Ove Ulinga Etyi Huku Ekwita?

“Mphopile vala etyi uhanda, ame mandyityilingi nehambu.” Tyafuile onondaka ombo kumbupopila omunthu uhei. Mahi, tyotyili epanga liove umupopila-mbo nehambu. Omapanga omanene vetyihole tyokulilingilako ovipuka.

Ombimbiliya ilekesa nawa okuti Jeova apeho ulinga etyi tyietela ehambu ovafendeli vae. Mongeleka, Ohamba David, una ankho oupanga omuwa na Huku wati: “Ove walinga ovipuka ovinyingi Jeova Huku yange, enga omalusoke ove novilinga viove oviwa unene pala onthue. . . . Ovinyingi unene kavivilwa okuvalulwa!” (Salmo 40:5) Tyihe otyo vala, Jeova ulingila ovipuka alo umwe nava nkhele vehemwii, ‘uveavela okulia, nokuyulisa nawa omitima viavo nehambu.’​—Atos 14:17.

Mokonda Jeova utyihole tyokulinga ovipuka vihambukiswa vakuavo, tyaviuka akevelele vana vahanda okukala omapanga ae valinge evi vihambukiswa “omutima wae.” (Provérbios 27:11) Mahi oityi upondola okulinga tyihambukiswa Huku? Ombimbiliya ikumbulula okuti: “Muhalimbueiko okulinga oviwa, nokuavela vakuenyi ovipuka, mokonda okulinga ngotyo tyihambukiswa unene Huku.” (Hebreus 13:16) Otyo tyilekesa okuti okulinga oviwa nokuavela vakuetu ovipuka otyo vala tyesukisa opo tuhambukiswe Jeova?

Ombimbiliya yati: “Tyihena ekolelo tyipuiya okuhambukiswa Huku.” (Hebreus 11:6) Tyakolela okutala okuti konyima yetyi “Abraiau akala nekolelo mu Jeova, aihanwa okuti epanga lia Jeova.” (Tiago 2:23) Tupu, Jesus Kristu wapopia unene esilivilo liokukala “nekolelo mu Huku,” inkha tuhanda okuyambwa na Huku. (João 14:1) Ngotyo, oñgeni matukala nekolelo, Huku aovola ku vana vahanda okufuena kwe? Ove upondola okuhimbika okutanga apeho Ondaka ya Huku, Ombimbiliya. Mokulinga ngotyo, mokala “nenoñgonoko liaviuka” nokulinga “etyi tyimuhambukiswa.” Iya tyina enoñgonoko liove ewa ku Jeova liameliyawisa nokuendela movitumino viae viouviuki, ekolelo liove malikulu iya ngwe afuene kuove.​—Colossenses 1:9, 10.