OSAPI YOKONDYE | OVE UPONDOLA OKUFUENA KU HUKU
Okuti Ulitehela Okuti Una Oupanga na Huku?
“Okukala nelitokeko ewa na Huku tyikukalesa tyihena woma, tyapama nokuakola. Ulitehela ngatyina Huku apeho ekahi nokukuyunga kovivi.”—CHRISTOPHER OMUKUENDYE UMWE KO GANA.
“Huku weete ovitateka viove aviho, ukuhole unene nokukala nokankhenda noove tyilamba puetyi umuita.”—HANNAH WOMANIMA 13, ko ALASKA, U.S.A
“Elao limwe onene nokukala tyapoleya tyina wamañongoka okuti una oupanga omuwa na Huku!”—GINA, OMUKAI UMWE WOKO JAMAICA UNA OMANIMA 40.
Christopher, na Hannah, na Gina havo vala vehole okulitehela ngotyo. Ovanthu ovanyingi mouye auho vanoñgonoka nawa okuti Huku uvetala ngatyina omapanga ae. Iya ove? Okuti ulitehela okuti una oupanga na Huku? Ine, okuti ove uhanda okukala noupanga na Huku? Hamwe uhole okulipula, ‘okuti tyitavela umwe okukala epanga lia Huku Wepondolo aliho? Inkha tyitavela, oñgeni ngotyo?’
OKUKALA EPANGA LIA HUKU TYITAVELA
Ngetyi Ombimbiliya ipopia, tyitavela okukala noupanga omuwa na Huku. Ombimbiliya yati Huku waihanene ohongoi imwe omu Hebreu utiwa Abraiau, okuti, “epanga liange.” (Isaías 41:8) Tupu tala etyi Ombimbiliya itukonga mu Tiago 4:8 okuti: “Fuenei ku Huku, nae opo afuene kuonwe.” Tyayandyuluka nawa okuti okufuena ku Huku, okukala noupanga omuwa nae tyitavela. Mahi tyina ahamoneka komaiho ovanthu, oñgeni ove upondola “okufuena ku Huku” nokukala noupanga omuwa nae?
Opo tukumbulule epulo olio tutalei etyi tyipameka oupanga wovanthu ve vali. Ovanthu vahimbika okulipopila omanyina. Konyima, avahimbika okutomphola apeho, nokulipopila etyi kese umwe asoka netyi eliivite, oupanga aukulu. Valinga ononkhono mbokulilingila ovipuka iya oupanga wavo aupame. Tyelifwa notyo, noupanga na Huku otyo ulingwa. Tutalei oñgeni.