Omapulo Ombimbiliya Akumbululwa
Oñgeni ovana vapondola okunoñgonoka okuhumba Huku?
Lekesa ovana ovipuka viatungwa opo uvekuateseko okunoñgonoka nokuhumba Huku
Ovana vove mavanoñgonoka vala okuhumba Huku inkha vetyimona okuti okuekahi iya uvehole. Opo vahumbe Huku ovana vesukisa okumunoñgonoka. (1 João 4:8) Mongeleka, vesukisa okunoñgonoka ovipuka evi: Oityi Huku alingila ovanthu? Omokonda yatyi Huku ayekelako ononkhumbi? Oityi Huku makalingila ovanthu komutwe wandyila?—Tanga Filipenses 1:9.
Opo ukuateseko ovana okuhumba Huku, una okuvelekesa okuti ove umuhole. Tyina vametyimono navo mavekuhetekela.—Tanga Deuteronômio 6:5-7; Provérbios 22:6.
Oñgeni mohiki komitima viovana vove?
Ondaka ya Huku ina ononkhono. (Hebreus 4:12) Ngotyo, kuatesako ovana vove okunoñgonoka onondonga mbotete. Opo ehike komitima viovanthu, Jesus ankho ulinga omapulo, uvetehelela, nokuhangununa Ovihonekwa. Opo uhike komitima viovana vove upondola okuhetekela onkhalelo ya Jesus yokulongesa.—Tanga Lucas 24:15-19, 27, 32.
Tupu, okuvepopila omahipululo Ombimbiliya konthele yo ñgeni Huku atekula ovanthu, tyipondola okuvekuatesako okunoñgonoka, nokuhumba Huku. Omikanda vialingwa pala okukuatesako ovana vikahi mo www.jw.org.—Tanga 2 Timóteo 3:16.