outumini wae autalama. Mahi mokufuiswapo kwa vali kweulo olio, outumini wa Huku nao watalamekwa momivo epandu vali. Ngetyi tuetyimona, omivo epandu vali viahimbika etyi o Jelusalei yahanyuapo menima 607 P.K.E. Okutuka opo, ankho kutupu vali ohamba naike pano pohi ipondola okukalelapo Jeova Huku pala okutumina ovanthu vae. Mahi, etyi omivo epandu vali viapwa, Huku aholovona Omutumini omupe opo atumine ovanthu vae​—omunthu umwe keulu. Monondaka ononkhuavo, etyi omivo epandu vali viapwa otyo outumini Wouhamba wa Huku wahimbika keulu. Pahe, matupopi onalupi omivo epandu vali viahimbika. Ngotyo inkha tuimbuka omuvo waendapo, matunoñgonoka onalupi Ouhamba wa Huku wahimbika okutumina. Wanoñgonoka atyiho na popia?

Jon: Yoo, etompho eli liakalesa nawa omalusoke ange.

Cameron: Napandula. Pahe matupopi vali konthele yomivo epandu vali. Ame natanga konthele yotyo opo ndyihinangele nawa ononthele mbakolela vali. Nandyityivile okumbuhangununa nawa.

Jon: Iyaa.

OMIVO EPANDU VALI VIPWA​—ONONTHIKI MBONTHYULILO MBUHIMBIKA

Cameron: Okufuisuapo kueulo tete ankho muakutikinya Nambukondonosole, omivo epandu vali ankho omanima umwe epandu vali. Mahi mokufuiswapo kwa vali muakutikinya Ouhamba wa Huku, omivo epandu vali vialambapo vali omanima epandu vali.

Jon: Oityi upopila ngotyo?

Cameron: Tete hinangela okuti omivo epandu-vali viahimbika etyi o Jelusalei yahanyuapo mo 607 P.K.E. Inkha tuhimbikila okuvalula menima olio, omanima epandu-vali avituka menima 600 P.K.E. Mahi natyike tyamonekela menima olio konthele youtumini wa Huku. Okukondoka kuetyi tuapopia konyima, omanima amwe konyima etyi Jesus ekahi pano pohi, walekesa okuti omivo epandu-vali nkhele kavinepwe.

Jon: Ahh, otyili. Pahe nahinangela.

Cameron: Ngotyo, omivo epandu-vali hamanima epandu vali, mahi omanima omanyingi.

Jon: Omanima eñgapi?

Cameron: Omukanda Wombimbiliya Revelação, upopia etyi tyelikuata nomukanda wa Daniele, utukuatesako okunoñgonoka apa pelifwe omivo epandu-vali. Upopia okuti omivo vitatu notyihupe ongatyina ononthiki 1.260.d Ngotyo omivo epandu-vali​—omivo vitatu notyihupe, nomivo vitatu notyihupe​—okuvihonyeka tyituuka ononthiki 2.520. Wetyinoñgonoka?

Jon: Yoo, ndyityiete. Mahi ame hanoñgonokele etyi tyilekesa okuti Ouhamba wa Huku wahimbika okutumina menima 1914.

Cameron: Tyitupu tyimwe, tutale inkha katyelikuatele nawa. Pamwe momaulo Ombimbiliya, onthiki enima.e Inkha tuvalula enima onthiki, omivo epandu-vali vituuka omanima 2.520. Okuvalula okuhimbikila mo 607 P.K.E., omanima 2.520 avitukila menima 1914.f Tyina tuhika menima 1914 otyo omivo epandu-vali viapwa, enima Jesus akala Ohamba Youhamba wa Huku. Otyipuka otyikuavo, tunde menima 1914, kuamoneka ovipuka ovinyingi Ombimbiliya yaulile okuti mavikamoneka konthyulilo youye.

Jon: Ovipuka patyi?

Cameron: Tala etyi Jesus apopia, tyahonekwa mu Mateus 24:7. Konthele yomuvo mahimbika okutumina keulu, Jesus wati: “Otyilongo matyikaluisa otyilongo otyikuavo iya ouhamba maukaluisa ouhamba omukuavo. Iya kovilongo ovinyingi makukakala ondyala, novinimawe.” Tala okuti Jesus wapopia okuti makukakala ondyala novinimawe mokueenda kuomuvo oo. Mouye muno momanima 100 okualamba muhole okumoneka ovipuka ovivi unene, hatyili?

Jon: Otyili.

Cameron: Moversikulu oyo, Jesus tupu wapopia okuti tyina atumina Mouhamba wa Huku mouye mamukamoneka ovilwa. Iya omukanda wa Wombimbiliya wa Revelação wapopia okuti momuvo wonthyulilo ovilwa kavikamoneka vala movilongo vimwe mahi vikamoneka mouye auho.g Ove uhinangela onalupi ovilwa viotete viouye auho viahimbika?

Jon: Omenima 1914, menima Jesus ahimbika okutumina! Ame otyo ankho hityii.

Cameron: Tyina tupaka kumwe omanyingilikilo aeho​—eulo konthele yomivo epandu-vali nomaulo omakuavo Ombimbiliya konthele yomuvo wonthyulilo​—otyo tyelikuata. Onombangi mba Jeova vena onthumbi yokuti Jesus wakala Ohamba Youhamba wa Huku okuhimbikila menima 1914 iya omenima olio ononthiki mbonthyulilo mbahimbika.h

Jon: Ame pahe ngoti ndyikahi nokutyinoñgonoka.

Cameron: Otyili katyapepukile. Ngetyi napopile, naame nataindya omuvo opo ndyityinoñgonoke nawa. Mahi ngetyi tuatala, etompho lietu lietukuatesako okutala okuti namphila enima 1914 Mombimbiliya kalimo, etyi Onombangi mba Jeova vetavela konthele yenima olio tyelikuata Novihonekwa.

Jon: Yoo, ame nahuva unene netyi wapopia, aviho wapopia walekesa apa viahonekwa. Kuapopile vala etyi wa soka. Mahi ame ndyilipula omokonda yatyi tyepuilisila ñga. Omokonda yatyi Huku ehetupopilile Mombimbiliya okuti 1914 olio enima Jesus mahimbika okutumina keulu?

Cameron: Olio epulo ewa, Jon. Tyotyili, kuna ovipuka ovinyingi vihayandyulukile nawa Movihonekwa. Ngotyo, omokonda yatyi Huku ahonekesa Ombimbiliya monkhalelo yesukisa okulinga ononkhono opo ovanthu veinoñgonoke? Tupondola okupopia konthele yotyo onthiki onkhuavo.

Jon: Naame otyo nahanda.